Mapan iti linaonna

Mapan iti listaan dagiti linaonna

 LEKSION 35

Inkararag ni Anna a Maaddaan iti Anak a Lalaki

Inkararag ni Anna a Maaddaan iti Anak a Lalaki

Dua ti asawa ti Israelita nga agnagan Elcana, isu da Anna ken Penina, ngem mas ay-ayaten ni Elcana ni Anna. Adu ti annak ni Penina ngem awan anak ni Anna, isu a kanayon nga uy-uyawenna ni Anna. Kada tawen, mapmapan ni Elcana ken ti pamiliana iti tabernakulo idiay Silo tapno agdaydayaw. Naminsan, idi addada sadiay, nadlawna a nakalidliday ni Anna. Imbagana: ‘Dikan agsangsangit, Anna. Addaak met. Ay-ayatenka.’

Idi kuan, napan nagkararag ni Anna. Napalalo ti sangitna nga agpakpakaasi ken Jehova. Inkarina: ‘Jehova, no ikkannak iti anak a lalaki, itedkonto kenka, ken agserbinto kenka iti intero a panagbiagna.’

Nakita ti nangato a padi a ni Eli nga agsangsangit ni Anna, ket pinanunotna a nabartek. Ngem imbaga ni Anna: ‘Saanak a nabartek, apok. Adda nadagsen a problemak ket ibagbagak ken Jehova.’ Nabigbig ni Eli a nagkamali isuna ket imbagana: ‘Ited koma ti Dios ti dawdawatem.’ Limmag-an ti rikna ni Anna ket pimmanawen. Awan pay makatawen, naaddaan iti anak a lalaki ket pinanagananna iti Samuel. Ania ngata ti narikna ni Anna?

 Saan a nalipatan ni Anna ti karina ken Jehova. Idi napusotnan ni Samuel, impanna iti tabernakulo tapno agserbi. Imbagana ken Eli: ‘Daytoy ti ubing a lalaki nga inkararagko. Kukua isunan ni Jehova iti intero a panagbiagna.’ Kada tawen, bisbisitaen da Elcana ken Anna ni Samuel ken ik-ikkanda iti baro a bado nga awan imana. Inikkan pay ni Jehova ni Anna iti tallo nga annak a lallaki ken dua nga annak a babbai.

“Itultuloyyo ti agdawat, ket maikkankayto; itultuloyyo ti agsapul, ket makasarakkayto.”—Mateo 7:7