Mapan iti linaonna

Mapan iti listaan dagiti linaonna

 ESTORIA 38

Ti 12 nga Espia

Ti 12 nga Espia

KITAEM ti bunga nga aw-awiten dagitoy a lallaki. Kitaem ti kadakkel dayta raay ti ubas! Sadino ti naggapuan daytoy nagpintas a bunga? Manipud daga ti Canaan. Laglagipem a ti Canaan ti naggigianan idi da Abraham, Isaac ken Jacob. Idadaulo ni Moises dagiti Israelitas nga agsubli idiay. Nakagtengda iti maysa a lugar idiay let-ang a maaw-awagan Cades.

Dakes a tattao ti aggigian idiay daga ti Canaan. Gapuna a nangibaon ni Moises ti 12 nga espia tapno maammuan no kasano kapigsa dagiti tattao ken no kasano kapintas di daga a pagmulaan.

Idi nagsubli dagiti espia, imbagada ken Moises: ‘Talaga a nagpintas a lugar.’ Ket tapno mapaneknekan impakitada ken Moises ti dadduma kadagiti prutas. Ngem 10 kadagiti espia ti nagkuna: ‘Dagiti tattao idiay ti dadakkel ken napigsada. Mataytayo no padpadasentayo nga alaen ti daga.’

Daytoy ti nangpabuteng kadagiti Israelitas. ‘Mataytayo iti gubat,’ kunada. ‘Agawendanto dagiti assawa ken annaktayo. Mangpilitay ti baro a pangulo a sumukat ken Moises, ket agsublitayo idiay Egipto.’

Ngem dua kadagiti espia ti nagtalek ken Jehova. Isuda da Josue ken Caleb. Kunada: ‘Dikay agbuteng. Adda ni Jehova kadatayo. Nalaka nga alaen ti daga.’ Ngem saan a dimngeg dagiti tattao. Kayatda a papatayen da Josue ken Caleb.

Daytoy ti namagpungtot ken Jehova. Kunana ken Moises: ‘Awan kadagiti tattao manipud 20 ti tawenna ken natataengan pay ti makastrek idiay daga ti Canaan. Nakitada dagiti milagro nga inaramidko idiay Egipto ken idiay let-ang ket kaskasdi a saanda nga agtalek kaniak. Gapuna agalla-alladanto idiay let-ang ti 40 a tawtawen agingga a matay ti kaudian a tao. Ni laeng Josue ken Caleb ti makastrek idiay daga ti Canaan.’