Mapan iti linaonna

Mapan iti listaan dagiti linaonna

 LEKSION 93

Nagsubli ni Jesus Idiay Langit

Nagsubli ni Jesus Idiay Langit

Nagkikita ni Jesus ken dagiti pasurotna idiay Galilea. Inikkanna ida iti nagpateg a bilin: ‘Inkayo kadagiti tattao iti amin a nasion ket pagbalinenyo ida nga adalak. Isuroyo kadakuada dagiti insurok kadakayo, ken bautisaranyo ida.’ Kalpasanna, inkarina: ‘Laglagipenyo a kanayonkayo a tulongan.’

Bayat ti 40 nga aldaw kalpasan ti panagungar ni Jesus, nagparang iti ginasut nga adalanna idiay Galilea ken Jerusalem. Sinuruanna ida kadagiti napateg a leksion ken nagaramid iti adu a milagro. Kalpasanna, nakisarita ni Jesus kadagiti apostolna iti maudi a gundaway iti Bantay dagiti Olibo. Imbagana: ‘Dikay pumampanaw iti Jerusalem. Urayenyo ti inkari ni Amak.’

Saan a naawatan dagiti apostol ti kayatna a sawen isu a dinamagda: ‘Agbalinka kadin nga Ari ti Israel?’ Insungbat ni Jesus: ‘Saan pay nga ita ti tiempo a kayat ni Jehova nga agbalinak nga Ari. Umawatkayto iti pannakabalin manipud iti nasantuan nga espiritu, ket agbalinkayto a saksik. Mangasabakayo idiay Jerusalem, Judea, Samaria, ken agingga iti kaadaywan a paset ti daga.’

Idi kuan, naipangato ni Jesus idiay langit ket naabbongan iti ulep. Tangtangaden dagiti adalanna ngem didan makita.

Pimmanaw dagiti adalan iti Bantay dagiti Olibo ket napanda idiay Jerusalem. Regularda a nagtataripnong ken nagkarkararag iti makinngato a kuarto ti maysa a balay. Ur-urayenda nga ikkan ida ni Jesus iti kanayonan nga instruksion.

“Ti naimbag a damag maipapan iti Pagarian maikaskasabanto iti intero a daga tapno maammuan ti amin a nasion; kalpasanna, umayton ti panungpalan.”—Mateo 24:14