Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 113: Ni Pablo Idiay Roma

Estoria 113: Ni Pablo Idiay Roma

KITAEM! Nakakawar ni Pablo, ket bambantayan ti soldado a Romano. Maysa a balud ni Pablo idiay Roma. Agur-uray agingga a maikeddeng ti Romano a Cesar no aniat’ aramidenda kenkuana. Bayat nga isut’ balud, mapalubosan a sumarungkar dagiti tattao kenkuana.

Tallo nga aldaw kalpasan isasangpet ni Pablo idiay Roma, inawisna ti sumagmamano a papangulo a Judio nga umay ken kumita kenkuana. Kas nagbanaganna, nabalinanna ti nangasaba iti adu a Judio idiay Roma maipapan ken Jesus ken ti Pagarian ti Dios. Dadduma ti namati ket nagbalinda a Kristiano, ngem dadduma saan.

Ni Pablo iti pagbaludan

Nangaskasaba met ni Pablo kadagiti soldado a mangbambantay kenkuana. Iti dua a tawen a balud, kaskasabaanna amin a kabaelanna a kasabaan. Uray dadduma iti sangakabbalayan ni Cesar nagbalinda a Kristiano.

Ngem asino daytoy bisita nga agsursurat iti lamisaan? Wen, isu ni Timoteo. Naibalud met ni Timoteo gaput’ panangikaskasabana ti Pagarian, ngem isut’ naibulos manen, ket immay a tumulong ken Pablo. Ammom kadi no aniat’ isursurat ni Timoteo?

Malagipmo kadi pay dagiti siudad ti Filipos ken Efeso idiay Estoria 110? Timmulong ni Pablo a nangirugi kadagiti kongregasion Kristiano idiay. Ngem agsursurat ni Pablo kadagitoy a Kristiano. Dagiti surat ti adda idiay Biblia, ken maaw-awaganda Taga Efeso ken Taga Filipos. Idikdiktar ni Pablo ti isurat ni Timoteo kadagiti gagayyemda idiay Filipos.

Naasi dagiti taga Filipos ken Pablo. Nangipatulodda ti regalo kenkuana ditoy pagbaludan. Agyamyaman ni Pablo kadakuada. Ni Epafrodito ti nangyeg ti regalo. Nagsakit ti nadagsen, ngem naimbag manen ita, isu nga itugotnanto manen ti surat idiay Filipos.

Idi adda idiay pagbaludan, nagsurat pay ni Pablo ti dua nga adda kadatayo idiay Biblia. Ti maysa naawagan Taga Colosas, ket para kadagiti Kristiano idiay Colosas. Daydiay maysa ket para iti nasinged a gayyem nga agnagan Filemon nga aggigian idiay Colosas.

Ti adipen ni Filemon a ni Onesimo ti nagtalaw ken immay idiay Roma. Ditoy, sinarungkaranna ni Pablo ket nagbalin a Kristiano. Itan maladingitan ni Onesimo iti panagtarayna. Gapuna ammom kadi ti insurat ni Pablo iti suratna ken Filemon?

Indawat ni Pablo a pakawanen koma ni Filemon ni Onesimo. ‘Isut’ pagsubliek kenka,’ insurat ni Pablo, ‘saan laeng a kas adipenmo, no di ket kas Kristiano pay a kabsatmo.’ Intugot ni Onesimo dagitoy dua a sursurat, maysa kadagiti taga Colosas ken maysa ken Filemon, nga agsubli idiay Colosas. Mapanunottayo no kasanot’ ragsak ni Filemon idi maammuanna a ti adipenna ket nagbalin metten a Kristiano.

Imbaga ni Pablo iti suratna kadagiti taga Filipos nga umay ni Timoteo kadakuada, ken isunto met ti umay kadakuada iti mabiit. Imbagana ken Filemon nga umayto met bumisita kenkuana.

Idi naibulosen ni Pablo sinarungkaranna dagiti Kristiano a kakabsatna a lallaki ken babbai iti adu a luglugar. Ngem iti kamaudiananna, isu manen ti naibalud idiay Roma. Itatta, ammon ni Pablo nga isut’ papatayenda. Gapuna nagsurat ken Timoteo: ‘Matalekak iti Dios. Gunggonaannakto ti Dios.’ Sumagmamano a tawen kalpasan a napapatay ni Pablo, nadadael manen ti Jerusalem, itatta babaen kadagiti Romano.

Ngem adu pay ti adda iti Biblia. Impaisurat ni Jehova a Dios ken apostol Juan dagiti maudi a librona, agraman ti libro nga Apocalipsis. Daytoy a libro ti Biblia ibagana ti masanguanan. Itan ammuentayo no ania ti adda iti masanguanan.

Aramid 28:16-31; Filipos 1:13; 2:19-30; 4:18-23; Hebreo 13:23; Filemon 1-25; Colosas 4:7-9; 2 Timoteo 4:7-9.



Dagiti Saludsod

  • Siasino dagiti kinaskasabaan ni Pablo idi nakabalud idiay Roma?
  • Iti ladawan, siasino ti bisita nga agsursurat iti lamisaan, ket ania ti ar-aramidenna para ken ni Pablo?
  • Siasino ni Epafrodito, ket ania ti intugotna idi nagsubli idiay Filipos?
  • Apay a nagsurat ni Pablo ken ni Filemon a nasinged a gayyemna?
  • Ania ti inaramid ni Pablo idi nawayawayaan, ket ania ti napasamak kenkuana idi agangay?
  • Siasino ti inusar ni Jehova a mangisurat kadagiti maudi a libro ti Biblia, ket ania ti ibaga ti libro nga Apocalipsis?

Kanayonan a salsaludsod

  • Basaenyo ti Aramid 28:16-31 ken Filipos 1:13.

    Kasano nga inusar ni Pablo ti panawenna bayat a nakabalud idiay Roma, ket ania ti epektona iti kongregasion Kristiano ti di maisin a pammatina? (Ara. 28:23, 30; Fil. 1:14)

  • Basaenyo ti Filipos 2:19-30.

    Aniada a sasao ti panangapresiar ti inyebkas ni Pablo maipapan kada Timoteo ken Epafrodito, ket kasanotayo a matulad ti ehemplo ni Pablo? (Fil. 2:20, 22, 25, 29, 30; 1 Cor. 16:18; 1 Tes. 5:12, 13)

  • Basaenyo ti Filemon 1-25.

    Ania ti nakaibatayan ti panangdagadag ni Pablo ken ni Filemon nga agaramid iti umiso, ket kasano nga agserbi daytoy kas pagwadan kadagiti panglakayen ita? (Flm. 9; 2 Cor. 8:8; Gal. 5:13)

    Kasano a ti sasao ni Pablo a masarakan iti Filemon 13, 14 ipakitana a rinaemna ti konsiensia dagiti dadduma iti kongregasion? (1 Cor. 8:7, 13; 10:31-33)

  • Basaenyo ti 2 Timoteo 4:7-9.

    Kas ken apostol Pablo, kasanotayo a makapagtalek a gunggonaannatayto ni Jehova no agtalinaedtayo a matalek agingga iti panungpalan? (Mat. 24:13; Heb. 6:10)