Mapan iti linaonna

Mapan iti listaan dagiti linaonna

 LEKSION 86

Pinagungar ni Jesus ni Lazaro

Pinagungar ni Jesus ni Lazaro

Adda tallo nga agkakabsat a taga-Betania a nadekket a gagayyem ni Jesus—da Lazaro, Maria, ken Marta. Maysa nga aldaw, idi adda ni Jesus iti bangir ti Jordan, impaibaga da Maria ken Marta kenkuana: ‘Nakaro ti sakit ni Lazaro. Pangngaasim, umayka a dagus!’ Ngem saan a dagus a napan ni Jesus. Pinalabasna pay ti dua nga aldaw. Idi kuan, imbagana kadagiti adalanna: ‘Mapantayo idiay Betania. Matmaturog ni Lazaro ket mapanko riingen.’ Kinuna dagiti apostol: ‘Mayat no matmaturog tapno umimbag.’ Isu nga inlawlawag ni Jesus: ‘Natayen ni Lazaro.’

Idi nakasangpet ni Jesus idiay Betania, uppat nga aldawen a naitabon ni Lazaro. Adu ti napan nangliwliwa kada Marta ken Maria. Idi naammuan ni Marta a simmangpet ni Jesus, nagdardaras a simmabat. Kinunana: ‘Apo, no addaka koma idi ditoy, saan koma a natay ti kabsatko.’ Imbaga ni Jesus: ‘Agbiagto manen ti kabsatmo. Patiem kadi, Marta?’ Insungbat ni Marta: ‘Mamatiak nga agbiagto inton panagungar.’ Kinuna ni Jesus: “Siak ti panagungar ken ti biag.”

Idi kuan, napan ni Marta ken ni Maria ket imbagana: ‘Adda ni Jesus.’ Nagtaray ni Maria a napan ken Jesus ket simmurot dagiti tattao. Agsangsangit a nagparintumeng iti sakaanan ni Jesus. Imbagana: ‘Apo, no addaka koma idi ditoy, sibibiag pay koma ti kabsatmi!’ Narikna ni Jesus ti saem a marikriknana isu a nagsangit met. Idi nakita dagiti tattao a nagsangit ni Jesus, kinunada: ‘Kitaenyo, talaga nga ipatpateg ni Jesus ni Lazaro!’ Ngem imbaga ti dadduma: ‘Apay nga impalubosna a matay ti gayyemna?’ Ania ti inaramid ni Jesus?

Napan ni Jesus iti tanem a naserraan iti dakkel a bato. Imbilinna: ‘Ikkatenyo ti bato.’ Imbaga ni Marta: ‘Ngem uppat nga aldawen a naitabon! Nabangsiten.’ Ngem inikkatda latta ti bato, ket inkararag ni Jesus: ‘Ama, agyamanak ta dengdenggennak. Ammok a kanayon a dengdenggennak, ngem ipigsak ti agsao tapno maammuan dagitoy a tattao nga imbaonnak.’ Idi kuan, impukkawna: “Lazaro, rummuarka!”  Adda nakaskasdaaw a napasamak: Rimmuar ni Lazaro a naputipotan iti lupot. Imbaga ni Jesus: ‘Ikkatenyo dagiti naiputipot kenkuana ket bay-anyo a magna.’

Adu kadagiti nakakita iti dayta ti namati ken Jesus. Ngem adda dagiti nangibaga kadagiti Fariseo iti napasamak. Sipud idin, kayat dagiti Fariseo a patayen da Jesus ken Lazaro. Ni Judas Iscariote, a maysa kadagiti 12 nga apostol, ket sekreto a napan kadagiti Fariseo ken insaludsodna: ‘Mano ti ibayadyo kaniak no tulongankayo a mangbirok ken Jesus?’ Imbagada nga ikkanda iti 30 a sinsilio a pirak. Sipud idin, nagbirbirok ni Judas iti tsansa tapno matulonganna dagiti Fariseo a mangtiliw ken Jesus.

“Ti pudno a Dios ket Dios a mangisalakan kadatayo; ket manipud ken patay, ispalennatayo ni Jehova a Kangatuan nga Apo.”—Salmo 68:20