Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 103: Iti Sipupunit a Kuarto

Estoria 103: Iti Sipupunit a Kuarto

KALPASAN ipapanaw da Pedro ken Juan iti tanem, maymaysan ni Maria. Isu ti agsangiten. Idi kuan nakitana ti dua nga anghel idiay uneg ti tanem, kas nakitatayo iti napalabas a retrato. Sinaludsodanda ni Maria: ‘Apay agsangsangitka?’

Simmungbat ni Maria: ‘Impanawda ti Apok, ket diak ammo ti nangikabilanda kenkuana.’ Kalpasanna nakakita ni Maria ti lalaki iti likudanna. Kunana: ‘Asino ti birbirokem?’

Impato ni Maria a ti lalaki ket hardinero, gapuna kunana: ‘No isu impanawmo, ibagam kaniak no sadino ti nangikabilam kenkuana.’ Ngem, ti kinapudnona, ti lalaki ket isu ni Jesus. Isut’ nangikabil ti bagi a di nailasin ni Maria. Ngem idi awaganna ti naganna, ammo ni Maria nga isu daytoyen ni Jesus, ket nagtarayen tapno ibagana kadagiti adalan.

Iti maudi a paset dayta nga aldaw, idi magmagna ti dua nga adalan nga agturong idiay Emmaus, kimmuyog ti maysa a lalaki kadakuada. Naladingit dagiti adalan, ngem ti lalaki adu ti inlawlawagna kadakuada manipud Biblia ket simmayaat ti riknada. Idi nagsardengda a mangan, nabigbig dagiti adalan nga isu ni Jesus. Ket nagpukawen ni Jesus, ngem dagitoy dua nga adalan nagsublida pay idiay Jerusalem tapno ibaga kadagiti apostoles.

Kabayatanna, nagparang met ni Jesus ken Pedro. Ket bayat nga ibagbagana kadagiti dadduma maipapan dayta, dagitoy dua nga adalan ti nakakita kadakuada ket imbagada met ti kapadasanda. Ket ammom kadi ti simmaruno a napasamak?

Kitaem ti retrato. Nagparang ni Jesus idiay mismo a kuarto, uray no sipupunit ti ruangan. Anian ti ragsak dagiti adalan! Saan kadi a nagragsak nga aldaw dayta? Mabilangmo kadi no naminanon a nagparang ni Jesus kadagiti paspasurotna? Lima daras kadi ti nabilangmo?

Nagpakita ni Jesus kadagiti adalan

Awan idi ni apostol Tomas idi nagparang ni Jesus. Isu a kunana a mamatinto laeng no makitanan ni Jesus mismo. Walo nga aldaw kalpasanna, naguurnong manen dagiti adalan iti sipupunit a kuarto, ket apaman latta ta, nagparang manen ni Jesus. Itan kaduadan ni Tomas, ket isut’ mamati itan.

Juan 20:11-29; Lucas 24:13-43.



Dagiti Saludsod

  • Ania ti imbaga ni Maria iti maysa a lalaki nga impatona a hardinero, ngem kasanona a nailasin nga isu dayta ni Jesus?
  • Ania ti napasamak kadagiti dua nga adalan a magmagna nga agturong idiay Emmaus?
  • Ania ti napasamak idi a dagiti dua nga adalan ibagbagada kadagiti apostol a nakitada ni Jesus?
  • Mano a daras a nagparang ni Jesus kadagiti pasurotna?
  • Ania ti imbaga ni Tomas idi nangngegna a ni Jesus ket nakita dagiti adalan, ngem ania ti napasamak kalpasan ti walo nga aldaw?

Kanayonan a salsaludsod

  • Basaenyo ti Juan 20:11-29.

    Iti Juan 20:23, ibagbaga kadi ni Jesus nga autorisado dagiti tattao a mangpakawan kadagiti basol? Ilawlawagmo. (Sal. 49:2, 7; Isa. 55:7; 1 Tim. 2:5, 6; 1 Juan 2:1, 2)

  • Basaenyo ti Lucas 24:13-43.

    Kasanotayo a maisagana ti pusotayo tapno sidadaan nga umawat kadagiti kinapudno a masarakan iti Biblia? (Luc. 24:32, 33; Esd. 7:10; Mat. 5:3; Ara. 16:14; Heb. 5:11-14)

Ammuem ti Ad-adu Pay

Ginasut ti Nakakita Kenkuana Sakbay ti Pentecostes

Iti baet ti panagungarna ken ti ipapanna idiay langit, maulit-ulit nga impaganetget ni Jesus kadagiti adalanna ti awatendanto ken ti pangusaranda iti dayta.