Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ania a Talaga ti Isursuro ti Biblia?

 KAPITULO 17

Umadanika iti Dios Babaen ti Kararag

Umadanika iti Dios Babaen ti Kararag
  • Apay a rumbeng nga agkararagtayo iti Dios?

  • Ania ti masapul nga aramidentayo tapno ipangagnatayo ti Dios?

  • Kasano a sungbatan ti Dios dagiti kararagtayo?

Sidadaan a dumngeg kadagiti kararagtayo ti “Nangaramid iti langit ken daga”

1, 2. Apay a rumbeng nga ibilangtayo a naisangsangayan a pribilehio ti panagkararag, ken apay a nasken nga ammotayo ti isursuro ti Biblia maipapan iti kararag?

NAGBASSIT ti daga no idilig iti nakalawlawa nga uniberso. Kinapudnona, iti imatang ni Jehova, “ti Nangaramid iti langit ken daga,” mayarig dagiti nasion iti sangkatedted a danum manipud iti timba. (Salmo 115:15; Isaias 40:15) Nupay kasta, kuna ti Biblia: “Ni Jehova asideg kadagidiay amin nga umaw-awag kenkuana, kadagidiay amin nga umawag kenkuana iti kinapudno. Ti tarigagay dagidiay agbuteng kenkuana aramidennanto, ken ti panagpatulongda denggennanto.” (Salmo 145:18, 19) Panunotem ti kayat a sawen dayta! Asideg kadatayo ti mannakabalin-amin a Namarsua ket ipangagnatayo no ‘umawagtayo kenkuana iti kinapudno.’ Anian a pribilehio ti umadani iti Dios babaen ti kararag!

2 Ngem no kayattayo nga imdengan ni Jehova dagiti kararagtayo, masapul nga agkararagtayo kenkuana iti wagas nga anamonganna. Kasano a maaramidtayo daytoy malaksid no maawatantayo ti isursuro ti Biblia maipapan iti kararag? Nasken nga ammotayo ti isursuro ti Biblia maipapan iti daytoy a banag, ta ti kararag pasingedennatayo ken ni Jehova.

APAY NGA AGKARARAGTAYO KEN NI JEHOVA?

3. Ania ti maysa a napateg a makagapu no apay a rumbeng nga agkararagtayo ken ni Jehova?

3 Ti maysa a napateg a makagapu no apay a rumbeng nga  agkararagtayo ket aw-awisennatayo ni Jehova nga agkararag kenkuana. Paregtaennatayo ti Saona: “Dikay maringgoran iti aniaman, no di ket iti amin a banag babaen iti kararag ken araraw agraman panagyaman maipakaammo koma dagiti dawatyo iti Dios; ket ti talna ti Dios a mangringbaw iti isuamin a panunot saluadannanto dagiti pusoyo ken dagiti pannakabalin ti isipyo babaen ken Kristo Jesus.” (Filipos 4:6, 7) Ditay la ketdi kayat nga iyaleng-aleng ti kasta a naayat a probision nga impaay kadatayo ti Katan-okan nga Agturay iti uniberso!

4. Kasano a tumibker ti relasiontayo ken ni Jehova no kanayon nga agkararagtayo kenkuana?

4 Ti maysa pay a makagapu ket tumibker ti relasiontayo ken ni Jehova no kanayon nga agkararagtayo kenkuana. Saan la nga agsarita dagiti pudno nga aggayyem no adda masapulda. Imbes ketdi, maseknanda iti maysa ken maysa, ket suminged ti panaggayyemda no ipeksada ti pampanunot, pakaseknan, ken riknada iti maysa ken maysa. Kasta ti kayarigan ti relasiontayo ken ni Jehova a Dios. Iti tulong daytoy a libro, adun ti naadalmo maipapan iti isursuro ti Biblia maipanggep ken ni Jehova, iti personalidadna, ken dagiti panggepna. Naam-ammom kas maysa a pudno a persona. Babaen ti kararag,  maipeksam iti nailangitan nga Amam ti pampanunot ken kaunggan a rikriknam. No aramidem dayta, sumingedka ken ni Jehova.—Santiago 4:8.

ANIA DAGITI MASAPUL NGA ARAMIDENTAYO?

