Mapan iti linaonna

Mapan iti listaan dagiti linaonna

 LEKSION 13

Dakes ti Panagsalamangka ken Panagpadles

Dakes ti Panagsalamangka ken Panagpadles

Kayat ni Satanas nga agsalamangkaka. Adu ti agatang kadagiti inapoda wenno kadagiti espiritu tapno masalaknibanda manipud pannakadangran. Aramidenda daytoy gapu ta kabutengda ti pannakabalin dagiti espiritu. Agusarda kadagiti anib a singsing wenno pulseras. Uminum wenno iyaprosda iti bagida dagiti “agas” a maipagarup nga addaan galinggaling. Dadduma a tattao ilemmengda iti balbalayda wenno ikalida, dagiti bambanag a patienda a makasalaknib. Dadduma agusarda iti “sapsapo” ta patienda a pagballigienna ida iti negosio, eksamen iti eskuelaan, wenno iti panaginnarem.

Ti pannakigayyemmo ken Jehova ti kasayaatan a salaknibmo a maibusor ken Satanas. Nabilbileg nga amang ni Jehova a Dios ken dagiti anghelna ngem ni Satanas ken dagiti demoniona. (Santiago 2:19; Apocalipsis 12:9) Magagaran ni Jehova a mangipakita iti bilegna maigapu kadagiti gagayyemna​—dagidiay naan-anay a nasungdo kenkuana.​—2 Cronicas 16:9.

Kuna ti Sao ti Dios: ‘Dikay agsalamangka.’ Kondenaren ni Jehova ti panagsalamangka ken panagpadles agsipud ta dagita nga ar-aramid ipasidongna ti maysa a tao iti pannakabalin ni Satanas a Diablo.​—Levitico 19:26.