Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 106: Naibulos iti Pagbaludan

Estoria 106: Naibulos iti Pagbaludan

KITAEM ti anghel ditoy a tengtenglenna a silulukat ti ruangan ti pagbaludan. Pinalubosanna dagiti apostoles ni Jesus. Apay kadi a naibaludda?

Waywayawayaan ti maysa nga anghel dagiti apostol

Maysa a malem, di nagbayag kalpasan pannakaiparukpok ti nasantuan nga espiritu iti ad-adalan ni Jesus, mapmapan da Pedro ken Juan idiay templo ti Jerusalem. Iti dumna ti ruangan adda agpalpalimos, a lugpin manipud pannakaiyanakna. Idi nakitana da Pedro ken Juan, nagpakpakaasi a mangtedda ti aniaman kenkuana. Aniat’ aramiden itan dagiti apostol?

Kuna ni Pedro: ‘Awan pirakko, ngem itdek kenka ti adda kaniak. Iti nagan ni Jesus, tumakderka ket magnaka!’ Dagdagus, naglagto ti lalaki ket mangrugin a magna. Idi nakita dagiti tattao daytoy, nagsiddaaw ken maragsakanda unay.

‘Inaramidmi daytoy babaen ti pannakabalin ti Dios, a nangbangon ken Jesus manipud ken patay,’ kuna ni Pedro. Iti dayta a kanito, immayen dagiti relihiuso a papangulo. Makaungetda ta ibagbaga da Pedro ken Juan a nagungar ni Jesus kadagiti natay. Gapuna impaibaludda ida.

Iti sumaganad nga aldaw, ni Pedro ken Juan, agraman tao a pinaimbagda, ti naiyeg iti sanguanan dagiti relihiuso a papangulo. ‘Babaen iti ania a pannakabalin nga inaramidyo daytoy a milagro?’ insaludsodda.

Imbaga ni Pedro a daytat’ babaen iti pannakabalin ti Dios, a namagungar ken Jesus kadagiti natay. Di ammo dagiti papadi no aniat’ aramidenda, ta dida mailibak a pudno a napasamak ti maysa a milagro. Gapuna imbilinda kadagiti apostoles a saandan nga agsasao maipapan ken Jesus, ket sada winayawayaan ida.

Iti panaglabas dagiti al-aldaw, intultuloy dagiti apostoles ti nangaskasaba maipapan ken Jesus ken nangag-agas kadagiti masakit. Nagsaknap ti damag, ket dagiti tattao manipud il-ili iti aglawlaw ti Jerusalem inyegda dagiti masakitda tapno agasan dagiti apostoles. Daytoy ti nagimunan dagiti relihiuso a papangulo, isu nga impaibaludda dagiti apostoles. Ngem saanda nga agbayag idiay.

Iti rabii, luktan ti anghel ti Dios ti ruangan ti pagbaludan, kas makitkitayo ditoy. Kunana: ‘Inkayo ket sawenyo kadagiti tattao idiay templo.’ Iti sumaganad a bigat, nakita dagiti relihiuso a papangulo nga awanen dagiti apostoles. Kalpasanna, makitada ida a mangisursuro idiay templo, ket inyegda ida idiay Sanhedrin.

‘Imbilinmi a siiirut kadakayo a dikayon isursuro ti maipapan ken Jesus,’ kuna dagiti relihiuso a papangulo. ‘Ngem pinunnoyo ti Jerusalem kadagiti pannursuroyo.’ Simmungbat dagiti apostoles: ‘Masapul nga agtulokkami a nangnangruna iti Dios ngem kadagiti tao.’ Gapuna intultuloyda nga insursuro ti “naimbag a damag.” Di aya nagpintas nga ulidan a surotentay dayta?

Aramid kapitulo 3 ingganat’ 5.



Dagiti Saludsod

  • Iti maysa a malem, ania ti napasamak kada Pedro ken Juan bayat a mapmapanda idiay templo?
  • Ania ti imbaga ni Pedro iti lugpi, ket ania ti inted kenkuana ni Pedro a napatpateg ngem iti pirak?
  • Apay a nakaunget dagiti relihioso a papangulo, ket ania ti inaramidda kada Pedro ken Juan?
  • Ania ti imbaga ni Pedro kadagiti relihioso a papangulo, ket ania ti imbilin dagita a papangulo kadagiti apostol?
  • Apay a nagimon dagiti relihioso a papangulo, ngem ania ti napasamak idi naibalud dagiti apostol iti maikadua a gundaway?
  • Kasano a simmungbat dagiti apostol idi naiyegda idiay Sanhedrin?

Kanayonan a salsaludsod

  • Basaenyo ti Aramid 3:1-10.

    Nupay saantayo a naikkan iti pannakabalin a mangaramid kadagiti milagro ita, kasano a dagiti sasao ni Pedro a nailanad iti Aramid 3:6 tulongannatayo a mangapresiar iti pateg ti mensahe ti Pagarian? (Juan 17:3; 2 Cor. 5:18-20; Fil. 3:8)

  • Basaenyo ti Aramid 4:1-31.

    No maipasangotayo iti ibubusor iti ministerio, iti ania a pamay-an a masapul a tuladentayo dagiti Kristiano a kakabsattayo idi umuna a siglo? (Ara. 4:29, 31; Efe. 6:18-20; 1 Tes. 2:2)

  • Basaenyo ti Aramid 5:17-42.

    No maipapan iti trabaho a panangasaba, kasano a nagbalin a nainkalintegan dagiti sumagmamano a saan a Saksi, iti napalabas ken iti agdama? (Ara. 5:34-39)

Ammuem ti Ad-adu Pay

Bible Card: Pedro

Ammuem ti maipapan iti daytoy a matalek nga apostol.