5. Ania ti mangipakita a saan nga amin a kararag ket imdengan ni Jehova?

5 Ipangag kadi ni Jehova ti amin a kararag? Utobem ti imbagana kadagiti nasukir nga Israelita idi kaaldawan ni propeta Isaias: “Uray no mamin-adu nga agkararagkayo, saanak nga umimdeng; dagiti mismo nga imayo napnoda iti panagibukbok iti dara.” (Isaias 1:15) No kasta, adda dagiti aramid a panggapuan ti Dios a di umimdeng kadagiti kararagtayo. Tapno ngarud ipangag ti Dios dagiti kararagtayo, adda dagiti nasken a banag a kalikagumanna kadatayo.

6. Tapno ipangag ti Dios dagiti kararagtayo, ania ti nasken unay, ket kasano a maipaneknektayo dayta?

6 Umuna unay, nasken nga adda pammatitayo. (Marcos 11:24) Insurat ni apostol Pablo: “No awan ti pammati isu di mabalin nga ay-aywen a naan-anay, ta ti umadani iti Dios masapul a patienna nga isu adda ken isu agbalin a mananggunggona kadagidiay sipapasnek a mangsapsapul kenkuana.” (Hebreo 11:6) Saan nga umdas ti basta panamati nga adda Dios, nga ipangag ken sungbatanna dagiti kararag. Ti pammati ket mapaneknekan kadagiti aramidtayo. Masapul a nalawag nga ipaneknektayo nga adda pammatitayo babaen ti inaldaw a panagbiagtayo.—Santiago 2:26.

7. (a) Apay a nadayaw koma ti pannakisaotayo ken ni Jehova babaen ti kararag? (b) No agkararagtayo iti Dios, kasano a maipakitatayo ti kinapakumbaba ken kinapasnek?

7 Kalikaguman met ni Jehova a dagidiay umadani nga agkararag kenkuana, agkararagda a sipapakumbaba ken sipapasnek. Saan kadi a rumbeng a napakumbabatayo no makisasaotayo ken ni Jehova? No adda gundaway dagiti tattao a makisao iti ari wenno presidente, nadayaw ti pannakisaritada, a bigbigenda ti nangato a saadna. Anianto  la ketdin no ni Jehova ti kasasaotayo! (Salmo 138:6) Ngamin, isu ti “Dios a Mannakabalin-amin.” (Genesis 17:1) No agkararagtayo iti Dios, ipamatmat koma ti wagas ti panagkararagtayo a sipapakumbaba a bigbigentayo no aniatayo iti imatangna. Ti kasta a kinapakumbaba tignayennatayo met nga agkararag a naimpusuan, a ditay basta ulit-uliten laeng dagiti kararagtayo.—Mateo 6:7, 8.

8. Kasano a makapagtignaytayo a maitunos iti ikarkararagtayo?

8 Ti sabali pay a kasapulan tapno ipangagnatayo ti Dios isu ti panagtignaytayo a maitunos kadagiti kararagtayo. Namnamaen ni Jehova nga ikagumaantayo nga aramiden ti ikarkararagtayo. Kas pagarigan, no ikararagtayo, “Itedmo kadakami ita nga aldaw ti tinapaymi nga agpaay itoy nga aldaw,” masapul nga igaedtayo ti agtrabaho sigun iti kabaelantayo. (Mateo 6:11; 2 Tesalonica 3:10) No agkararagtayo a dumawat iti tulong tapno maparmek ti maysa a pagkapuyan, masapul a liklikantayo dagiti kasasaad ken situasion a mabalin a mangiturong kadatayo iti sulisog. (Colosas 3:5) Malaksid kadagitoy a makalikaguman, adda dagiti saludsod maipapan iti kararag a nasken a masungbatan.

