Mapan iti linaonna

Mapan iti listaan dagiti linaonna

 LEKSION 33

Da Ruth ken Noemi

Da Ruth ken Noemi

Idi adda panagbisin idiay Israel, immakar idiay Moab ti Israelita nga agnagan Noemi. Kaduana ti asawana ken ti dua nga annakna a lallaki. Idi agangay, natay ti asawana. Nangasawa dagiti annakna kadagiti Moabita, da Ruth ken Orpa. Makapaladingit ta idi agangay, natay dagiti annak ni Noemi.

Idi nadamag ni Noemi a nagpatinggan ti panagbisin idiay Israel, nagdesision nga agsubli. Simmurot da Ruth ken Orpa, ngem idi agbibiaheda, imbaga ni Noemi kadakuada: ‘Nasayaatkayo nga assawa ken nasayaatkayo a manugang. Kayatko a makiasawakayo manen. Agawidkayon idiay Moab.’ Insungbatda: ‘Ay-ayatendaka! Didaka kayat a panawan.’ Ngem imbaga latta ni Noemi nga agawiddan. Idi kuan, nagawiden ni Orpa, ngem nagbati ni Ruth. Imbaga ni Noemi ken Ruth: ‘Nagsublin ni Orpa kadagiti kailiam ken kadagiti diosmo. Agsublika metten.’ Ngem imbaga ni Ruth: ‘Dika panawan. Dagiti kailiam isudanto dagiti kailiak, ket ti Diosmo isunto ti Diosko.’ Panagkunam, ania ti narikna ni Noemi iti imbaga ni Ruth?

Rugi ti panagani iti sebada idi nakasangpet da Ruth ken Noemi idiay Israel. Maysa nga aldaw, napan nagpidut ni Ruth kadagiti natedda a sebada iti talon ti lalaki nga agnagan Boaz, nga anak ni Rahab. Naammuan ni Boaz a ni Ruth ket Moabita ken saanna a pinampanawan ni Noemi. Imbagana kadagiti trabahadorna a nayonanda ti ibatida a sebada para ken Ruth.

 Karabiyanna, dinamag ni Noemi ken Ruth: ‘Makintalon ti nagadasam?’ Imbaga ni Ruth: ‘Iti talon ti lalaki nga agnagan Boaz.’ Imbaga ni Noemi: ‘Kabagian ni lakayko ni Boaz. Itultuloymo ti agadas sadiay a kadua ti dadduma nga agtutubo a babbai. Saanka a maan-ano sadiay.’

Nagtultuloy a nagadas ni Ruth iti talon ni Boaz agingga a nalpas ti panagani. Nakita ni Boaz a nagaget ken nakasaysayaat a babai ni Ruth. Idi, no matay ti maysa a lalaki a saan a naaddaan iti anak, ti asawana ket alaen ti kabagianna kas asawa. Isu nga innala ni Boaz ni Ruth kas asawa. Naaddaanda iti anak a lalaki ket pinanagananda iti Obed, a nagbalin a lolo ni Ari David. Naragsakan dagiti gagayyem ni Noemi. Imbagada: ‘Idi damo, inted ni Jehova kenka ni Ruth, a nakaim-imbag kenka, ket ita, adda apokomon. Maidaydayaw koma ni Jehova.’

“Adda gayyem a nadekdekket ngem iti kabsat.”—Proverbio 18:24