Mapan iti linaonna

Mapan iti listaan dagiti linaonna

 LEKSION 95

Awan Makapasardeng Kadakuada

Awan Makapasardeng Kadakuada

Adda lalaki a pilay nga inaldaw a nakatugaw ken agpalpalimos iti ruangan ti templo. Maysa nga aldaw, nakitana da Pedro ken Juan a mapmapan iti templo. Imbagana kadakuada: ‘Pangngaasiyo, ikkandak iti uray ania.’ Kinuna ni Pedro: ‘Adda itedko a nasaysayaat ngem iti kuarta. Iti nagan ni Jesus, magnaka!’ Tinulongan ni Pedro ti lalaki a tumakder, ket nangrugi a nagna! Permi ti ragsak dagiti tattao a nakakita iti dayta a milagro ket adu ti nagbalin nga adalan.

Ngem nakapungtot dagiti papadi ken Saduceo. Tiniliwda dagiti apostol, sada impan iti Sanhedrin, ti korte dagiti lider ti relihion, ket insaludsodda: ‘Asino ti nangted kadakayo iti pannakabalin a mangpaimbag iti daytoy a lalaki?’ Insungbat ni Pedro: ‘Ni Jesu-Kristo a pinatayyo.’ Impukkaw dagiti lider ti relihion: ‘Isardengyo ti agsao maipapan ken Jesus!’ Ngem insungbat dagiti apostol: ‘Masapul nga agsaokami maipapan kenkuana. Saankami a sumardeng.’

Idi napalubosanen da Pedro ken Juan, napanda iti dadduma nga adalan ket imbagada ti napasamak. Nagkakaduada a nagkararag ket indawatda ken Jehova: ‘Pangngaasim, tulongannakami nga agbalin a natured tapno maitultuloymi ti trabahom.’ Inikkan ida ni Jehova iti nasantuan nga espirituna, ket intultuloyda ti nangasaba ken nangpaimbag. Immadu ti nagbalin nga adalan. Nagimon dagiti Saduceo isu nga inarestoda dagiti apostol sada imbalud. Ngem bayat ti rabii, nangibaon ni Jehova iti anghel. Linuktan ti anghel dagiti ruangan ti pagbaludan ken imbagana kadagiti apostol: ‘Agsublikayo idiay templo ken mangisurokayo.’

Kabigatanna, naipadamag iti Sanhedrin: ‘Nakakandado ti pagbaludan ngem awanen dagiti lallaki nga inarestoyo! Addada idiay templo a mangisursuro!’ Naaresto manen dagiti apostol ket naipanda iti Sanhedrin. Imbaga ti nangato a padi:  ‘Binilindakayo nga isardengyo ti agsao maipapan ken Jesus!’ Ngem insungbat ni Pedro: ‘Masapul nga agtulnogkami iti Dios kas agturay saan nga iti tao.’

Kasta unay ti unget dagiti lider ti relihion ket kayatda a papatayen dagiti apostol. Ngem timmakder ti maysa a Fariseo a ni Gamaliel ket imbagana: ‘Agannadkayo! Baka tultulongan ida ti Dios. Kayatyo kadi ti makilaban iti Dios?’ Dimngegda kenkuana. Kalpasan a sinapsaplitda dagiti apostol, imbilinda manen nga agsardengdan a mangasaba, sa pinalubosanda ida. Ngem saan a nagsardeng dagiti apostol. Situtured nga intultuloyda nga inkasaba ti naimbag a damag idiay templo ken iti binalaybalay.

“Masapul nga agtulnogkami iti Dios kas agturay saan nga iti tao.”—Aramid 5:29