DAGITI SUNGBAT TI SUMAGMAMANO A SALUDSOD MAIPAPAN ITI KARARAG

9. Siasino ti rumbeng a pagkararagantayo, ken babaen iti siasino?

9 Siasino ti rumbeng a pagkararagantayo? Insuro ni Jesus dagiti pasurotna nga agkararag iti ‘Amatayo nga adda iti langlangit.’ (Mateo 6:9) Masapul ngarud a ni laeng Jehova a Dios ti pagkararagantayo. Nupay kasta, kalikaguman ni Jehova a bigbigentayo ti saad ti bugbugtong nga Anakna a ni Jesu-Kristo. Kas naadaltayo iti Kapitulo 5, naibaon ni Jesus ditoy daga tapno subbotennatayo manipud iti basol ken ipapatay. (Juan 3:16; Roma 5:12) Isu ti nadutokan a Nangato a Padi ken Ukom. (Juan 5:22; Hebreo 6:20) Gapuna, kuna ti Biblia nga agkararagtayo babaen ken ni Jesus. Kinuna a mismo ni Jesus: “Siak ti dalan ken ti kinapudno ken ti  biag. Awan ti umay iti Ama malaksid no baeten kaniak.” (Juan 14:6) Tapno maipangag dagiti kararagtayo, ni laeng Jehova ti pagkararagantayo babaen iti Anakna.

10. Apay nga awan ti makalikaguman a postura no agkararagtayo?

10 Ania ti rumbeng a posturatayo no agkararagtayo? Awan ti kalikaguman ni Jehova a masnup a postura. Isursuro ti Biblia a mabalin ti agkararag uray ania ti posturatayo. Mabalintayo ti agkararag a nakatugaw, nakadumog, nakaparintumeng, ken nakatakder. (1 Cronicas 17:16; Nehemias 8:6; Daniel 6:10; Marcos 11:25) Ti napateg ket saan a ti naisangsangayan a postura a makita dagiti sabsabali no di ket ti umiso a kasasaad ti puso. Kinapudnona, iti inaldaw nga aramidtayo wenno no rumsua ti di ninamnama a kasasaad, mabalintayo ti agkararag a siuulimek uray sadino ti ayantayo. Denggen ni Jehova dagiti kasta a kararag uray no saan a pulos a madlaw dagita dagiti adda iti aglawlawtayo.—Nehemias 2:1-6.

11. Ania dagiti personal a banag a mabalintayo nga ikararag?

11 Ania ti mabalintayo nga ikararag? Kuna ti Biblia: “Uray ania ti dawatentayo maitunos iti pagayatanna, denggennatayo [ni Jehova].” (1 Juan 5:14) Mabalintayo ngarud nga ikararag ti uray ania a mayannurot iti pagayatan ti Dios. Pagayatanna kadi nga ikararagtayo dagiti mismo a pakaseknantayo? Wen! Ti panagkararag ken ni Jehova ket mayarig iti pannakisarita iti nasinged a gayyem. Mabalintayo nga ibaga ti uray ania, nga ‘iparukpoktayo ti pusotayo’ iti Dios. (Salmo 62:8) Maitutop a dumawattayo iti nasantuan nga espiritu, ta tulongannatayo dayta nga agaramid iti umiso. (Lucas 11:13) Mabalintayo met ti dumawat iti pannarabay tapno makapagdesisiontayo iti umiso ken maaddaantayo iti bileg a mangsaranget kadagiti pakarigatan. (Santiago 1:5) No agbasoltayo, rumbeng a dumawattayo iti pammakawan maibatay iti daton ni Kristo. (Efeso 1:3, 7) Siempre, saan koma laeng a dagiti banag nga agpaay iti bagitayo ti ikararagtayo. Rumbeng met nga ikararagantayo dagiti sabsabali —dagiti kameng ti pamiliatayo ken dagiti kapammatiantayo.—Aramid 12:5; Colosas 4:12.

12. Kasano a maipangpangrunatayo nga ikararag dagiti banag maipapan iti nailangitan nga Amatayo?

12 Dagiti banag a mainaig ken ni Jehova a Dios ti kangrunaan koma nga ikararagtayo. Rumbeng a naimpusuan nga idaydayaw ken pagyamanantayo ni Jehova gapu iti amin a kinaimbagna. (1 Cronicas 29:10-13) Iti modelo a kararag nga impaay ni Jesus, a nailanad iti Mateo 6:9-13, insurona nga ikararagtayo ti pannakasantipikar ti nagan ti Dios, kayatna a sawen, maibilang a sagrado, wenno nasantuan. Simmaruno a nadakamat ti iyaay ti Pagarian ti Dios ken ti pannakaibanag ti pagayatanna ditoy daga a kas sadi langit. Sa la inraman ni Jesus dagiti personal a pakaseknan kalpasan a nadakamatna dagiti napateg a banag a mainaig ken ni Jehova. No ipangpangrunatayo met ti Dios kadagiti kararagtayo, ipakpakitatayo a saan laeng a ti bukodtayo a pagimbagan ti pampanunotentayo.

