Mapan iti linaonna

Mapan iti listaan dagiti linaonna

 LEKSION 36

Ti Kari ni Jefte

Ti Kari ni Jefte

Pinanawan manen dagiti Israelita ni Jehova ket nagdayawda kadagiti ulbod a dios. Kada gubaten ken labanan ida dagiti Ammonita, saan ida a matulongan dagiti ulbod a dios. Adu a tawen a nagrigrigat dagiti Israelita. Idi agangay, imbagada ken Jehova: ‘Nagbasolkami. Pangngaasim, isalakannakami kadagiti kalabanmi.’ Dinadael dagiti Israelita dagiti rebultoda ket nagdaydayawda manen ken Jehova. Saan a kayat ni Jehova a makita nga agtultuloy nga agrigrigatda.

Napili ti maysa a mannakigubat nga agnagan Jefte a mangidaulo kadagiti tattao a makigubat kadagiti Ammonita. Imbagana ken Jehova: ‘No tulongannakami a mangabak iti daytoy a gubat, ikarik nga ited kenka ti umuna a tao a mangsabat kaniak inton agawidak.’  Sinungbatan ni Jehova ti kararag ni Jefte ket tinulonganna a mangabak iti gubat.

Idi nagawid ni Jefte, ti umuna a nangsabat kenkuana ket ti balasangna, ti kakaisuna nga anakna. Agsalsala ken agtoktokar iti pandereta a simmabat ken tatangna. Ania itan ti aramiden ni Jefte? Nalagipna ti karina ket kinunana: ‘Ay, anakko! Pinagladingitmo ti pusok. Nagkariak ken Jehova ket tapno matungpalko, masapul nga ibaonka nga agserbi iti tabernakulo idiay Silo.’ Ngem imbaga ti balasangna: ‘Amak, no nagkarika ken Jehova, masapul a tungpalem. Palubosannak laeng a mapan iti bambantay a kadua dagiti gagayyemko a babbai iti dua a bulan. Kalpasanna, mapanakton iti tabernakulo.’ Nagserbi a matalek ti balasang ni Jefte iti tabernakulo iti intero a panagbiagna. Kada tawen, bisbisitaen isuna dagiti gagayyemna idiay Silo.

“Ti dakdakkel ti panagayatna iti anakna a lalaki wenno babai ngem kaniak, saan a maikari kas adalak.”—Mateo 10:37