Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 114: Ti Panungpalan Amin a Kinadakes

Estoria 114: Ti Panungpalan Amin a Kinadakes

MAKITAM kadi daytoy buyot dagiti puraw a kabayo? Sadino ti paggapgapuanda? Wen, agtartarayda nga agpababa manipud langit iti ul-ulep. Adda kadi kabkabayo idiay langit?

Ni Jesus kas Ari idiay langit

Saan, saan a pudno a kabayo dagitoy. Di makapagtaray iti ul-ulep dagiti kabayo, saan kadi? Apay ngarud a sawen ti Biblia dagiti kabayo idiay langit?

Dagiti kabayo ti maus-usar idi iti pannakigubat. Gapuna, sawen ti Biblia a dagiti tattao aglugluganda iti kabayo manipud langit tapno ipakita a ti Dios makigubat kadagiti tattao ditoy daga. Ammom kadi ti nagan ti lugar dayta a gubat? Armagedon. Ti gubat ket isut’ panangdadael amin a kinadakes ditoy daga.

Ni Jesus ti mangidaulo iti daytoy a gubat. Laglagipem, isu daydiay pinili ni Jehova nga ari. Isu nga isut’ nakakorona. Ti kampilan ipakpakitana a patayenna amin a kabusor ti Dios. Makellaattay kadi a dadaelen ti Dios dagiti kabusorna?

Kitaem ti Estoria 10. Malagipmo kadi pay ti Layus a nangdadael kadagiti dakes a tattao? Ita kitaem ti Estoria 15. Nadadael iti apuy ti Sodoma ken Gomorra. Ti Dios ti nangaramid kadagitoy.

Ti ngay pannakadadael ti buybuyot ti Egipto idiay Estoria 33? Ken ti pannakadusa ti dakes nga Israelitas idiay Estoria 76? Wen, ni Jehova ti nangaramid met kadagitoy.

Ditay ngarud makellaat a pagpatinggaen ni Jehova amin a kinadakes ditoy daga. Ngem panunotem ti kaipapanan dayta. Ukagem ti panid ket kitaentayo.

Apocalipsis 16:16; 19:11-16.



Dagiti Saludsod

  • Apay a dinakamat ti Biblia dagiti kabayo idiay langit?
  • Ania ti awag ti pananggubat ti Dios kadagiti dakes a tattao ditoy daga, ket ania ti panggep daytoy a gubat?
  • Iti ladawan, siasino Daydiay mangidaulo iti gubat, apay a nakakorona, ken ania ti kaipapanan ti kampilanna?
  • No kitaem ti Estoria 10, 15 ken 33 apay a saantayo koma a maklaat no dadaelen ti Dios dagiti dakes a tattao?
  • Kasano nga ipakita kadatayo ti Estoria 36 ken 76 a ti Dios dadaelennanto dagiti dakes a tattao uray no ibagada nga agdaydayawda kenkuana?

Kanayonan a salsaludsod

  • Basaenyo ti Apocalipsis 19:11-16.

    Kasano nga ipakita ti Kasuratan a ni Jesu-Kristo ti nakasakay iti puraw a kabalio? (Apoc. 1:5; 3:14; 19:11; Isa. 11:4)

    Kasano a ti dara a naiparsiak iti makinruar a kawes ni Jesus pasingkedanna a sigurado ken naan-anay ti panagbiktoriana? (Apoc. 14:18-20; 19:13; Isa. 63:1-6)

    Siasino dagiti mabalin a karaman kadagiti buyot a sumursurot ken ni Jesus a nakasakay iti puraw a kabaliona? (Apoc. 12:7; 19:14; Mat. 25:31, 32)