Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 111: Ti Ubing a Nakatuglep

Estoria 111: Ti Ubing a Nakatuglep

AY! Aniat’ napasamak ditoyen? Nasaktan kadi unay ti ubing a nakaidda iti daga? Adtoy! Rumrummuar ni Pablo iti balay. Makitam met kadi ni Timoteo idiay? Aniat’ napasamak?

Umay pagungaren ni Pablo ni Eutico

Agpalpalawag ni Pablo kadagiti adalan ditoy Troas. Ammona a dina makita ida manen iti mabayag. Gapuna a nagpalawag agingganat’ tengnga ti rabii.

Toy ubing nga agnagan Eutico agtugtugaw iti bintana, ket isu ti nakalibay. Isut’ natinnag idiay bintana, tallo a kadsaaran inggana idiay daga. Isu a makitayo a madanagan dagiti tattao. Idi inakup dagiti lallaki ti ubing, nakitada a natayen.

Idi nakita ni Pablo a natayen ti ubing, nagpakleb kenkuana ket inagkanna. Sana kuna: ‘Dikay agdanag. Isut’ naimbag!’ Ken pudno met! Milagro dayta. Dakkel a rag-o ti immapay kadagiti tattao.

Immulida manen amin ket nanganda. Nagpalpalawag ni Pablo inggana a lumgaken ti lawag. Ngem masiguroyo a saanen a makaturog manen ni Eutico! Ket da Pablo, Timoteo ken ti kakaduada napandan iti barangay. Ammom kadi no sadinot’ papananda?

Agaw-awiden ni Pablo manipud maikatlo a panagdaliasatna a nangaskasaba. Iti daytoy a biahe naggian ni Pablo iti tallo a tawen a maymaysa idiay Efeso. Nabaybayag daytoy a biahe ngem daydiay maikadua.

Kalpasan ipapanawna idiay Troas, nagsardeng iti nabiit ti barangay idiay Mileto. Immay dagiti panglakayen ti kongregasion ti Efeso a dumngeg ti maudi ken Pablo. Ket idi oras a pumanawdan, anian ti ladingitda a makakita a mapanen ni Pablo.

Ket ti barangay nagsubli idiay Cesarea. Ditoy, pinakdaaran ni mammadto nga Agabo a maibaludto ni Pablo inton umay idiay Jerusalem. Agpaypayso, napasamak daytoy. Idi a naibalud ni Pablo ti dua a tawen idiay Cesarea, naipan ni Pablo a maukom idiay Roma. Kitaentayo ti napasamak iti panagdaliasat nga agturong idiay Roma.

Aramid kapitulo 19 ingganat’ 26.



Dagiti Saludsod

  • Iti ladawan, siasino ti ubing a nakaidda iti daga, ket ania ti napasamak kenkuana?
  • Ania ti inaramid ni Pablo idi nakitana a natayen ti ubing?
  • Sadino ti papanan da Pablo, Timoteo, ken dagidiay kakaduada nga agdaliasat, ket ania ti napasamak idi nagsardengda idiay Mileto?
  • Ania ti impakdaar ni mammadto nga Agabo ken ni Pablo, ket kasano a napasamak ti imbaga ti mammadto?

Kanayonan a salsaludsod

  • Basaenyo ti Aramid 20:7-38.

    Sigun iti sasao ni Pablo a nailanad iti Aramid 20:26, 27, kasanotayo a makapagtalinaed a ‘nadalus iti dara dagiti amin a tattao’? (Ezeq. 33:8; Ara. 18:6, 7)

    No mangisuro dagiti panglakayen, apay a rumbeng a ‘kumpetda a sititibker iti matalek a sao’? (Ara. 20:17, 29, 30; Tito 1:7-9; 2 Tim. 1:13)

  • Basaenyo ti Aramid 26:24-32.

    Kasano nga inusar ni Pablo ti kalinteganna kas umili ti Roma tapno maitungpalna ti annongenna a mangasaba nga inawatna ken Jesus? (Ara. 9:15; 16:37, 38; 25:11, 12; 26:32; Luc. 21:12, 13)