Mapan iti linaonna

Mapan iti listaan dagiti linaonna

 LEKSION 81

Ti Sermon iti Bantay

Ti Sermon iti Bantay

Kalpasan a nangpili ni Jesus iti 12 nga apostol, bimmaba iti bantay ket napan iti naguummongan ti adu a tattao. Naggapuda idiay Galilea, Judea, Tiro, Sidon, Siria, ken iti bangir ti Jordan. Intugotda dagiti masakit ken dagiti naluganan iti demonio ket pinaimbag ida ni Jesus. Kalpasanna, nagtugaw ni Jesus ket rinugianna ti nagsao. Imbagana ti masapul nga aramidentayo no kayattayo ti agbalin a gayyem ti Dios. Masapul a bigbigentayo a kasapulantayo ni Jehova ken ayatentayo isuna. Ngem saantayo a talaga nga ay-ayaten ti Dios no saantayo nga ayaten ti sabsabali. Masapul a naasitayo ken patas ti panangtratotayo iti amin, uray kadagiti kabusortayo.

Imbaga ni Jesus: ‘Saan laeng a dagiti gagayyemyo ti ayatenyo. Masapul met nga ayatenyo dagiti kabusoryo ken naimpusuan a mangpakawankayo. No adda napasaktanyo, dagus a dumawatkayo iti pammakawan. Tratuenyo ti sabsabali kas iti kayatyo a panangtratoda kadakayo.’

 Binalakadan met ni Jesus dagiti tattao maipapan kadagiti material a banag. Imbagana: ‘Napatpateg ti agbalin a gayyem ni Jehova ngem ti maaddaan iti adu a kuarta. Mabalin a matakaw ti kuartayo, ngem awan ti makatakaw iti pannakigayyemyo ken Jehova. Diyo pagdanagan ti kanen, inumen, wenno pagbadoyo. Kitaenyo dagiti billit. Sigsiguraduen ti Dios nga adda kanenda. Ti panagdanag dina manayonan iti maysa nga aldaw ti biagyo. Laglagipenyo nga ammo ni Jehova ti kasapulanyo.’

Awan pay a pulos ti nangngeg dagiti tattao a nagsao a kas ken Jesus. Saan nga insuro dagiti lider ti relihionda dagiti insurona. Apay a naglaing ni Jesus a mangisuro? Gapu ta amin nga insurona ket naggapu ken Jehova.

“Alaenyo ti awitko ken agsursurokayo kaniak, ta naalumamay ken napakumbabaak, ket magin-awaankayto.”—Mateo 11:29