Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 110: Timoteo—Katulongan ni Pablo

Estoria 110: Timoteo—Katulongan ni Pablo

TI AGTUTUBO a makitam ditoy a kadua ni apostol Pablo isu ni Timoteo. Agtataeng ni Timoteo kadua ti pamiliada sadi Listra. Ti nanangna isu ni Eunice ket ti lolana isu ni Loida.

Ammom kadi ti ibagbaga ni Pablo ken Timoteo? ‘Kayatmo kadi ti kumuyog kaniak ken ni Silas?’ insaludsodna. ‘Makatulongka kadakami a mangaskasaba kadagiti tattao iti adayo a luglugar.’

Da Timoteo ken Pablo

Kuna ni Timoteo a kayatna ti umay. Ket pinanawan ni Timoteo ti pamiliada ket kimmuyog kada Pablo ken Silas. Ngem sakbay a maammuantay ti biaheda, kitaentayo ti mapaspasamak ken Pablo. Agangay 17 a tawenen nanipud nagparang ni Jesus kenkuana iti dalan nga agturong Damasco.

Laglagipem, immay ni Pablo idiay Damasco tapno saktanna dagiti adalan ni Jesus, ngem itan isut’ adalan metten! Dadduma a kabusor rantada a patayen ni Pablo, ngem tinulongan dagiti adalan a makatalaw. Inkabilda iti kuribot ket imbabada idiay ruar ti pader ti siudad.

Kalpasanna napan ni Pablo sadi Antioquia a mangasaba. Ditoy nga immuna a naawagan a Kristiano ti paspasurot ni Jesus. Ket da Pablo ken Bernabe naibaonda a mangaskasaba iti adayo a pagilian. Maysa kadagiti siudad a napananda isu ti Listra, ti ili ni Timoteo.

Ita, agangay makatawen kalpasanna, nagsubli ni Pablo idiay Listra iti maikadua a biahena. Idi kimmuyog ni Timoteo kada Pablo ken Silas, ammom kadi ti napananda? Kitaem ti mapa, ket adalentayo dagiti luglugar.

Immuna napanda idiay Iconio, sa iti maikadua a siudad nga agnagan Antioquia. Sada sinarungkaran ti Troas, Filipos, Tesalonica ken Berea. Sumaruno nangasaba ni Pablo idiay Atenas. Makitam kadi dayta iti mapa? Nangbusbosda ti makatawen ken kagudua idiay Corinto. Maudi napanda idiay Efeso. Sada nagsubli babaen iti barangay idiay Cesarea ket nagdaliasatda a napan Antioquia, a nagbatian ni Pablo.

Gapuna ginasgasut a milia ti dinaliasat ni Timoteo a nangtultulong ken Pablo a nangasaba ken nangrugi kadagiti baro a kongregasion. Inton dumakkelka, agbalinkanto met kadi a matalek nga adipen ti Dios, kas ken Timoteo?

Aramid 9:19-30; 11:19-26; kapitulo 13 ingganat’ 17; 18:1-22.

Maysa a mapa

1. Roma; 2. Melita; 3. Berea; 4. Tesalonica; 5. Corinto; 6. Filipos; 7. Atenas; 8. Creta; 9. Troas; 10. Efeso; 11. Mileto; 12. Colosas; 13. Antioquia; 14. Iconio; 15. Listra; 16. Chipre; 17. Antioquia; 18. Cesarea ; 19. Joppe; 20. Damasco ; 21. Jerusalem; 22. Ti Dakkel a Baybay (Mediteraneo)



Dagiti Saludsod

  • Siasino ti agtutubo a makitam iti ladawan, pagnanaedanna, ken ania ti nagan ti nanang ken ti lolana?
  • Ania ti kuna ni Timoteo idi dinamag ni Pablo no kayatna ti kumuyog kada Silas ken Pablo a mangasaba kadagiti tattao iti adayo a luglugar?
  • Sadino ti damo a nakaawagan dagiti pasurot ni Jesus kas Kristiano?
  • Idi nakapanawen da Pablo, Silas, ken Timoteo idiay Antioquia, ania dagiti sumagmamano a siudad a sinarungkaranda?
  • Ania ti naitulong ni Timoteo ken ni Pablo, ket ania ti rumbeng nga isaludsod dagiti agtutubo ita iti bagbagida?

Kanayonan a salsaludsod

  • Basaenyo ti Aramid 9:19-30.

    Kasano nga impakita ni apostol Pablo ti kinaannad idi naipasango iti ibubusor iti naimbag a damag? (Ara. 9:22-25, 29, 30; Mat. 10:16)

  • Basaenyo ti Aramid 11:19-26.

    Kasano a ti salaysay a nailanad iti Aramid 11:19-21, 26 ipakitana a ti espiritu ni Jehova iturturong ken iwanwanwanna ti trabaho a panangasaba?

  • Basaenyo ti Aramid 13:13-16, 42-52.

    Kasano nga ipakita ti Aramid 13:51, 52 a saan nga impalubos dagiti adalan a maupayda gapu iti ibubusor? (Mat. 10:14; Ara. 18:6; 1 Ped. 4:14)

  • Basaenyo ti Aramid 14:1-6, 19-28.

    Kasano a ti ebkas nga “intalekda ida ken Jehova” ket tumulong a mangbang-ar kadatayo iti aniaman a nalabes a pakaringgoran bayat a tultulongantayo dagiti kabbaro? (Ara. 14:21-23; 20:32; Juan 6:44)

  • Basaenyo ti Aramid 16:1-5.

    Kasano a ti situtulok a panagpakugit ni Timoteo ipaganetgetna a napateg ti panangaramid iti “amin a bambanag maigapu iti naimbag a damag”? (Ara. 16:3; 1 Cor. 9:23; 1 Tes. 2:8)

  • Basaenyo ti Aramid 18:1-11, 18-22.

    Ania ti ipasimudaag ti Aramid 18:9, 10 maipapan iti personal a panangiturong ni Jesus iti trabaho a panangasaba, ket ania ti ipanamnama dayta kadatayo ita? (Mat. 28:20)

Ammuem ti Ad-adu Pay

BIBLE CARD

Bible Card: Timoteo

Pinili ni Timoteo ti agserbi iti Dios uray idi agtutubo pay laeng. Kasanom a matulad ni Timoteo?

ISUROYO DAGITI ANNAKYO

Kayat ni Timoteo a Tulongan Dagiti Tattao

Kasano nga agbalin a naragsak ti biagmo kas ken Timoteo?