Mapan iti linaonna

Mapan iti listaan dagiti linaonna

 LEKSION 65

Insalakan ni Ester Dagiti Kailianna

Insalakan ni Ester Dagiti Kailianna

Ni Ester ket maysa a Judio nga aggigian idiay Susan, a siudad ti Persia. Isu ket naggapu iti pamilia nga impanaw ni Nabucodonosor idiay Jerusalem adun a tawen ti napalabas. Pinadakkel isuna ti kasinsinna a ni Mardokeo, a maysa nga adipen ti ari ti Persia a ni Asuero.

Kayat ni Ari Asuero ti maaddaan iti baro a reyna. Impan kenkuana dagiti adipenna dagiti kapipintasan a babbai iti pagarianna, a pakairamanan ni Ester. Pinili ti ari ni Ester nga agbalin a reyna. Imbilin ni Mardokeo ken Ester a dina ibagbaga nga isu ket Judio.

Ti napangas a lalaki a ni Haman ti kangatuan kadagiti amin a prinsipe. Kayatna nga agruknoy kenkuana ti amin. Saan a kayat ni Mardokeo ti agruknoy, isu a permi ti pungtot ni Haman ket kayatna a patayen. Idi naammuan ni Haman a Judio ni Mardokeo, implanona a mapapatay ti amin a Judio iti pagarian ni Asuero. Imbagana iti ari: ‘Dakes dagiti Judio. Masapul a patayem ida.’ Imbaga ni Asuero: ‘Aramidem ti kayatmo,’ ket inikkanna ni Haman iti autoridad a mangaramid iti linteg. Nangaramid ni Haman iti linteg a mangibilbilin kadagiti tattao a patayenda ti amin a Judio iti maika-13 nga aldaw ti bulan nga Adar. Ngem makitkita ni Jehova dayta.

Saan nga ammo ni Ester ti maipapan iti linteg. Isu a nangipatulod kenkuana ni Mardokeo iti kopia ti linteg sa imbagana: ‘Makisaritaka iti ari.’ Insungbat ni Ester: ‘Mapapatay ti mapan iti ari a di naayaban. Tallopulo nga aldawen a dinak inayaban! Ngem mapanak. No iyunnatna ti setrona, agbiagak. Ngem no saan, matayak.’

Napan ni Ester iti paraangan ti palasio ti ari. Idi nakita ti ari, inyunnatna ti setrona. Immasideg ni Ester ket insaludsod ti ari: ‘Ania ti kasapulam, Ester?’ Insungbat ni Ester: ‘Kayatkayo nga awisen ken Haman iti maysa nga okasion.’ Iti dayta nga  okasion, inawis manen ni Ester da Asuero ken Haman iti sabali pay nga okasion. Iti maikadua nga okasion, insaludsod manen ti ari: ‘Ania ti kasapulam?’ Insungbat ni Ester: ‘Adda mayat a mangpatay kaniak ken kadagiti kailiak. Pangngaasim, isalakannakami.’ Insaludsod ti ari: ‘Asino?’ Insungbat ni Ester: ‘Daytoy dakes a Haman.’ Permi ti pungtot ni Asuero ket dagus nga impapatayna ni Haman.

Ngem uray ti ari saanna a mabalin a baliwan ti linteg nga inaramid ni Haman. Isu a pinagbalin ti ari ni Mardokeo a kangatuan kadagiti prinsipe ken inikkanna iti autoridad a mangaramid iti baro a linteg. Nangaramid ni Mardokeo iti linteg a mangipalubos kadagiti Judio a mangidepensa iti bagida inton papatayenda ida. Iti maika-13 nga aldaw ti Adar, inabak dagiti Judio dagiti kalabanda. Sipud idin, tinawen a selselebraranda ti panangabakda.

“Maipankayto kadagiti gobernador ken ari gapu kaniak ket ipakaammoyonto kadakuada ken kadagiti nasion ti maipapan kaniak.”—Mateo 10:18