Mapan iti linaonna

Mapan iti listaan dagiti linaonna

 LEKSION 84

Nagna ni Jesus iti Danum

Nagna ni Jesus iti Danum

Saan laeng a mangpaimbag iti masakit ken mangpagungar iti natay ti kabaelan nga aramiden ni Jesus. Makontrolna pay ti angin ken tudo. Kalpasan a nagkararag iti bantay, kimmita ni Jesus iti Baybay ti Galilea ket nakitana nga adda bagyo. Nakalugan iti bangka dagiti apostolna ket marigrigatanda nga aggaud ta sumabat ti angin. Bimmaba ni Jesus iti bantay sa nagna iti rabaw ti danum a mapan iti bangka. Idi makita dagiti apostol nga adda magmagna iti danum, nagbutengda. Ngem imbaga ni Jesus: ‘Siak daytoy. Dikay agbuteng.’

Kinuna ni Pedro: ‘Apo, no talaga a sika dayta, paumayennak iti ayanmo.’ Imbaga ni Jesus ken Pedro: ‘Umayka.’ Isu a bimmaba ni Pedro iti bangka uray agbagbagyo sa nagna iti danum a mapan ken Jesus. Ngem idi umas-asidegen ken Jesus, kimmita ni Pedro iti napigsa nga angin ket nagbuteng sa nangrugi a lumned. Impukkaw ni Pedro: ‘Apo, tulongannak!’ Iniggaman ni Jesus ti imana sa imbagana: ‘Apay a nagbutengka? Ayanna ti pammatim?’

Naglugan da Jesus ken Pedro iti bangka ket dagus a nagsardeng ti bagyo. Ania ngata ti narikna dagiti apostol? Kinunada: “Pudno a sika ti Anak ti Dios.”

Saan laeng a namnaminsan a kinontrol ni Jesus ti paniempo. Kas pagarigan, idi nakalugan ni Jesus ken dagiti apostolna iti bangka a mapan iti bangir ti baybay, naturog ni Jesus iti makinlikud a paset ti bangka. Idi matmaturog, nagbagyo iti napigsa. Sinabuasabuagan ti dalluyon ti bangka nga uray la mapmapnon iti danum. Riniing dagiti apostol ni Jesus. Ipukpukkawda: ‘Mannursuro, mataytayon! Tulongannakami!’ Bimmangon ni Jesus ket imbagana iti baybay: “Agtalnaka!” Dagus a timmalna ti angin ken ti baybay. Kinuna ni Jesus: ‘Awan pay kadi pammatiyo?’ Imbagada iti maysa ken maysa: ‘Agtulnog kenkuana uray ti angin ken baybay.’ Nasursuro dagiti apostol a no agtalekda a naan-anay ken Jesus, awan ti masapul a pagbutnganda.

“Sadino ngata koma itan ti ayanko no awan pammatik a makitak ti kinaimbag ni Jehova iti daga dagiti sibibiag?”—Salmo 27:13