Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 109: Ni Pedro Sarungkaranna ni Cornelio

Estoria 109: Ni Pedro Sarungkaranna ni Cornelio

DAYTA sitatakder isu ni apostol Pedro, gagayyemna dagiti adda iti likudanna. Ngem apay agrukruknoy ti lalaki ken Pedro? Rebbeng kadi nga aramidenna dayta? Ammom kadi no asino dayta?

Panagkinnita da Pedro ken Cornelio

Ti lalaki isu ni Cornelio. Maysa nga opisial iti buyot a Romano. Naibaga kenkuana nga awisenna ni Pedro idiay balayda. Kitaentayo no apay.

Dagiti paspasurot ni Jesus ti Judioda. Ngem ni Cornelio saan a Judio. Ngem inayatna ti Dios ken adu a kinaimbag ti inararamidna kadagiti tattao. Maysa a malem nagparang ti anghel kenkuana ket kunana: ‘Maay-ayo ti Dios kenka ken sungbatanna ti karkararagmo. Agbaonka ti tattao a mangala iti maysa a lalaki nga agnagan Pedro. Aggigian idiay Joppe iti balay ni Simon.’

Dagdagus, nagbaon ni Cornelio ti mangala ken Pedro. Iti sumaganad nga aldaw, adda ni Pedro idiay plastado nga atep ti balay ni Simon. Idiay pinagpanunot ti Dios a nakakita ti dakkel a lupot a napunno ti amin a kita ti an-animal. Sigun iti linteg ti Dios, narugit dagitoy a pagtaraon, ngem kuna ti timek: ‘Bumangonka, Pedro. Mangpartika ket manganka.’

‘Saan!’ kuna ni Pedro. ‘Diak pay nagsidsida ti narugit.’ Ngem ti timek kunana: ‘Dika kunaen a narugit ti dinalusanen ti Dios.’ Namitlo a napasamak daytoy, ket pinampanunot ni Pedro ti kaipapananna. Simmangpet dagiti imbaon ni Cornelio ket dinamagda ni Pedro.

Bimmaba ni Pedro tapno sabtenna ida. Inlawlawagda a maysa nga anghel ti nangibaga ken Cornelio nga awisenna ni Pedro idiay balayna. Immanamong a kumuyog ni Pedro, ket kabigatanna nagluasen ken ti gagayyemna.

Idi nakagtengen ni Pedro, simmabat ni Cornelio. Nagparintumeng ken nagruknoy iti saksaka ni Pedro, kas makitam ditoy. Ngem kuna ni Pedro: ‘Tumakderka; taoak met kas kenka.’ Wen, ipakita ti Biblia a di umiso ti agruknoy ken agdayaw iti tao. Ni laeng Jehova ti rebbeng a pagdayawantayo.

Itan nangasaban ni Pedro kadagiti nagtataripnong. Bayat nga agpalpalawag, bimmaba ti nasantuan nga espiritu ti Dios, ket ti tattao agsaodan ti nagduduma a sasao. Nagsiddaaw dagiti adalan a Judio a kimmuyog ken Pedro, ta kunada no dagiti Judio laeng ti pinaraburan ti Dios. Itan ammodan a di ibilang ti Dios dagiti tattao iti maysa a rasa a nasaysayaat wenno importante ngem iti sabali a rasa. Saan kadi a nagsayaat daytoy a laglagipentay amin?

Aramid 10:1-48; 11:1-18; Apocalipsis 19:10.



Dagiti Saludsod

  • Iti ladawan, siasino ti lalaki nga agrukruknoy?
  • Ania ti imbaga ti maysa nga anghel ken ni Cornelio?
  • Ania ti impakita ti Dios ken ni Pedro idi adda ni Pedro iti plastado nga atep ti balay ni Simon idiay Joppe?
  • Apay nga imbaga ni Pedro a saan a rumbeng nga agruknoy ken agdayaw kenkuana ni Cornelio?
  • Apay a nagsiddaaw dagiti adalan a Judio a kimmuyog ken ni Pedro?
  • Ania ti napateg a leksion a masursurotayo iti panangsarungkar ni Pedro ken ni Cornelio?

Kanayonan a salsaludsod

  • Basaenyo ti Aramid 10:1-48.

    Ania ti ipakita dagiti sasao ni Pedro a masarakan iti Aramid 10:42 maipapan iti trabaho a panangikasaba iti naimbag a damag ti Pagarian? (Mat. 28:19; Mar. 13:10; Ara. 1:8)

  • Basaenyo ti Aramid 11:1-18.

    Ania a kababalin ti imparangarang ni Pedro idi bimmatad ti bilin ni Jehova maipapan kadagiti Gentil, ket kasanotayo a matulad ti ehemplona? (Ara. 11:17, 18; 2 Cor. 10:5; Efe. 5:17)

Ammuem ti Ad-adu Pay

Saan a Mangidumduma ti Dios

Ania a napateg a leksion ti masursurotayo iti ibibisita ni Pedro ken ni Cornelio?