Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 115: Baro a Paraiso iti Daga

Estoria 115: Baro a Paraiso iti Daga

KITAEM dagidiay natayag a kaykayo, napipintas a sabsabong ken nangangato a bantay. Kitaem ti ugsa a mangmangan manipud dakulap ti ubing. Ken kitaem dagiti leon ken kabayo nga agtaktakder iti taltalon. Dika kadi kayat ti aggian iti lugar kas iti daytoy?

Kayat ti Dios nga agbiagkayo nga agnanayon iti daga iti maysa a paraiso. Isu daytoy ti kari ti Biblia kadagidiay agtaeng iti baro a paraiso: ‘Ti Dios addanto kadakuada. Awanton ni patay wenno sasaibbek wenno ut-ot. Ti daan a bambanag napalabasdan.’

Siguruen ni Jesus a maaramid daytoy nakaskasdaaw a panagbalbaliw. Ammom kadi no kaano? Wen, kalpasan a madalusan ti daga iti amin a kinadakes ken dakes a tattao. Malagipmo pay kadi ti panangagas ni Jesus kadagiti tattao ken pinagungarna dagiti natay idi adda ditoy daga? Inaramidna daytoy tapno ipakita no anianto ti aramidenna iti intero a daga inton agbalinen nga Ari iti pagarian ti Dios.

Dinto kadi nakaskasdaaw ti agbiag iti daytoy baro a paraiso ditoy daga? Ni Jesus, agraman dagidiay pinilina, ti agturaydanto idiay langit. Kitaento dagitoy nga isuamin ditoy daga naragsakda. Itan kitaentayo no aniat’ aramidentayo tapno palubosannatay ti Dios nga agtaeng iti baro a paraisona.

Apocalipsis 21:3, 4; 5:9, 10; 14:1-3.

Paraiso


Dagiti Saludsod

  • Sigun iti Biblia, aniada a kasasaad ti tagiragsakentayto iti Paraiso ditoy daga?
  • Ania ti kari ti Biblia kadagidiay agtaeng iti Paraiso?
  • Kaano a siguruen ni Jesus a maaramid daytoy nakaskasdaaw a panagbalbaliw?
  • Idi adda ni Jesus ditoy daga, ania ti inaramidna tapno ipakitana no anianto ti aramidenna kas Ari ti Pagarian ti Dios?
  • Anianto ti siguraduen ni Jesus ken dagiti kakaduana nga agturay idiay langit inton iturayanda ti intero a daga?

Kanayonan a salsaludsod

  • Basaenyo ti Apocalipsis 5:9, 10.

    Apay a makapagtalektayo a dagidiay agturay iti intero a daga bayat ti Milenio a Turay ket mannakipagrikna ken naasida nga ar-ari ken papadi? (Efe. 4:20-24; 1 Ped. 1:7; 3:8; 5:6-10)

  • Basaenyo ti Apocalipsis 14:1-3.

    Ania ti ipasimudaag ti banag a ti nagan ti Ama ken ti nagan ti Kordero ket naisurat kadagiti muging dagiti 144,000? (1 Cor. 3:23; 2 Tim. 2:19; Apoc. 3:12)

Ammuem ti Ad-adu Pay

Anianto ti Aramiden ti Pagarian ti Dios?

Ammuem no anianto ti namnamaem a mapasamak inton agturay ti gobierno ti Dios iti intero a daga.