Mapan iti linaonna

Mapan iti listaan dagiti linaonna

 LEKSION 14

Maysa nga Adipen a Nagtulnog iti Dios

Maysa nga Adipen a Nagtulnog iti Dios

Ni Jose ti maysa kadagiti kaubingan nga anak a lalaki ni Jacob. Nakita dagiti manong ni Jose nga isu ti paborito ni tatangda. Ania ngata ti nariknada? Nagimonda ken kinagurada ni Jose. Idi naaddaan ni Jose kadagiti naidumduma a tagtagainep, inyestoriana kadagiti kakabsatna. Kaipapanan dagita nga agruknoydanto kenkuana isu a lallalo manen a kinagurada ni Jose!

Naminsan, agipaspastor dagiti kakabsat ni Jose iti karnero iti asideg ti siudad ti Siquem. Imbaon ni Jacob ni Jose tapno kitaenna ida. Adda pay laeng ni Jose iti adayo, nakitan dagiti kakabsatna. Kinunada iti maysa ken maysa: ‘Sumungsungad tay managtagtagainep. Patayentayo!’ Ginammatanda ni Jose sada intapuak iti nauneg nga abut. Ngem kinuna ti kabsatda a ni Juda: ‘Diyo patayen! Ilakotayo lattan kas adipen.’ Isu nga inlakoda ni Jose iti 20 a pirak kadagiti negosiante a Midianita nga agturturong idiay Egipto.

Kalpasanna, insawsawda ti bado ni Jose iti dara ti kalding sada impatulod ken tatangda. Kinunada: ‘Saan kadi a bado daytoy ti anakmo?’ Pinanunot ni Jacob a pinatay ti atap nga animal ni Jose. Kasta unay ti ladingitna ket awan ti makaliwliwa kenkuana.

Idiay Egipto, nailako ni Jose kas adipen iti nangato nga opisial a ni Potifar. Ngem tultulongan ni Jehova ni Jose. Nakita ni Potifar a nalaing nga agtrabaho ni Jose ken mapagtalkan. Di nagbayag, naipaaywan ken Jose ti amin a kukua ni Potifar.

Nakita ti asawa ni Potifar a naguapo ken napigsa ni Jose. Inaldaw nga ibagbagana ken Jose a makikaidda kenkuana. Ania ti inaramid ni  Jose? Saanna a kinayat ket imbagana: ‘Dakes dayta! Agtaltalek ti apok kaniak, ket asawanaka. No makikaiddaak kenka, agbasolak iti Dios!’

Maysa nga aldaw, pinilit ti asawa ni Potifar ni Jose a makikaidda kenkuana. Ginammatanna ti bado ni Jose, ngem nagtaray. Idi nakaawid ni Potifar, nagulbod ti asawana ket imbagana a pinilit isuna ni Jose a makikaidda kenkuana. Permi ti unget ni Potifar isu nga impaibaludna ni Jose. Ngem saan a linipatan ni Jehova ni Jose.

“Agpakumbabakayo ngarud iti mannakabalin a Dios, tapno maitan-oknakayo iti naikeddeng a tiempo.”—1 Pedro 5:6