Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ni Jesus—Ti Dalan, ti Kinapudno, ti Biag

 KAPITULO 101

Nanganda iti Balay ni Simon Idiay Betania

Nanganda iti Balay ni Simon Idiay Betania

MATEO 26:6-13 MARCOS 14:3-9 JUAN 11:55–12:11

  • NAGSUBLI NI JESUS IDIAY BETANIA ITI ASIDEG TI JERUSALEM

  • IMBUKBOK NI MARIA TI NABANGLO A LANA KEN JESUS

Nagturong ni Jesus idiay Betania idi pimmanaw idiay Jerico. Agarup 20 a kilometro dayta a narigat ken nasang-at a dalan. Ti Jerico ket agarup 250 a metro a nababbaba ngem iti patar ti baybay, ken ti Betania ket agarup 610 a metro a nangatngato ngem iti patar ti baybay. Agnanaed ni Lazaro ken ti dua a kakabsatna iti bassit a purok ti Betania, nga agarup tallo a kilometro manipud Jerusalem ken adda iti makindaya a sikigan ti Bantay Dagiti Olibo.

Adun a Judio ti simmangpet idiay Jerusalem para iti Paskua. Nasapada a simmangpet “tapno dalusanda ti bagbagida kas imbilin ti Linteg” amangan no nakasagidda iti bangkay wenno nakaaramidda iti aniaman a mamagbalin kadakuada a narugit. (Juan 11:55; Numeros 9:6-10) Dadduma kadagiti nasapa a simmangpet ti naguummong idiay templo. Pampanunotenda no umay wenno saan ni Jesus iti Paskua.Juan 11:56.

Agduduma ti kapanunotan maipapan ken Jesus. Dadduma a lider ti relihion ti mayat a mangtiliw kenkuana tapno papatayenda. Kinapudnona, imbilinda pay a no adda makaammo iti ayan ni Jesus, ibagana “tapno tiliwenda.” (Juan 11:57) Kalpasan a napagungar ni Lazaro, pinadas idin dagitoy a lider a papatayen ni Jesus. (Juan 11:49-53) Dayta ti makagapu a dadduma ti agduadua no agparang pay ni Jesus kadagiti tattao.

Simmangpet ni Jesus idiay Betania iti Biernes, “innem nga aldaw sakbay ti Paskua.” (Juan 12:1) Mangrugi ti baro nga aldaw (Sabbath, Nisan 8) iti ilelennek ti init. Gapuna, nakadanon idiay Jerusalem sakbay ti Sabbath. Saan a mabalin a nagdaliasat manipud Jerico iti aldaw ti Sabbath—manipud iti ilelennek ti init iti Biernes agingga iti ilelennek ti init iti Sabado—ta iparit ti linteg dagiti Judio ti kasta a panagdaliasat. Mabalin a napan ni Jesus iti balay ni Lazaro, kas iti inaramidna idin.

Ni Simon nga agnanaed met idiay Betania inawisna ni Jesus ken dagiti kakaduana, agraman ni Lazaro, a makipangrabii iti aldaw ti Sabado. Maawagan ni Simon nga “agkukutel,” ta mabalin a dati nga agkukutel a pinaimbag idi ni Jesus. Iti panangipakita ni Marta iti kinagagetna, nagserbi kadagiti bisita. Dimngeg ni Maria ken Jesus, ket iti daytoy a tiempo adda timmaud a panagsusupiat.

Nanglukat ni Maria iti botelia, wenno bassit a pagkargaan iti lana, a makalaon iti agarup “kagudua a litro a nabanglo a lana, nakanginngina a puro a nardo.” (Juan 12:3) Nakanginngina daytoy a lana, nga aggatad iti (300 a denario) a katupag ti agarup makatawen a sueldo! Imbukbok ni Maria ti lana iti ulo ken saka ni Jesus ket kalpasanna, pinunasanna ti sakana babaen ti buokna. Nagayamuom ti nabanglo a lana iti intero a balay.

Nakapungtot dagiti adalan ket insaludsodda: “Apay a sinayangna ti nabanglo a lana?” (Marcos 14:4) Nagreklamo ni Judas Iscariote. Kinunana: “Apay a di pay la koma nailako daytoy a nabanglo a lana iti 300 a denario sa maited kadagiti napanglaw?”  (Juan 12:5) Ngem saan a talaga a maseknan ni Judas kadagiti napanglaw. Nabayagen nga agtaktakaw iti kahon a pagikabilan iti kuarta dagiti adalan.

Indepensa ni Jesus ni Maria. Kinunana: “Apay a kasta ti ibagbagayo iti daytoy a babai? Nasayaat ti inaramidna kaniak. Ta kanayon a kaduayo dagiti napanglaw, ngem saan a kanayon a kaduadak. Idi imbukbokna iti bagik ti nabanglo a lana, insagananak para iti pannakaitanemko. Kinapudnona, sadinoman a pakaikasabaan ti naimbag a damag iti intero a lubong, maipadamagto met ti inaramid daytoy a babai kas pakalaglagipan kenkuana.”Mateo 26:10-13.

Nasurok a maysa nga aldaw idin nga adda ni Jesus idiay Betania, ket nagdinamagen ti kaaddana sadiay. Adu a Judio ti immay iti balay ni Simon, saan laeng a tapno kitaenda ni Jesus no di ket tapno kitaenda met “ni Lazaro, a pinagungar [ni Jesus].” (Juan 12:9) Nagnunumuan dagiti pangulo a papadi a papatayenda ni Jesus ken ni Lazaro. Ipagarup dagiti lider ti relihion nga adu ti namati ken Jesus gapu iti panagungar ni Lazaro. Talaga a nagdakes dagitoy a lider ti relihion!