Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ania a Talaga ti Isursuro ti Biblia?

 APENDISE

No Ania ti “Babilonia a Dakkel”

No Ania ti “Babilonia a Dakkel”

NAGLAON ti libro nga Apocalipsis kadagiti sasao a saan a literal ti kaipapananda. (Apocalipsis 1:1) Kas pagarigan, dakamatenna ti maysa a babai nga iti mugingna naisurat ti nagan a “Babilonia a Dakkel.” Naikuna a nakatugaw daytoy kadagiti ‘bunggoy ken nasion.’ (Apocalipsis 17:1, 5, 15) Yantangay awan ti literal a babai a makaaramid iti kastoy, simboliko ngarud ti Babilonia a Dakkel. Ania ti iladladawan daytoy a simboliko a balangkantis?

Iti Apocalipsis 17:18, nailadawan ti isu met laeng a piguratibo a babai kas “ti dakkel a siudad nga addaan pagarian iti ar-ari ti daga.” Ti termino a “siudad” ipasimudaagna ti organisado a grupo dagiti tattao. Yantangay iturayan daytoy “dakkel a siudad” dagiti “ar-ari ti daga,” ti babai a maawagan Babilonia  a Dakkel ket maysa la ketdi a nabileg a sangalubongan nga organisasion. Maitutop ngarud a maawagan daytoy iti sangalubongan nga imperio. Ania a kita ti imperio? Narelihiosuan. Imutektekam no kasano nga iturongnatayo iti dayta a konklusion dagiti mainaig a sasao iti libro nga Apocalipsis.

Mabalin a napolitikaan, nakomersialan, wenno narelihiosuan ti maysa nga imperio. Saan a napolitikaan nga imperio ti babai a managan Babilonia a Dakkel agsipud ta kuna ti Sao ti Dios a ‘nakiabig’ kenkuana dagiti “ar-ari ti daga,” wenno dagiti napolitikaan nga elemento ditoy lubong. Ti pannakialiansana kadagiti agtuturay ditoy daga ti kayat a sawen ti pannakiabigna, isut’ gapuna a maawagan iti “dakkel a balangkantis.”—Apocalipsis 17:1, 2; Santiago 4:4.

Saan met a mabalin a nakomersialan nga imperio ti Babilonia a Dakkel agsipud ta dagiti “komersiante iti daga,” a mangirepresentar kadagiti nakomersialan nga elemento, dung-awandanto ti pannakadadaelna. Kinapudnona, agpada a nailadawan nga adda “iti adayo” dagiti ar-ari ken dagiti komersiante a kumitkita iti Babilonia a Dakkel. (Apocalipsis 18:3, 9, 10, 15-17) Maitutop ngarud a kunaen a ti Babilonia a Dakkel ket saan a napolitikaan wenno nakomersialan nga imperio no di ket narelihiosuan.

Nadakamat pay nga al-allilawen ti Babilonia a Dakkel dagiti nasion babaen iti ‘espiritistiko nga aramidna,’ a mangpasingked a narelihiosuan nga imperio daytoy. (Apocalipsis 18:23) Yantangay adda pakainaiganna iti relihion ken nagtaud kadagiti demonio ti amin a kita ti espiritismo, di pakasdaawan nga inawagan ti Biblia ti Babilonia a Dakkel a “lugar a pagnaedan dagiti sairo.” (Apocalipsis 18:2; Deuteronomio 18:10-12) Nailadawan pay daytoy nga imperio a sipipinget a bumusbusor iti pudno a relihion, nga idaddadanesna “dagiti mammadto” ken “dagiti sasanto.” (Apocalipsis 18:24) Kinapudnona, gapu iti nakaro a gura ti Babilonia a Dakkel iti pudno a relihion, sidadangkok nga idaddadanes ken pappapatayenna pay ketdi “dagiti saksi ni Jesus.” (Apocalipsis 17:6) Nalawag ngarud a daytoy babai a managan Babilonia a Dakkel itakderanna ti sangalubongan nga imperio ti palso a relihion, a pakairamanan dagiti amin a relihion a bumusbusor ken ni Jehova a Dios.