Mapan iti linaonna

Mapan iti listaan dagiti linaonna

 LEKSION 38

Pinagbalin ni Jehova a Napigsa ni Samson

Pinagbalin ni Jehova a Napigsa ni Samson

Nagdaydayaw manen ti adu nga Israelita kadagiti imahen, isu nga impalubos ni Jehova a sakupen ida dagiti Filisteo. Ngem adda dagiti Israelita a mangay-ayat ken Jehova. Maysa kadakuada ni Manoa. Awan anakda ken baketna. Maysa nga aldaw, nangibaon ni Jehova iti anghel iti asawa ni Manoa. Imbaga ti anghel: ‘Maaddaankanto iti anak a lalaki. Isalakannanto ti Israel kadagiti Filisteo. Agbalinto a Nazareo.’ Ammom no ania ti Nazareo? Dagiti Nazareo ket espesial nga adipen ni Jehova. Saanda a mabalin a mapukisan.

Idi agangay, nayanak ti anak ni Manoa, ket pinanagananna iti Samson. Idi dakkelen ni Samson, pinagbalin ni Jehova a nakapigpigsa. Kayana a patayen ti maysa a leon nga imana laeng ti usarenna. Naminsan, pinatay ni Samson ti 30 a Filisteo nga is-isuna. Kagurgura isuna dagiti Filisteo ket kayatda a patayen. Maysa a rabii, bayat a matmaturog ni Samson idiay Gaza, napan dagiti Filisteo iti ruangan ti siudad ket nagur-urayda tapno patayenda kabigatanna. Ngem iti tengnga ti rabii, bimmangon ni Samson, napan iti ruangan ti siudad, ket inikkatna ti ruangan. Binagkatna ti ruangan sa insang-atna iti tuktok ti bantay iti asideg ti Hebron!

Idi agangay, napan dagiti Filisteo ken Dalila, ti nobia ni Samson, ket imbagada: ‘Bayadandakanto iti 5,500 a pirak no maammuam no apay a nakapigpigsa ni Samson. Kayatmi a tiliwen ken ibalud.’ Kayat ni Dalila ti kuarta isu nga imbagana nga aramidenna ti kayatda. Idi damo, saan a kayat nga ibaga ni Samson ken Dalila no apay a nakapigpigsa. Ngem pinilit ni Dalila agingga nga imbaga met laeng ni Samson ti sekretona. Kinunana: ‘Saanak pay a napukpukisan gapu ta maysaak a Nazareo. No mapukisanak, mapukaw ti pigsak.’ Dakkel a kamali dayta nga inaramid ni Samson!

 Dagus nga imbaga ni Dalila kadagiti Filisteo: ‘Ammokon ti sekretona!’ Pinaturogna ni Samson iti saklotna, sa pinapukisanna ti buokna. Impukkaw ni Dalila: ‘Samson, addan dagiti Filisteo!’ Nakariing ni Samson, ngem nakapsuten. Tiniliw dagiti Filisteo, binulsekda, ket imbaludda.

Maysa nga aldaw, rinibu a Filisteo ti napan iti templo ti diosda a ni Dagon. Ipukpukkawda: ‘Inted kadatayo ti diostayo ni Samson! Iruaryo tapno pagkakatawaantayo!’ Pinagtakderda ni Samson iti nagbaetan ti dua nga adigi ket pinagang-angawanda. Impakaasi ni Samson: ‘O Jehova, pangngaasim, papigsaennak manen.’ Iti dayta a tiempo, atiddog manen ti buok ni Samson. Impanna ti amin a pigsana a nangiduron kadagiti adigi ti templo. Narba ti templo ket natay ti amin nga adda sadiay agraman ni Samson.

“Adda pigsak a mangsango iti amin a banag gapu iti daydiay mangpabpabileg kaniak.”—Filipos 4:13