Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ni Jesus—Ti Dalan, ti Kinapudno, ti Biag

Ti Dalan, ti Kinapudno, ti Biag

Ti Dalan, ti Kinapudno, ti Biag

Mabalin a naragsakka no mangngegmo ti naimbag a damag. Talaga nga adda naimbag a damag para kenka ken iti ipatpategmo.

Daytoy a naimbag a damag adda iti Biblia, ti libro nga impaisurat ni Jehova a Dios, ti Namarsua iti uniberso, adu a tawen ti napalabasen. Iti daytoy a publikasion, adalentayo ti uppat a libro ti Biblia a pakabasaan iti naimbag a damag para iti amin. Naipanagan dagitoy kadagiti lallaki nga inusar ti Dios a mangisurat—da Mateo, Marcos, Lucas, ken Juan.

Adu ti mangawag kadagitoy a salaysay kas uppat nga Ebanghelio. Amin dagitoy salaysayenda ti ebanghelio, wenno naimbag a damag, maipapan ken Jesus—nga isu ti usaren ti Dios a mangispal. Kas Ari ti Pagarian ti Dios idiay langit, ipaay ni Jesus ti agnanayon a bendision iti amin a mangipakita iti pammati kenkuana.Marcos 10:17, 30; 13:13.

APAY NGA UPPAT NGA EBANGHELIO?

Mabalin a masdaawka no apay nga impaisurat ti Dios ti uppat a salaysay ti biag ken pannursuro ni Jesus.

Adda pagsayaatan ti pannakaisurat ti nagsisina a salaysay maipapan iti imbaga ken inaramid ni Jesus. Kas pagarigan, ipapanmo nga adda uppat a lallaki nga agtaktakder iti asideg ti nalatak a mannursuro. Ti lalaki nga agtaktakder iti sangona ket agsingsingir iti buis. Ti adda iti makannawanna ket doktor. Ti dumdumngeg iti makannigidna ket mangngalap ken nakasingsinged a gayyem ti mannursuro. Ken ti maikapat a lalaki nga adda iti likudanna ket agpalpaliiw ken ub-ubing ngem ti dadduma. Napudnoda amin, ken tunggal maysa ket adda naidumduma a paginteresanna. No agsurat ti tunggal maysa iti salaysay maipapan iti sasao ken aramid ti mannursuro, mabalin a nagduduma ti itampok ti uppat a salaysay. No usigentayo ti uppat a salaysay a laglagipentayo ti nagduduma a panangmatmat wenno panggep, maammuantayo ti pakabuklan ti imbaga ken inaramid ti mannursuro. Ipakita daytoy no kasano a magunggonaantayo iti uppat a salaysay maipapan iti biag ti Naindaklan a Mannursuro a ni Jesus.

No ituloytayo ti ilustrasion, kayat ti agsingsingir  iti buis nga isurat ti magustuan dagiti dimmakkel iti kaugalian dagiti Judio, isu nga insuratna dagiti pannursuro wenno pasamak iti pamay-an a maawatanda. Intampok ti doktor ti pannakapaimbag dagiti masakit wenno addaan iti pisikal a depekto isu a saanna nga inraman ti dadduma nga insurat ti agsingsingir iti buis wenno sabali ti panagsasaganad ti panangisuratna kadagita. Impaganetget ti nasinged a gayyemna ti rikrikna ken kababalin ti mannursuro. Ab-ababa ti salaysay ti ub-ubing a lalaki. Ngem umiso ti salaysay ti tunggal maysa. Ipakita daytoy no kasano a ti uppat a salaysay iti biag ni Jesus paunegenda ti pannakaawattayo iti ar-aramid, pannursuro, ken personalidadna.

Mabalin a tukoyen dagiti tattao dayta nga ‘Ebanghelio ni Mateo’ wenno ‘Ebanghelio ni Juan.’ Saan a kamali dayta, ta tunggal maysa ket naglaon iti “naimbag a damag maipapan ken Jesu-Kristo.” (Marcos 1:1) Ngem maymaysa laeng ti ebanghelio, wenno naimbag a damag, maipapan ken Jesus—mabasatayo iti uppat a salaysay.

