Mapan iti linaonna

Mapan iti listaan dagiti linaonna

Dagiti Demonio Siuulbod a Kunaenda a dagiti Natay Sibibiagda

Dagiti Demonio Siuulbod a Kunaenda a dagiti Natay Sibibiagda

Ti Biblia kunaenna a ni Satanas “al-allilawenna ti intero a mapagnaedan a daga.” (Apocalipsis 12:9) Saan a kayat ni Satanas ken dagiti demoniona a mamatitayo iti Sao ti Dios, ti Biblia. Pagbalinenda dagiti tattao a mamati a dagiti natay sibibiagda iti maysa a lugar idiay yan dagiti espiritu. Intay kitaen no kasano nga aramidenda dayta.

Ulbod a Relihion

Dagiti tattao, an-animal, ikan, ken tumatayab—aminda ket kararuada

Adu a relihion isursuroda a ti tunggal tao addaan ti kararua a mapan idiay lugar dagiti espiritu kalpasan ti ipapatay ti pisikal a bagi. Kunada a matay ti bagi ngem ti kararua saan a matay. Mainayon pay, isursuroda a ti kararua di pulos matay, a dayta ket imortal.

Ngem ti Sao ti Dios dina isursuro dayta. Ipakita ti Biblia a ti kararua isu ti tao, saan a banag nga adda iti uneg ti tao. Kas pangarigan, iti panangiladawanna ti pannakaparsua ni Adan, kuna ti Biblia: “Ket ni Jehova a Dios binukelna ti tao iti tapuk ti daga ket impuyotna iti agongna ti anges ti biag, ket ti tao nagbalin a kararua a sibibiag.” (Genesis 2:7) Gapuna ni Adan saan a naikkan iti maysa a kararua; isu ket maysa a kararua.

Dagiti animal naawaganda met a kararua.—Genesis 1:20, 21, 24, 30.

 Yantangay ti sao iti Biblia a “kararua” kaipapananna ti tao a mismo, rebbeng a saan a mamagsiddaaw kadatayo a makaadal a dagiti kararua mabalin ken talaga a matayda. Kuna ti Kasuratan:

  • “Ti kararua nga agbasol—isu a mismo matayto.”Ezequiel 18:4.

  • “Ket ni Samson kinunana: ‘Bay-am a matay ti kararuak agraman kadagiti Filisteos.’”—Oc-ocom 16:30.

  • “Maiparbeng kadi iti sabbath ti panagaramid iti naimbag wenno panagaramid iti dakes, ti panangisalakan wenno panangpapatay iti kararua?”Marcos 3:4.

Ipakita ti Biblia a ti kararua ket saan nga imortal

Dadduma pay a kasuratan ipakitada a dagiti kararua ket madadaelda (Genesis 17:14), mapapatayda babaen ti kampilan (Josue 10:37), maangsanda (Job 7:15), ken malmesda (Jonas 2:5). No kasta, ti kararua matay.

No basaenyo ti Biblia nga interamente, pulos a diyonto masarakan ti sasao nga “imortal a kararua.” Ti natauan a kararua ket saan nga espiritu. Ti sursuro iti imortal a kararua ket saan a sursuro ti Biblia. Dayta ket sursuro ni Satanas ken dagiti demoniona. Kagura ni Jehova ti amin a narelihiusuan a kinaulbod.—Proverbio 6:16-19; 1 Timoteo 4:1, 2.

 Dagiti Medium ti Espiritu

Dagiti demonio aktual a nagpammarangda kas dagiti espiritu dagiti natay

Ti sabali pay a pamay-an nga allilawen ni Satanas dagiti tattao ket babaen kadagiti medium. Ti medium ket maysa a tao a kabaelanna nga awaten dagiti mensahe a direkta manipud iti lubong dagiti espiritu. Ti dakkel a bilang dagiti tattao, agraman dagiti medium a mismo, mamatida a dagitoy a mensahe aggapuda kadagiti espiritu dagiti natay. Ngem kas nakitatayon manipud iti Biblia, daytoy ket imposible.—Eclesiastes 9:5, 6, 10.

Asinoda, ngarud, ti paggapuan dagitoy a mensahe? Dagiti demonio a mismo! Kabaelan a paliiwen dagiti demonio ti maysa a tao no sibibiag pay; ammoda no kasano a nagsao dayta a tao, no ania ti langana, no ania ti inaramidna, ken no ania ti ammona. Gapuna nakalaklaka para kadakuada a tuladen dagiti tattao a natayen.—1 Samuel 28:3-19.

 Dagiti Palso nga Estoria

Ti sabali pay a pamay-an a panangparang-ay ni Satanas ti kinaulbod maipapan kadagiti natay ket babaen kadagiti palso nga estoria. Dagiti kakasta nga estoria masansan a pagtallikudenda dagiti tattao manipud iti kinapudno ti Biblia.—2 Timoteo 4:4.

