Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 107: Inuborda ni Esteban

Estoria 107: Inuborda ni Esteban

TI LALAKI a nakaparintumeng ditoy isu ni Esteban. Isu ti matalek nga adalan ni Jesus. Ngem kitaem dagidiay tattao a mangbatbato kenkuana! Apay nga ar-aramidenda daytoy a kinadakes? Kitaentayo.

Maub-ubor ni Esteban

Tultulongan ti Dios ni Esteban nga agaramid ti nakaskasdaaw a milagro. Dagitoy a lallaki saanda kayat daytoy, isu a nakisuppiatda kenkuana. Ngem ti Dios inikkanna ni Esteban ti dakkel a kinasirib, ket impakita ni Esteban nga ulbod ti insursuro dagitoy a tattao. Daytoy ti ad-adda a namagpungtot kadakuada. Gapuna tiniliwda ket inawaganda ti tattao a nagulbod maipapan kenkuana.

Sinaludsodan ti nangato a padi ni Esteban: ‘Pudno kadi dagitoy a bambanag?’ Simmungbat ni Esteban babaen ti panangtedna ti nagpintas a palawag manipud Biblia. Iti udina kunana: ‘Kaskay la kadagiti dakes a tattao a nanggura kadagiti mammadto ti Dios idi unana. Pinatayyo ti adipen ti Dios, a ni Jesus.’

Daytoy ti nakapungtotan unay dagitoy relihiuso a papangulo! Ngem kinuna ni Esteban: ‘Adtoy! Makitkitak ni Jesus a sitatakder iti makannawan ti Dios idiay langit.’ Iti daytoy, kinemmeg dagitoy a lallaki ni Esteban ket ingguyodda iti ruar ti siudad.

Ditoy inussobda ti kagkagayda ket intedda nga aywanan ti agtutubo a lalaki a ni Saulo. Makitam kadi ni Saulo? Kalpasanna dadduma kadagiti lallaki inubordan ni Esteban. Nagparintumeng ni Esteban, kas makitkitam, ket nagkararag iti Dios: ‘Jehova, dika dusaen ida gapu itoy a kinadakes.’ Ammona a dadduma kadakuada ti inallilaw dagiti relihiuso a papangulo. Kalpasan dayta, natayen ni Esteban.

No adda agaramid ti dakes kadakayo, saktam met aya ida? Di inaramid ni Esteban ken Jesus dayta. Tuladentayo ti ulidanda.

Aramid 6:8-15; 7:1-60.



Dagiti Saludsod

  • Siasino ni Esteban, ket tinultulongan ti Dios a mangaramid iti ania?
  • Ania ti imbaga ni Esteban a nakapungtotan unay dagiti relihioso a papangulo?
  • Idi a dagiti lallaki ingguyodda ni Esteban iti ruar ti siudad, ania ti inaramidda kenkuana?
  • Iti ladawan, siasino ti agtutubo a lalaki nga agtaktakder iti abay ti kagkagay?
  • Sakbay a natay ni Esteban, ania ti inkararagna ken ni Jehova?
  • Kas panangtulad ken ni Esteban, ania ti masapul nga aramidentayo no adda agaramid iti dakes kadatayo?

Kanayonan a salsaludsod

  • Basaenyo ti Aramid 6:8-15.

    Ania a panangallilaw ti ar-aramiden dagiti panguluen ti relihion iti panangpadasda a mangpasardeng iti trabaho a panangasaba dagiti Saksi ni Jehova? (Ara. 6:9, 11, 13)

  • Basaenyo ti Aramid 7:1-60.

    Ania ti timmulong ken ni Esteban nga agbalin nga epektibo iti panangikalinteganna iti naimbag a damag iti saklang ti Sanhedrin, ket ania ti masursurotayo iti ehemplona? (Ara. 7:51-53; Roma 15:4; 2 Tim. 3:14-17; 1 Ped. 3:15)

    Ania a kababalin ti masapul a sukayentayo iti pannakilangen kadagiti bumusbusor iti trabahotayo? (Ara. 7:58-60; Mat. 5:44; Luc. 23:33, 34)