Adu nga estudiante ti Sao ti Dios ti nangikompara ken namagtutunos kadagiti pasamak ken impormasion a mabasa iti Mateo, Marcos, Lucas, ken Juan. Kasta ti inaramid ti Siriano a mannurat a ni Tatian idi agarup 170 C.E. Binigbigna nga umiso ken naipaltiing dagitoy a libro, ken inurnongna dagiti impormasion a linaon ti Diatessaron, ti napagtutunos a salaysay maipapan iti biag ken ministerio ni Jesus.

Kasta ti naaramid iti libro a Ni Jesus—Ti Dalan, ti Kinapudno, ti Biag. Ngem ad-adda nga umiso ken kompleto. Posible dayta gapu ta ad-addan a matarusantayo ti kaitungpalan ti adu a padto ken ilustrasion ni Jesus. Dagitoy a pannakaammo linawlawaganna ti pannakaawattayo kadagiti imbaga ken inaramidna, kasta met ti panagsasaganad dagiti pasamak. Nalawlawag ti dadduma a detalye ken ad-addan a matarusan ti panangmatmat ti mannurat gapu iti natakuatan dagiti arkeologo. Siempre, ditay masigurado ti panagsasaruno ti tunggal pasamak. Ngem ti libro a Ni Jesus—Ti Dalan, ti Kinapudno, ti Biag isalaysayna dagita iti rasonable ken lohikal a pamay-an.

TI DALAN, TI KINAPUDNO, TI BIAG

Bayat a basaem ti libro, laglagipem ti kangrunaan a mensahena kenka ken kadagiti ipatpategmo. Kinuna ni Jesu-Kristo ken apostol Tomas: “Siak ti dalan ken ti kinapudno ken ti biag. Awan ti makapan iti Ama no saan a magna kaniak.”Juan 14:6.

Makatulong kenka ti libro a Ni Jesus—Ti Dalan, ti Kinapudno, ti Biag tapno maawatam no apay a ni Jesus “ti dalan.” Babaen laeng kenkuana a posible ti umadani ken Jehova a Dios babaen iti kararag. Kasta met, ni Jesus ti dalan tapno maikappiatayo iti Dios. (Juan 16:23; Roma 5:8) Babaen laeng ken Jesus a maaddaantayo iti naanamongan a relasion iti Dios.

Ni Jesus “ti kinapudno.” Insaritana ken nagbiag a maitunos iti kinapudno. Arigna, makita ti kinapudno iti kinatao ni Jesus. Tinungpalna ti adu a padto, a “nagbalinda a ‘wen’ babaen kenkuana.” (2 Corinto 1:20; Juan 1:14) Makatulong dagita tapno makitatayo ti nagpateg nga akemna iti pannakatungpal ti panggep ti Dios.Apocalipsis 19:10.

Ni Jesu-Kristo “ti biag.” Babaen iti subbot, ti panangitedna iti perpekto a biag ken darana, nagbalin a posible a magun-odtayo “ti pudpudno a biag,” ti “agnanayon a biag.” (1 Timoteo 6:12, 19; Efeso 1:7; 1 Juan 1:7) Nagbalin met a “biag” kadagiti minilion a natay a mapagungarto nga addaan iti namnama nga agbiag nga agnanayon iti Paraiso.Juan 5:28, 29.

Amintayo masapul a matarusan ken ipategtayo ti akem ni Jesus iti panggep ti Dios. Maragsakantay koma a mangammo iti ad-adu pay maipapan ken Jesus—“ti dalan ken ti kinapudno ken ti biag.”

Ammuem ti Ad-adu Pay

NAIMBAG A DAMAG MANIPUD ITI DIOS

Ania ti Panggep ti Dios Para iti Daga?

Ilawlawag ti Biblia no apay a pinarsua ti Dios ti daga, no kaano nga agpatingga ti panagsagaba, ken no ania ti agur-uray iti masanguanan para iti daga ken dagiti agnaed iti dayta.

TI PAGWANAWANAN

No Apay a Mapagtalkam Dagiti Ebanghelio ti Biblia

Usigem ti pammaneknek dagiti nagkauna a manuskrito.