Dadduma pagarupenda a nakakitada kadagiti tattao a nagsubli manipud kadagiti natay

Idiay Africa addada adu a sarsarita maipapan kadagiti tattao a nakita a sibibiag kalpasan a nataydan. Kadawyanna, dagiti kakasta a buya ket naar-aramidda iti adayo manipud lugar a nagnaedan ti tao. Ngem imtuodenyo ti bagiyo: ‘Rasonable aya a no ti maysa a tao addaan ti pannakabalin nga agsubli manipud kadagiti natay, agsubli iti lugar nga adayo iti pamiliana ken dagiti gagayyemna?’

Kasta met, saan ngata a dayta a tao a nakita ket kaing-ingasna laeng ti tao a natayen? Kas pangarigan, dua a Kristiano a ministro a mangaskasaba iti maysa nga away nadlawda ti maysa a lakay a nangsursurot kadakuada iti sumagmamano nga orasen. Idi a pinagsaludsodanda, naammuanda a ti tao impagarupna a maysa kadagiti ministro ket isu ti kabsatna a lalaki a natayen sumagmamano a tawen ti napalabasen. Siempre, isut’ nagkamali, ngem nagkedked a mamati nga isut’ nagkamali. Panunotenyo laengen ti estoria nga imbaga ti lakay iti naud-udi  kadagiti gagayyemna ken kaarrubana!

Dagiti Sirmata, Tagtagainep, ken Timek

Dagiti demonio mangal-allilawda babaen kadagiti tagtagainep, sirmata, ken timek

Awan duadua ammoyo ti maipapan kadagiti karkarna a bambanag a nakitan dagiti tattao, nangngeg, wenno natagtagainepda. Dagiti kakasta a supernatural a kapadasan masansan mangpabuteng kadagidiay addaan kadagita. Ni Marein, a nagnaed idiay Makinlaud nga Africa, regular a nangngegna ti timek ti natayen a lelangna nga umaw-awag kenkuana iti rabii. Mabutbuteng, agikkis ni Marein, a mariingna ti intero a sangakabbalayanna. Idi agangay napukawna ti simbeng ti panunotna.

Ita, no dagiti natay ket talaga a sibibiagda, rasonable kadi a butbutngenda dagiti ay-ayatenda? Siempre saan. Ti gubuayan ti kakasta a makasakit a mensahe isu dagiti demonio.

Ngem dagiti met ngay mensahe a kasla makatulong ken makaliwliwa? Kas pangarigan, ni Gbassay, a taga Sierra Leone, ket nagsakit. Nagtagtagainep a sadiay nagparang ti natayen a tatangna. Isut’ binilinna a mapan iti maysa a kayo, mangala iti maysa a bulong, ilaokna iti danum, ket inumenna dayta. Saan a makisasao iti asinoman sakbay nga aramidenna dayta. Inaramidna daytoy ket immimbag.

Sabali pay a babai ti nagkuna a ti asawana nagparang kenkuana iti maysa a rabii kalpasan a natay.  Kinuna ti babai a ti asawana ket nagsayaat ti langana ken napintas ti suotna a kawes.

Dagiti kakasta a mensahe ken sirmata kasla naimbagda ken makatulongda. Aggapuda aya iti Dios? Saan, saanda a kasta. Ni Jehova isu “ti Dios ti kinapudno.” (Salmo 31:5) Pulos a di umanamong iti panangallilaw kadatayo. Dagiti laeng demonio ti mangaramid iti dayta.

Ngem addada aya naimbag a demonio? Awan. Nupay kasla manangtulongda no dadduma, aminda ket dakes. Idi nakisao ti Diablo ken Eva, kasla isut’ mannakigayyem. (Genesis 3:1) Ngem aniat’ nagresulta kenkuana kalpasan a dimngeg kenkuana ken inaramidna ti imbagana? Isut’ natay.

Ni Satanas imbagana ken Eva a saanto a matay. Namati ni Eva kenkuana, ngem idi agangay isu natay

Pagaammoyo a gagangay a mannakigayyem ti maysa a dakes a tao kadagidiay tarigagayanna nga allilawen ken kusiten. “Puraw a ngipen, nangisit a puso,” kuna ti Africano a proverbio. Ken kunaen ti Sao ti Dios: “Ni Satanas balbaliwanna ti bagina a kasla anghel ti lawag.”—2 Corinto 11:14.

Saanen a makisao ti Dios kadagiti tattao ditoy daga babaen kadagiti tagtagainep, sirmata, wenno timek nga aggapu iti lubong dagiti espiritu. Idalan ken isurona ida babaen ti Biblia, a mamagbalin iti maysa a tao a “naan-anay a nakabalan iti tunggal naimbag nga aramid.”—2 Timoteo 3:17.

Gapuna, no pakdaarannatay ni Jehova maibusor kadagiti panangallilaw ti Diablo, aramidenna a kasta agsipud ta ay-ayatennatayo. Ammona a dagiti demonio ket napeggadda a kabkabusor.