Mapan iti linaonna

Mapan iti listaan dagiti linaonna

 LEKSION 23

Nagkari Dagiti Israelita ken Jehova

Nagkari Dagiti Israelita ken Jehova

Dua a bulan kalpasan a nakapanaw dagiti Israelita idiay Egipto, nakadanonda iti Bantay Sinai ket nagyanda pay laeng sadiay. Imbaga ni Jehova ken Moises nga umuli iti bantay ket kinunana: ‘Insalakanko dagiti Israelita. No agtulnogda ken tungpalenda dagiti bilinko, agbalindanto nga espesial a tattaok.’ Bimmaba ni Moises iti bantay ket imbagana kadagiti Israelita ti kinuna ni Jehova. Ania ti insungbatda? Kinunada: ‘Aramidenmi ti amin nga imbaga ni Jehova.’

Immuli manen ni Moises iti bantay ket kinuna ni Jehova: ‘Makisaritaakto kenka iti maikatlo nga aldaw. Ibagam kadagiti tattao a dida umuli iti Bantay Sinai.’ Bimmaba ni Moises ket imbagana kadagiti Israelita nga agsaganada a dumngeg ken Jehova.

Iti maikatlo nga aldaw, nakita dagiti Israelita nga agkimkimat iti bantay ken adda nangisit nga ulep iti ngatona. Nakangngegda met iti napigsa a gurruod ken iti uni ti tangguyob. Idi kuan, bimmaba ni Jehova iti bantay babaen ti apuy. Mabutbuteng unay dagiti Israelita ket agtigtigergerda. Nagginggined iti napigsa iti bantay ket napunno iti asuk. Pimmigsa a pimmigsa ti uni ti tangguyob. Kalpasanna, imbaga ti Dios: ‘Siak ni Jehova. Dikay agdayaw iti sabali a dios.’

Immuli manen ni Moises iti bantay, ket inted kenkuana ni Jehova dagiti bilin no kasano ti rumbeng a panagdayaw dagiti Israelita ken no ania dagiti masapul nga aramidenda. Insurat ni Moises dagita a bilin sa imbasana kadagiti Israelita. Inkarida: ‘Aramidenmi ti amin nga imbaga ni Jehova.’ Wen, nagkarida iti Dios. Ngem tungpalenda ngata?

“Masapul nga ayatem ni Jehova a Diosmo iti amin a pusom ken amin a kararuam ken amin a panunotmo.”—Mateo 22:37