Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Isuroyo Dagiti Annakyo

 LEKSION 7

Malidliday ken Mabutbutengka Kadi no Dadduma?

Malidliday ken Mabutbutengka Kadi no Dadduma?

Kitaem ti ubing iti ladawan. Kasla malidliday ken mabutbuteng, ania? Napadasam met kadin dayta?— Malidliday ken mabutbutengtayo met no dadduma. Ibaga ti Biblia a nagliday ken nagbuteng met dagiti gagayyem ni Jehova. Maysa kadakuada ni Elias. Ammuenta ti maipapan kenkuana.

Kayat ni Jezebel a patayen ni Elias

Adu a tawenen ti napalabas idi nagbiag ni Elias iti nasion ti Israel sakbay pay a nayanak ni Jesus. Ni Acab idi ti ari ti Israel ken saan nga agdaydayaw iti pudno a Dios a ni Jehova. Agdaydayawda ken baketna a Jezebel iti didiosen a ni Baal. Gapu iti dayta, nagdayaw metten ken Baal ti kaaduan nga Israelita. Nakadakdakes ni Reyna Jezebel ken kayatna a patayen amin nga agdaydayaw ken Jehova pati ni Elias. Ammom kadi no ania ti inaramid ni Elias?—

Pimmanaw! Napan iti desierto ken naglemmeng iti maysa a kueba. Apay ngata  nga inaramidna dayta?— Wen, mabuteng ngamin. Ngem saan a rumbeng nga agbuteng. Apay? Ngamin ammona nga isu ket tulongan ni Jehova. Nakita idin ni Elias ti pannakabalin ni Jehova. Sinungbatan idin ni Jehova ti kararagna babaen iti apuy manipud langit. Kabaelan ngarud a tulongan ni Jehova ni Elias!

Kasano a tinulongan ni Jehova ni Elias?

Idi adda ni Elias iti kueba, dinamag kenkuana ni Jehova: ‘Ania ti ar-aramidem dita?’ Simmungbat ni Elias: ‘Siak laengen ti nabati nga agdaydayaw kenka. Awanen ti kaduak ken mabutengak ta patayendak.’ Ti ammo ni Elias ket natay aminen nga agdaydayaw ken Jehova. Ngem imbaga ni Jehova: ‘Saan nga agpayso dayta. Adda pay 7,000 a tattao nga agdaydayaw kaniak. Dika agbuteng. Adu pay ti ipaaramidko kenka!’ Naragsakan ngata ni Elias idi nangngegna dayta?—

Ania ti maadalmo iti estoria maipapan ken Elias?— Dika koma malidayan ken mabuteng. Adda dagiti gagayyemmo a mangay-ayat ken Jehova, ken mangay-ayat kenka. Laglagipem a nakabilbileg ni Jehova, isu a kanayon a matulongannaka! Maragsakanka kadi no maammuam a saanka gayam nga agmaymaysa?—