Mapan iti linaonna

Mapan iti listaan dagiti linaonna

 ESTORIA 37

Ti Tolda a Pagdaydayawan

Ti Tolda a Pagdaydayawan

AMMOM kadi no ania daytoy a patakder? Isut’ naisangsangayan a tolda a pagdaydayawan ken Jehova. Isut’ maaw-awagan met ti tabernakulo. Nalpas nga impatakder dayta dagiti tattao iti makatawen kalpasan ipapanawda idiay Egipto?

Idi adda idiay Bantay Sinai ni Moises, imbaga ni Jehova kenkuana no kasano ti panangaramid iti tabernakulo. Imbagana nga aramidenna dayta tapno nalaka a pagsisinaen. Isu nga no umakar dagiti Israelitas iti nadumaduma a luglugar idiay let-ang, maitugotda ti tolda kadakuada.

No kumitaka idiay uneg ti bassit a kuarto idiay ungto ti tolda, makakitaka ti kahon. Daytoy ti maaw-awagan lakasa ti tulag. Iti sinanpungtona, addaan anghel wenno kerubin a balitok. Insurat manen ti Dios ti Sangapulo a Bilbilin iti dua a tapi dagiti bato kalpasan panangbuong ni Moises kadagiti immuna. Dagitoy ti naidulin iti lakasa ti tulag, agraman ti maysa garapon a mana. Malagipmo pay kadi daydiay mana?

Pinili ti Dios ni Aaron a kabsat ni Moises nga agbalin a nangato a padi. Idauloanna dagiti tattao nga agdayaw ken Jehova. Dagiti annakna a lallaki ti papadida met.

Ita kitaem ti dakdakkel a kuarto iti tolda. Makitkitam kadi ti kahon nga adda rumrummuar nga asukna? Isu daytoy ti altar a pagpupuoran dagiti papadi ti nabanglo a banag a maaw-awagan insenso. Sa adda met ti kandelero a pito ti pagsilawanna, ken ti lamisaan nga adda 12 a tinapay iti rabawna.

Idiay paraangan ti tabernakulo adda dakkel a palanggana, wenno malukong, a napunno ti danum. Us-usaren daytoy dagiti papadi a pagbuggoan. Adda met dakkel nga altar a pakapuoran dagiti natay nga an-animal kas daton ken Jehova. Ti tolda ti adda idiay tengnga ti kampamento. Dagiti Israelitas ti aggigianda kadagiti toldada iti agliklikmutna.