Mapan iti linaonna

Mapan iti listaan dagiti linaonna

 LEKSION 21

Ti Maikasangapulo a Didigra

Ti Maikasangapulo a Didigra

Inkari ni Moises ken Faraon a saanen a pulos agpakita kenkuana. Ngem sakbay a pimmanaw, kinunana ken Faraon: ‘Inton tengnga ti rabii, matayto ti amin nga inauna nga annak iti Egipto, manipud iti anak a lalaki ni Faraon agingga kadagiti annak a lallaki dagiti adipen.’

Imbaga ni Jehova kadagiti Israelita a mangisaganada iti espesial a pangrabii. Kinunana: ‘Mangpartikayo iti lalaki a karnero wenno kalding nga agtawen iti maysa, ket mangikabilkayo iti darana iti ruanganyo. Itunoyo ti karne, ket kanenyo a kadua ti awan lebadurana a tinapay. Masapul a nakarubbuatkayo ken nakasandalias, a nakasaganan a pumanaw. Isalakankayo iti daytoy a rabii.’ Mapanunotmo kadi no kasano karagsak dagiti Israelita?

Iti tengnga ti rabii, napan ti anghel ni Jehova iti amin a balay iti Egipto. Natay dagiti inauna nga annak kadagiti balay a saan a namarkaan iti dara ti ruanganna. Ngem linabsan ti anghel dagiti balay a naikkan iti dara ti ruanganna. Natayan iti anak ti amin a pamilia nga Egipcio, nabaknang man wenno marigrigat. Ngem awan ti natay nga anak dagiti Israelita.

Natay uray ti inauna nga anak a lalaki ni Faraon. Simmuko met laengen ni Faraon. Dagus nga imbagana kada Moises ken Aaron: ‘Pumanawkayon.  Inkayon agdayaw iti Diosyo. Itugotyo amin a tarakenyo nga animal ket pumanawkayon!’

Kabus (full moon) idi rimmuar dagiti Israelita iti Egipto. Naurnosda depende iti pamilia ken tribuda. Innem a gasut a ribu nga Israelita a lallaki ken adu a babbai ken ubbing ti pimmanaw iti Egipto. Adu met a saan nga Israelita ti simmurot kadakuada tapno agdayaw ken Jehova. Nawayawayaan met laengen dagiti Israelita!

Tapno malagip dagiti Israelita ti panangisalakan ni Jehova, masapul a tinawen a mangisaganada iti kasta nga espesial a pangrabii. Naawagan dayta iti Paskua.

“Pinagtalinaedka a sibibiag gapu iti daytoy a rason: tapno maipakitak kenka ti pannakabalinko ken maipakaammo ti naganko iti intero a daga.”—Roma 9:17