Mapan iti linaonna

Mapan iti listaan dagiti linaonna

 LEKSION 82

Sinuruan ni Jesus Dagiti Adalanna nga Agkararag

Sinuruan ni Jesus Dagiti Adalanna nga Agkararag

Kayat dagiti Fariseo a pagbiliben dagiti tattao. Agaramidda iti naimbag tapno laeng madlaw ti dadduma. Agkararagda kadagiti publiko a lugar tapno makita ida dagiti tattao. Mangikabesada kadagiti atiddog a kararag ket ulit-ulitenda dagita kadagiti sinagoga ken kalsada tapno mangngeg ida ti sabsabali. Isu a nakigtot dagiti tattao idi imbaga ni Jesus: ‘Diyo tuladen ti panagkararag dagiti Fariseo. Ipagarupda a mas maragsakan ti Dios iti adu a sasao, ngem saan. No agkararagkayo, dakayo laeng ken Jehova ti agsarsarita. Diyo ulit-uliten ti kararagyo. Kayat ni Jehova nga ibagayo kenkuana ti marikriknayo.

‘Kastoy ti masapul a panagkararagyo: “Amami nga adda iti langit, madaydayaw koma ti naganmo. Umay koma ti Pagariam. Maaramid  koma ti pagayatam ditoy daga, a kas sadi langit.”’ Imbaga pay ni Jesus a masapul nga ikararagda ti kanenda iti inaldaw, ti pannakapakawan dagiti basolda, ken ti dadduma pay a banag.

Imbaga ni Jesus: ‘Dikay agsardeng nga agkararag. Itultuloyyo ti dumawat kadagiti naimbag a bambanag ken Jehova nga Amayo. Kayat dagiti nagannak nga ikkan dagiti annakda kadagiti naimbag a bambanag. No dumawat ti anakyo iti tinapay, ikkanyo kadi iti bato? No dumawat iti ikan, ikkanyo kadi iti uleg?’

Kalpasanna, inlawlawag ni Jesus ti leksion: ‘No ammoyo ti mangted iti naimbag a regalo kadagiti annakyo, ad-adda pay a kasta ni Jehova nga Amayo! Ikkannakayo iti nasantuan nga espiritu. Masapul laeng a dumawatkayo kenkuana.’ Sursurotem kadi ti balakad ni Jesus? Ania dagiti ikarkaragmo?

“Itultuloyyo ti agdawat, ket maikkankayto; itultuloyyo ti agsapul, ket makasarakkayto; itultuloyyo ti agtuktok, ket mailukatankayto.”—Mateo 7:7