13. Ania ti ipasimudaag ti Biblia maipapan iti kaatiddog dagiti kararag nga ipangag ti Dios?

13 Kasano koma ti kaatiddog dagiti kararagtayo? Saan a kedngan ti Biblia ti kaatiddog dagiti personal a kararag wenno dagiti kararag iti publiko. Mabalin nga ababa ti kararag sakbay ti pannangan, ngem mabalin nga atiddog no ibukboktayo ken ni Jehova ti linaon ti pusotayo. (1 Samuel 1:12, 15) Nupay kasta, binabalaw ni Jesus dagiti aginsisingpet a tattao gapu kadagiti atiddog a kararagda iti imatang dagiti sabsabali. (Lucas 20:46, 47) Saan a makaay-ayo ken ni Jehova dagiti kasta a kararag. Ti napateg isu ti naimpusuan a panagkararag. No kasta, ti kaatiddog dagiti kararag nga ipangag ti Dios ket depende iti kasapulantayo ken iti kasasaad.

Mabalinmo ti agkararag uray kaano

14. Ania ti kayat a sawen ti Biblia iti panangiparegtana nga ‘agkararagtayo nga agpatpatuloy,’ ken apay a makaliwliwa daytoy?

14 Kasano koma kasansan nga agkararagtayo? Paregtaennatayo ti Biblia nga ‘agkararag nga agpatpatuloy,’ ‘reggetan  ti agkararag,’ ken ‘agkararag a di agressat.’ (Mateo 26:41; Roma 12:12; 1 Tesalonica 5:17) Siempre, dina kayat a sawen a masapul nga agmalmalem nga agkarkararagtayo ken ni Jehova. Imbes ketdi, idagdagadag ti Biblia nga agkararagtayo a regular, a kanayon nga agyamantayo ken ni Jehova gapu iti kinaimbagna ken idawattayo nga iwanwan, liwliwaen, ken pakirdennatayo. Saan kadi a makaliwliwa a maammuan a saan a kedngan ni Jehova ti kapaut wenno kasansan ti panagkararagtayo kenkuana? No talaga nga apresiarentayo ti pribilehiotayo nga agkararag, adu dagiti gundaway a mabalintayo ti agkararag iti nailangitan nga Amatayo.

15. Apay a rumbeng nga ibagatayo ti “Amen” iti ngudo dagiti personal a kararag ken dagiti kararag iti publiko?

15 Apay a rumbeng nga ibagatayo ti “Amen” iti ngudo ti kararag? “Awan duadua” wenno “sapay koma” ti kayat a sawen ti “amen.” Ipakita dagiti pagarigan iti Biblia a maitutop nga ibaga ti “Amen” iti ngudo dagiti personal a kararag ken dagiti kararag iti publiko. (1 Cronicas 16:36; Salmo 41:13) No “Amen” kunatayo iti ngudo ti kararagtayo, patpatalgedantayo a naimpusuan dagiti imbalikastayo. No “Amen” kunatayo—naulimek man wenno napigsa—iti ngudo ti kararag nga inyebkas ti sabali, ipampamatmattayo nga umanamongtayo iti imbagana.—1 Corinto 14:16.

NO KASANO A SUNGBATAN TI DIOS DAGITI KARARAGTAYO

16. Ania ti mainanamatayo maipapan iti kararag?

16 Talaga kadi a sungbatan ni Jehova dagiti kararag? Wen! Mainanamatayo unay a ti “Managdengngeg iti kararag” sungbatanna dagiti napasnek a kararag dagiti riniwriw a tattao. (Salmo 65:2) Mabalin a nadumaduma a pamay-an ti panangsungbat ni Jehova kadagiti kararagtayo.

