Mapan iti linaonna

Mapan iti listaan dagiti linaonna

 LEKSION 29

Pinili ni Jehova ni Josue

Pinili ni Jehova ni Josue

Adu a tawen nga indauluan ni Moises ti nasion ti Israel ket ita, dandanin matay. Imbaga ni Jehova kenkuana: ‘Saan a sika ti mangipan kadagiti Israelita iti Naikari a Daga. Ngem ipalubosko a makitam ti daga.’ Indawat ni Moises a mangpili ni Jehova iti baro a lider a mangaywan kadagiti Israelita. Kinuna ni Jehova: ‘Mapanka ken Josue, ket ibagam nga isu ti pinilik.’

Imbaga ni Moises kadagiti Israelita nga isu ket dandanin matay ken ni Josue ti pinili ni Jehova a mangidaulo kadakuada a mapan iti Naikari a Daga. Imbaga ni Moises ken Josue: ‘Dika agbuteng. Tulongannaka ni Jehova.’ Kalpasanna, napan ni Moises iti tuktok ti Bantay Nebo ket impakita ni Jehova kenkuana ti daga nga inkarina kada Abraham, Isaac, ken Jacob. Natay ni Moises idi 120 ti tawenna.

Kinuna ni Jehova ken Josue: ‘Bumallasiwka iti Karayan Jordan ket mapanka idiay Canaan. Tulonganka a kas iti panangtulongko idi ken Moises. Masapul a basaem ti Lintegko iti inaldaw. Dika agbuteng. Papigsaem ti pakinakemmo. Mapanka ket aramidem ti imbilinko kenka.’

 Nangibaon ni Josue iti dua nga espia iti siudad ti Jerico. Iti sumaruno nga estoria, maammuantanto ti napasamak sadiay. Idi nakasubli dagiti espia, imbagada a kayada a serreken ti Canaan. Kabigatanna, imbaga ni Josue iti nasion a pumanawdan. Pinaunana iti Karayan Jordan dagiti padi a mangaw-awit iti lakasa ti tulag. Adalem ti karayan ngem idi indisso dagiti padi dagiti sakada iti danum, nagsardeng nga agayus ti danum ket naatianan ti karayan! Nagtakder dagiti papadi iti tengnga ti namaga a karayan agingga a nakaballasiw ti intero a nasion ti Israel. Panagkunam, nalagipda ngata ti inaramid ni Jehova iti Nalabaga a Baybay gapu iti daytoy a milagro?

Kalpasan ti adu a tawen, nakadanon met laengen dagiti Israelita iti Naikari a Daga. Makaibangondan kadagiti balay ken siudad. Makatalondan ken makamuladan iti ubas ken kadagiti agbunga a kayo. Adu ti naimas a makan ken inumen iti Naikari a Daga isu a naawagan dayta iti daga a pagay-ayusan ti gatas ken diro.

“Kanayonto nga idalannaka ni Jehova ken pennekennaka uray iti natikag a daga.”—Isaias 58:11