Mapan iti linaonna

Mapan iti listaan dagiti linaonna

 LEKSION 62

Maysa a Pagarian a kas iti Dakkel a Kayo

Maysa a Pagarian a kas iti Dakkel a Kayo

Maysa a rabii, adda nakabutbuteng a tagtagainep ni Nabucodonosor. Pinaayabanna dagiti masirib nga adipenna tapno ibagada ti kaipapanan dayta, ngem dida maibaga. Idi agangay, nakisarita ti ari ken Daniel.

Imbaga ni Nabucodonosor ken Daniel: ‘Iti tagtagainepko, adda nakitak a kayo. Dimmakkel dayta ket dimmanon idiay langit. Makita dayta iti intero a daga. Nagpintas dagiti bulongna ken nagadu ti bungana. Aglinong dagiti animal iti dayta, ken agumok dagiti billit kadagiti sangana. Idi kuan, adda anghel a bimmaba iti langit. Impukkawna: “Pukanenyo ti kayo, ket putdenyo dagiti sangana. Ngem ibatiyo ti puon ken ramutna, ket bedbedanyo iti landok ken gambang. Addaan ti kayo iti puso ti tao ngem masuktan iti puso ti animal, ket agtalinaed a kasta iti pito a panawen. Maammuanto ti amin a ti Dios isu ti Agturay ken maitedna ti pagarian iti asinoman a kayatna.”’

Impakaammo ni Jehova ken Daniel ti kaipapanan ti tagtagainep, ket nagbuteng ni Daniel. Kinunana: ‘O ari, kayatko koma a ti tagtagainepmo ket maipapan kadagiti kalabanmo, ngem maipapan kenka dayta. Sika ti dakkel a kayo a napukan. Mapukawmonto ti pagariam, ket mangankanto iti ruot a kas iti atap nga animal. Ngem gapu ta imbaga ti anghel a maibati ti puon ken ramutna, agbalinkanto manen nga ari.’

Kalpasan ti makatawen, magmagna ni Nabucodonosor iti atep ti palasiona, a maay-ayatan a mangkitkita iti Babilonia. Kinunana: ‘Nakapimpintas daytoy a siudad nga imbangonko. Talaga a mannakabalinak!’ Bayat nga agsasao, adda boses a naggapu idiay langit a nangibaga: ‘Nabucodonosor! Naikkaten kenka ti pagariam.’

Bigla a nagbagtit ti ari ket nagbalin a kas iti atap nga animal. Napapanaw iti palasiona ket nakikadua kadagiti atap nga animal. Immatiddog ti buokna a kas iti dutdot ti agila, ken nagbalin a kas iti kuko ti billit dagiti kukona.

 Kalpasan ti pito a tawen, nagsubli iti normal ni Nabucodonosor ket pinagbalin manen ni Jehova nga ari ti Babilonia. Kalpasanna, imbaga ni Nabucodonosor: ‘Idaydayawko ni Jehova, ti Ari idiay langit. Ammok itan a ni Jehova ti Agturay. Pagpakumbabaenna dagiti napangato, ken itedna ti pagarian iti asinoman a kayatna.’

“Ti kinapangas agturong iti pannakadadael, ken ti kinatangsit agturong iti pannakatnag.”—Proverbio 16:18