17. Apay a maikuna nga us-usaren ti Dios dagiti anghel ken dagiti adipenna ditoy daga a mangsungbat kadagiti kararagtayo?

17 Us-usaren ni Jehova dagiti anghel ken dagiti adipenna  ditoy daga a mangsungbat kadagiti kararag. (Hebreo 1:13, 14) Adu dagiti kapadasan maipapan kadagiti tattao a nangikararag iti tulong ti Dios tapno maawatanda ti Biblia ket di nagbayag sinarungkaran ida ti maysa kadagiti adipen ni Jehova. Paneknekan dagiti kasta a kapadasan nga iturturong dagiti anghel ti trabaho a panangikasaba iti Pagarian. (Apocalipsis 14:6) Mabalin a sungbatan ni Jehova dagiti kararagtayo iti tiempo a masapultayo unay ti tulong babaen ti panangtignayna iti maysa a Kristiano a mangsaranay kadatayo.—Proverbio 12:25; Santiago 2:16.

Kas sungbat kadagiti kararagtayo, mabalin a tignayen ni Jehova ti maysa a Kristiano a tumulong kadatayo

18. Kasano nga us-usaren ni Jehova ti nasantuan nga espirituna ken ti Saona a mangsungbat kadagiti kararag dagiti adipenna?

 18 Us-usaren met ni Jehova a Dios ti nasantuan nga espirituna ken ti Saona, ti Biblia, a mangsungbat kadagiti kararag dagiti adipenna. No dumawattayo iti tulong tapno masarangettayo dagiti pakasuotan, mabalin nga iwanwan ken pabilgennatayo babaen ti nasantuan nga espirituna. (2 Corinto 4:7) Masansan nga aggapu iti Biblia ti sungbat kadagiti kararagtayo, ta babaen iti dayta tulongannatayo ni Jehova a mangaramid kadagiti nainsiriban a desision. Mabalin a makasaraktayo kadagiti makatulong a teksto iti personal a panagadaltayo iti Biblia ken iti panagbasatayo kadagiti Nakristianuan a publikasion a kas iti daytoy a libro. No tumabunotayo iti gimong ti kongregasion wenno makisaritatayo iti maseknan a panglakayen, mabalin a maipalagip kadatayo dagiti Nainkasuratan a punto a nasken nga usigentayo.—Galacia 6:1.

19. Ania ti laglagipentayo no adda panawen a kasla saan a masungsungbatan dagiti kararagtayo?

19 No saan a sungbatan a dagus ni Jehova dagiti kararagtayo, dina kayat a sawen a saanna a kabaelan a sungbatan dagita. Imbes ketdi, masapul a laglagipentayo a sungbatan ni Jehova dagiti kararag a mayannurot iti pagayatanna ken iti tiempo nga intudingna. Ad-adda nga ammona no ania ti masapultayo ken no kasano nga ipaayna dagita. Masansan a bay-anna nga ‘itultuloytayo ti agdawat,  agsapul, ken agtuktok.’ (Lucas 11:5-10) Ti kasta a kinapinget ipamatmatna iti Dios a nasged ti tarigagaytayo ken talaga nga adda pammatitayo. Maysa pay, mabalin a sungbatan ni Jehova dagiti kararagtayo a ditay mapupuotan. Kas pagarigan, imbes nga ilisinatayo iti pakasuotan, mabalin a sungbatanna ti kararagtayo babaen ti panangpabilegna kadatayo a mangibtur iti dayta.—Filipos 4:13.

20. Apay a rumbeng nga aprobetsarentayo ti nagpateg a pribilehio nga agkararag?

20 Anian a yamantayo ta ti Namarsua iti nakalawlawa nga uniberso ket asideg kadagiti amin nga agkararag kenkuana iti umiso a pamay-an! (Salmo 145:18) Sapay koma ta aprobetsarentayo daytoy a nagpateg a pribilehio. No kanayontayo nga agkararag, ad-adda a sumingedtayo ken ni Jehova, daydiay Agdengdengngeg iti kararag.

Ammuem ti Ad-adu Pay

Talaga Kadi a ‘Makaadanika iti Dios’?

Adda awis ken kari kadatayo ni Jehova a Dios, ti Namarsua iti langit ken daga.