Mapan iti linaonna

Mapan iti listaan dagiti linaonna

 LEKSION 26

Ti Sangapulo ket Dua nga Espia

Ti Sangapulo ket Dua nga Espia

Pimmanaw dagiti Israelita iti Bantay Sinai ket dimmalanda iti desierto ti Paran. Nakadanonda iti lugar a naawagan iti Cades. Imbaga ni Jehova ken Moises: ‘Mangibaonka iti 12 a lallaki, maysa iti kada tribu, tapno agespia iti Canaan, ti daga nga itedko kadagiti Israelita.’ Nangpili ni Moises iti 12 a lallaki ket imbagana kadakuada: ‘Mapankayo idiay Canaan, ket kitaenyo no nasayaat a pagmulaan ti daga. Kitaenyo no nakapuy wenno napigsa dagiti tattao ken no aggigianda kadagiti tolda wenno siudad.’ Napan ti 12 nga espia idiay Canaan. Karaman kadakuada da Josue ken Caleb.

Kalpasan ti 40 nga aldaw, nagsubli dagiti espia nga adda awitda a higos, granada, ken ubas. Imbaga dagiti espia: ‘Nasayaat ti daga, ngem napigsa dagiti tattao ken nangato ti pader dagiti siudad.’ Ngem imbaga ni Caleb: ‘Maabaktayo ida. Intayon!’ Ammom no apay a naibagana dayta? Agtaltalek ngamin da Caleb ken Josue ken ni Jehova. Ngem imbaga ti 10 nga espia: ‘Saan! Dadakkel dagiti tattao sadiay. Kaslada higante! Kaslakam la dudon no mayabay kadakuada.’

Nagbuteng dagiti Israelita. Nagreklamoda ket imbagada iti maysa ken maysa: ‘Mangpilitayo iti sabali a lider ket agsublitayo idiay Egipto. Apay a mapantayo iti dayta a lugar ket patayendatayto?’ Imbaga da  Josue ken Caleb: ‘Dikay agsukir ken Jehova, ken dikay agbuteng. Protektarannatayo ni Jehova.’ Ngem saan a dimngeg dagiti Israelita. Kayatda pay ketdin a patayen da Josue ken Caleb!

Ania ti inaramid ni Jehova? Imbagana ken Moises: ‘Nagadu ti inaramidko para kadagiti Israelita, ngem saanda latta nga agtultulnog kaniak. Isu nga agyanda iti let-ang iti 40 a tawen agingga a matayda. Dagiti laeng annakda ken da Josue ken Caleb ti agyan iti daga nga inkarik nga ited kadakuada.’

“Apay a kasta unay ti butengyo? Nagbassit ketdin ti pammatiyo.”—Mateo 8:26