Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 108: Iti Dalan Agturong Damasco

Estoria 108: Iti Dalan Agturong Damasco

AMMOM kadi no asino daydiay nakaidda iti daga? Isu ni Saulo. Malagipmo, isut’ nangbantay ti kagkagay dagidiay lallaki a nangubor ken Esteban. Kitaem ti naraniag a lawag! Aniat’ mapaspasamak?

Kalpasan a napapatay ni Esteban, inadauloan ni Saulo ti panangsapsapul kadagiti pasurot ni Jesus tapno saktanna ida. Adu nga adalan ti nagkamang iti dadduma a siudad ken inwaragawagda ti “naimbag a damag” sadiay. Ngem napan met ni Saulo kadagiti siudad tapno birokenna dagiti pasurot ni Jesus. Isu itan ti agturong idiay Damasco. Ngem iti dalanna adda napasamak a nakaskasdaaw a banag!

Maysa a lawag manipud langit ti gimmilap iti aglawlaw ni Saulo. Napasag iti daga, kas makitatay ditoy. Kuna ti maysa a timek: ‘Saulo, Saulo! Apay saksaktannak?’ Dagiti kadua ni Saulo nakitada ti lawag, nangngegda ti timek, ngem awan maaw-awatanda.

Nabulsek ni Saulo babaen iti lawag

‘Asinoka, Apo?’ insaludsod ni Saulo.

‘Siak ni Jesus, a saksaktam,’ kuna ti timek. Kuna ni Jesus daytoy, ta no saksaktan ni Saulo dagiti pasurot ni Jesus, kasla ni Jesus metten ti masaksaktan.

Ita insaludsod ni Saulo: ‘Aniat’ aramidek, Apo?’

‘Bumangonka ket inka idiay Damasco,’ kuna ni Jesus. ‘Idiay maibaganto no aniat’ aramidem.’ Idi imurikat ni Saulo ti matana, naammuanna nga isut’ nabulsek! Isu a kinibin dagiti kaduana ingganat’ Damasco.

Ita nagsao ni Jesus ken adalanna nga Ananias idiay Damasco. Imbagana a mapan idiay paggigianan ni Saulo. ‘Pinilik nga agbalin a naisangsangayan nga adipenko,’ kuna ni Jesus.

Nagtulnog ni Ananias. Nasarakanna ni Saulo ket impatayna ti imana kenkuana ken kunana: ‘Imbaonnak ti Apo tapno makakitaka ken mapunnoka ti nasantuan nga espiritu.’ Dagus, nakakitan ni Saulo.

Nausar iti dakkel unay ni Saulo a nangaskasaba kadagiti tattao iti adu a nasnasion. Nagbalin a nalatak kas apostol Pablo, a maammuantayto pay ti ad-adu. Ngem umuna, kitaentayo no aniat’ nangibaonan ti Dios ken Pedro nga aramiden.

Aramid 8:1-4; 9:1-20; 22:6-16; 26:8-20.



Dagiti Saludsod

  • Ania ti inaramid ni Saulo kalpasan a napapatay ni Esteban?
  • Ania a nakaskasdaaw a banag ti napasamak idi adda ni Saulo iti dalanna nga agturong idiay Damasco?
  • Ania ti imbaga ni Jesus nga aramiden ni Saulo?
  • Ania ti imbaga ni Jesus ken ni Ananias, ket kasano a nakakita manen ni Saulo?
  • Ania ti nagbalin a nalatak a nagan ni Saulo, ket nakausaranna?

Kanayonan a salsaludsod

  • Basaenyo ti Aramid 8:1-4.

    Kasano a ti agsasaruno a pannakaidadanes a napasaran ti kabbuangay a kongregasion Kristiano ket nakatulong iti pannakaisaknap ti Nakristianuan a pammati, ket ania nga umasping a banag ti napasamak iti moderno a panawen? (Ara. 8:4; Isa. 54:17)

  • Basaenyo ti Aramid 9:1-20.

    Ania dagiti tallo a mision nga impalgak ni Jesus nga aramiden ni Saul? (Ara. 9:15; 13:5; 26:1; 27:24; Roma 11:13)

  • Basaenyo ti Aramid 22:6-16.

    Kasanotayo nga agbalin a kas ken Ananias, ket apay a napateg dayta? (Ara. 22:12; 1 Tim. 3:7; 1 Ped. 1:14-16; 2:12)

  • Basaenyo ti Aramid 26:8-20.

    Kasano a ti pannakakomberte ni Saul iti Kristianidad ket agserbi kas pammaregta kadagidiay addaan iti di manamati nga asawa ita? (Ara. 26:11; 1 Tim. 1:14-16; 2 Tim. 4:2; 1 Ped. 3:1-3)

Ammuem ti Ad-adu Pay

Bible Card: Pablo

Ania a trabaho ti inaramid ni Pablo tapno adda pangsuportana iti ministeriona? Usarem daytoy a Bible card tapno maammuam.