Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ania a Talaga ti Isursuro ti Biblia?

 APENDISE

No Kasano nga Impadto ni Daniel ti Panagparang ti Mesias

No Kasano nga Impadto ni Daniel ti Panagparang ti Mesias

NAGBIAG ni propeta Daniel nasurok a 500 a tawen sakbay ti pannakayanak ni Jesus. Nupay kasta, ni Jehova adda impalgakna ken ni Daniel a tumulong a mangipakita no kaano a napulotan wenno nadutokan ni Jesus kas Mesias, wenno Kristo. Naikuna ken ni Daniel: “Rebbeng nga ammuem ken maaddaanka  iti pannakatarus a manipud iruruar ti sao a mangisubli ken mangbangon manen iti Jerusalem agingga iti Mesias a Panguluen, addanto pito a lawas, kasta met innem a pulo ket dua a lawas.”—Daniel 9:25.

Tapno maammuam no kaano a nagparang ti Mesias, masapul nga ammuentayo nga umuna no kaano a mangrugi ti panawen a palabsen agingga iti panagparang ti Mesias. Sigun iti padto, mangrugi dayta “manipud iruruar ti sao a mangisubli ken mangbangon manen iti Jerusalem.” Kaano a ‘nairuar ti sao’? Sigun iti mannurat iti Biblia a ni Nehemias, naibilin ti pannakabangon manen dagiti bakud ti Jerusalem “iti maikaduapulo a tawen ni Artaxerxes nga  ari.” (Nehemias 2:1, 5-8) Pasingkedan dagiti historiador a ti umuna a tawen ti panagturay ni Artaxerxes ket idi 474 K.K.P. No kasta, ti maika-20 a tawen ti panagturayna ket idi 455 K.K.P. Idi ngarud 455 K.K.P. a nangrugi a matungpal ti padto ni Daniel maipapan iti Mesias.

Ipakita ti libro a Daniel ti kapaut ti panawen a palabsen agingga iti panagparang ti “Mesias a Panguluen.” Dinakamat ti padto ti “pito a lawas, kasta met innem a pulo ket dua a lawas”—agdagup iti 69 a lawas. Kasano ti kapaut daytoy a panawen? Kuna ti adu a patarus ti Biblia a dagitoy ket saan a lawas a buklen ti sagpipito nga aldaw, no di ket lawas ti tawtawen. Kayatna a sawen, pito a tawen ti kaibatogan ti tunggal lawas. Gagangay kadagiti nagkauna a Judio ti maipapan iti lawas ti tawtawen, wenno sagpipito a tawen. Kas pagarigan, ngilinenda idi ti Sabbath iti kada maikapito a tawen. (Exodo 23:10, 11) Gapuna, ti naipadto a 69 a lawas ket mamin-69 a pito a tawen, wenno agdagup iti 483 a tawen.

Agbilang laengen ti aramidentayo. No agbilangtayo manipud 455 K.K.P., agpatingga ti 483 a tawen iti 29 K.P. Dayta ti eksakto a tawen a pannakabautisar ken panagbalin ni Jesus a Mesias! * (Lucas 3:1, 2, 21, 22) Saan aya a nakaskasdaaw dayta a kaitungpalan ti padto ti Biblia?

^ par. 2 Manipud 455 K.K.P. agingga iti 1 K.K.P., 454 a tawen. Manipud 1 K.K.P. agingga iti 1 K.P., maysa a tawen (awan ti tawen a zero). Ket manipud 1 K.P. agingga iti 29 K.P., 28 a tawen. No dagupen, 483 a tawen. ‘Nagessat,’ wenno natay, ni Jesus idi 33 K.P., iti maika-70 a lawas ti tawtawen. (Daniel 9:24, 26) Kitaem ti Ipangagyo ti Padto ni Daniel! kapitulo 11, ken ti Insight on the Scriptures, Tomo 2, panid 899-901. Agpada nga impablaak dagitoy dagiti Saksi ni Jehova.