Mapan iti linaonna

Mapan iti listaan dagiti linaonna

 LEKSION 72

Ti Ubing a ni Jesus

Ti Ubing a ni Jesus

Nagyan da Jose ken Maria idiay Nazaret a kadua ni Jesus ken ti dadduma pay nga annakda. Nagtrabaho ni Jose kas karpintero tapno maitedna ti kasapulan ti pamiliana, ken insurona ida maipapan ken Jehova ken iti Lintegna. Regular a mapmapanda iti sinagoga tapno agdaydayaw ken idiay Jerusalem tapno selebraranda ti Paskua iti kada tawen.

Idi agtawen ni Jesus iti 12, nagbiahe iti napaut ti pamiliana a napan idiay Jerusalem, kas iti tinawen nga ar-aramidenda. Nakaad-adu ti napan iti siudad tapno selebraranda ti Paskua. Idi agaw-awiden da Jose ken Maria, impagarupda a kaduada ni Jesus iti grupoda. Ngem idi binirokda kadagiti kabagianda, dida nabirokan.

Nagsublida idiay Jerusalem ket tallo nga aldaw a binirbirokda ti anakda. Idi agangay, napanda iti templo. Nakitada sadiay ni Jesus, a nakatugaw iti tengnga dagiti mannursuro ken agdengdengngeg a naimbag ken agsalsaludsod kadagiti narigat a saludsod. Nagbilib  dagiti mannursuro ken Jesus isu a nagsalsaludsodda kenkuana. Nasdaawda kadagiti sungbatna. Nakitada a naawatanna ti Linteg ni Jehova.

Nadanagan unay da Jose ken Maria. Kinuna ni Maria: ‘Anakko, binirbirokdaka! Napnapanam?’ Insungbat ni Jesus: ‘Diyo kadi ammo a masapul nga addaak ditoy balay ni Amak?’

Nagawid ni Jesus idiay Nazaret a kadua dagiti nagannakna. Sinuruan ni Jose ni Jesus nga agkarpintero. Panagkunam, ania a klase nga ubing ni Jesus? Bayat a dumakdakkel ni Jesus, nagbalin a masirib ken makaay-ayo iti Dios ken kadagiti tattao.

“Pagragsakak ti panangaramid iti pagayatam, O Diosko, ken adda iti kaunggak ti lintegmo.”—Salmo 40:8