Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 105: Panaguray Idiay Jerusalem

Estoria 105: Panaguray Idiay Jerusalem

DAGITOY a tattao paspasurot ida ni Jesus. Nagtalinaedda idiay Jerusalem, kas kinuna ni Jesus. Ita, bayat nga agururayda amin, ti napigsa nga ungor ti nangpunno iti balay. Kasla nagpigsa nga angin dayta. Ket, nagparang dagiti dildila ti apuy iti ul-ulo dagiti adalan. Makitam kadi ida? Aniat’ kaipapanan dayta?

Ti nasantuan nga espiritu kadagiti adalan idi umuna a siglo

Daytat’ maysa a milagro! Nakasublin ni Jesus idiay langit, ket ibukbukboknan ti nasantuan nga espiritu ti Dios kadagiti paspasurotna. Ammom kadi no aniat’ pinaaramid ti espiritu kadakuada? Nangrugida nga agsaon ti nagduduma a pagsasao!

Adu a tattao ti Jerusalem ti nakangngeg ti ungor, ket immayda a kumita no aniat’ mapaspasamak. Dadduma ti naggapu iti dadduma a nasnasion. Anian ti pannakakellaatda! Nangngegda dagiti adalan nga agsasao ti mismo a pagsasaoda, ken ibagbagada dagiti nakaskasdaaw nga inar-aramid ti Dios.

Nagsiddaaw dagiti bisita no kasano a dagiti taga Galilea makapagsaoda ti adu a nagduduma a pagsasao. Gapuna nagtakder ni Pedro a mangilawlawag kadakuada. Imbagana no kasano a napapatay ni Jesus, ken isut’ pinagungar ni Jehova kadagiti natay. ‘Itan addan ni Jesus idiay langit iti makannawan ti Dios,’ kuna ni Pedro. ‘Ket imparukpokna ti naikari a nasantuan nga espiritu. Isut’ gapuna a nakitayo ken nangngegyo dagitoy a milagro.’

Idi a nasao ni Pedro dagitoy, naladingitan ti adu a tattao maipapan iti inaramidda ken Jesus. ‘Aniat’ inkam aramiden?’ insaludsodda. Imbaga ni Pedro kadakuada: ‘Masapul a baliwanyo ti panagbiagyo ket mabautisarankayo.’ Iti dayta nga aldaw, 3,000 a tattao ti nabautisaran ken nagbalin a paspasurot ni Jesus.

Aramid 2:1-47.



Dagiti Saludsod

  • Kas ipakita ti ladawan, ania ti napasamak kadagiti pasurot ni Jesus nga agur-uray idiay Jerusalem?
  • Ania ti nakakellaatan dagiti bimmisita idiay Jerusalem?
  • Ania ti inlawlawag ni Pedro kadagiti tattao?
  • Ania ti narikna dagiti tattao kalpasan a dimngegda ken ni Pedro, ket ania ti imbaga ni Pedro nga aramidenda?
  • Mano a tattao ti nabautisaran iti dayta nga aldaw ti Pentecostes, 33 K.P.?

Kanayonan a salsaludsod

  • Basaenyo ti Aramid 2:1-47.

    Kasano a dagiti sasao ni Pedro a masarakan iti Aramid 2:23, 36 ipakitana nga adda sungsungbatan ti intero a nasion dagiti Judio iti ipapatay ni Jesus? (1 Tes. 2:14, 15)

    Kasano a nangipasdek ni Pedro iti nasayaat nga ulidan no iti pannakirinnason babaen ti panangusar iti Kasuratan? (Ara. 2:16, 17, 29, 31, 36, 39; Col. 4:6)

    Kasano nga inusar ni Pedro ti umuna kadagiti “tulbek ti pagarian ti langlangit,” nga inkari ni Jesus nga ited kenkuana? (Ara. 2:14, 22-24, 37, 38; Mat. 16:19)

Ammuem ti Ad-adu Pay

Ginasut ti Nakakita Kenkuana Sakbay ti Pentecostes

Iti baet ti panagungarna ken ti ipapanna idiay langit, maulit-ulit nga impaganetget ni Jesus kadagiti adalanna ti awatendanto ken ti pangusaranda iti dayta.