Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ania a Talaga ti Isursuro ti Biblia?

 APENDISE

Rumbeng Kadi a Rambakantayo Dagiti Piesta?

Rumbeng Kadi a Rambakantayo Dagiti Piesta?

SAAN a namunganay iti Biblia dagiti narelihiosuan a piesta ken piesta opisial a gagangay a maramrambakan iti adu a paset ti lubong ita. Ania ngarud ti nagtaudanda? No makapanka iti libraria, matakuatam a makapainteres ti kuna dagiti reperensia a libro maipapan kadagiti piesta a gagangay iti lugaryo. Usigem ti sumagmamano a pagarigan.

 Easter Wenno Domingo Paskua. Kuna ti The Encyclopædia Britannica: “Awan ti pammaneknek iti Baro a Tulag maipapan iti pannakarambak ti Easter.” Ania aya ti nangrugian ti Easter? Namunganay dayta iti napaganuan a panagdayaw. Nupay daytoy a piesta ti mangipalagip kano iti panagungar ni Jesus, saan a Nakristianuan dagiti kaugalian a nainaig iti panawen ti Easter. Kas pagarigan, maipapan iti koneho a maar-aramat iti Easter, kuna ti The Catholic Encyclopedia: “Napaganuan a simbolo ti koneho ket manipud pay idi ugma a maus-usar dayta kas simbolo ti kinabunga [no maipapan iti panaganak].”

Panangrambak iti Baro a Tawen. Saan nga agpapada ti petsa a pannakarambak ti Baro a Tawen ken dagiti kaugalian a mainaig iti dayta iti nadumaduma a pagilian. Maipapan iti nagtaudan daytoy a selebrasion, kuna ti The World Book Encyclopedia: “Ti Romano nga emperador a ni Julius Caesar intudingna ti Enero 1 a kas Aldaw ti Baro a Tawen idi 46 K.K.P. Indaton dagiti Romano daytoy nga aldaw ken ni Janus, ti dios dagiti pagserkan, ruangan, ken pangrugian. Ti bulan ti Enero [wenno, January iti Ingles] ket naipasurot iti nagan ni Janus, nga addaan dua a rupa—adda iti sango ti maysa ket adda iti likud ti maikadua.” No kasta, namunganay kadagiti tradision dagiti pagano ti panangrambak iti Baro a Tawen.

Halloween Wenno Bisperas ti Todos los Santos. Kuna ti The Encyclopedia Americana: “Dagiti kaugalian iti Halloween ket nagtaud iti seremonia dagiti Druid [dagiti papadi ti nagkauna a Celt] sakbay pay ti panawen dagiti Kristiano. Addaan dagiti Celt kadagiti piesta para kadagiti dua a kangrunaan a didiosenda—ti dios nga init ken ti dios dagiti natay . . . , a narambakan ti piestana iti Nobiembre 1, ti pangrugian ti Baro a Tawen dagiti Celt. Ti piesta dagiti natay ket nagin-inut a naitipon iti ritual dagiti Kristiano.”

Dadduma pay a Piesta. Ditay masalaysay amin dagiti piesta a maramrambakan iti intero a lubong. Nupay kasta, saan a makaay-ayo ken ni Jehova dagiti piesta a mangitan-ok kadagiti tattao wenno organisasion dagiti tattao. (Jeremias 17:5-7; Aramid 10:25, 26) Laglagipem met a ti namunganayan dagiti narelihiosuan a piesta ti mangikeddeng no makaay-ayo dagita iti Dios wenno saan. (Isaias 52:11; Apocalipsis 18:4) Dagiti prinsipio ti Biblia a nadakamat iti Kapitulo 16 daytoy a libro tulongannaka a mangammo no kasano a matmatan ti Dios ti pannakipaset kadagiti piesta opisial.