Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 98: Idiay Bantay ti Olivo

Estoria 98: Idiay Bantay ti Olivo

DAYTOY ni Jesus idiay Bantay ti Olivo. Ti uppat a lallaki a kaduana isu dagiti apostolesna. Isuda da Andres, Pedro, Santiago ken Juan. Makitkitam kadi ti templo ti Dios idiay Jerusalem iti adayo?

Martes idi, dua nga aldaw kalpasan ti panaglugan ni Jesus a simrek iti Jerusalem iti urbon nga asno. Iti bigbigat dayta nga aldaw, kayat a tiliwen dagiti papadi ni Jesus tapno patayen. Ngem agbutengda a mangaramid iti daytoy ta kaykayat dagiti tattao ni Jesus.

Ni Jesus ken dagiti apostolna

Imbaga ni Jesus kadagidiay relihiuso a papangulo a dusaen ti Dios ida gapu kadagiti kinadakes nga aramidenda. Kalpasan dayta, simmang-at ni Jesus iti Bantay ti Olivo, ket rinugian dagitoy uppat nga apostoles ti nagsalsaludsod kenkuana. Kayatda a maammuan no kaano a pagpatinggaen ni Jesus amin a kinadakes ken umay manen nga agturay kas ari.

Ammo ni Jesus a dagiti pasurotna ditoy daga didanto makita inton umay manen. Ngamin ta isunto ti adda idiay langit. Gapuna imbaga ni Jesus kadagiti adalanna ti bambanag a mapasamakto ditoy daga inton agturturayen kas Ari idiay langit.

Kuna ni Jesus nga addanto dadakkel a gubgubat, adunto a tattao ti agsakit ken mabisin, dumakes unay ti krimen ken dadakkel a ginggined. Kuna pay ni Jesus a ti naimbag a damag ti pagarian ti Dios maikaskasabanto iti intero a daga. Makitkitatay kadin a mapaspasamak dagitoy iti tiempotayo? Wen! Ngarud makasigurotayo a ni Jesus agturturayen idiay langit. Iti mabiiten pagpatinggaennan amin a kinadakes ditoy daga.

Mateo 21:46; 23:1-39; 24:1-14; Marcos 13:3-10.



Dagiti Saludsod

  • Iti ladawan, siasino kadakuada ni Jesus, ken siasino dagiti kakaduana?
  • Ania ti kayat nga aramiden dagiti papadi ken ni Jesus idiay templo, ket ania ti imbagana kadakuada?
  • Ania ti insaludsod dagiti apostol ken ni Jesus?
  • Apay nga imbaga ni Jesus kadagiti apostolna ti sumagmamano kadagiti banag a mapasamakto ditoy daga inton agturay kas Ari idiay langit?
  • Ania ti imbaga ni Jesus a mapasamak sakbay a pagpatinggaenna ti amin a kinadakes ditoy daga?

Kanayonan a salsaludsod

  • Basaenyo ti Mateo 23:1-39.

    Nupay ipasimudaag ti Kasuratan a mabalin ti agusar kadagiti sekular a titulo, ania ti ipakita dagiti sasao ni Jesus iti Mateo 23:8-11 maipapan iti panagusar kadagiti pammasablog a titulo iti kongregasion Kristiano? (Ara. 26:25; Roma 13:7; 1 Ped. 2:13, 14)

    Ania ti inusar dagiti Fariseo tapno malapdanda dagiti tattao nga agbalin a Kristiano, ket kasano nga us-usaren dagiti narelihiosuan a panguluen dagiti isu met la a taktika iti moderno a panawen? (Mat. 23:13; Luc. 11:52; Juan 9:22; 12:42; 1 Tes. 2:16)

  • Basaenyo ti Mateo 24:1-14.

    Iti Mateo 24:13, kasano a naipaganetget ti pateg ti panagibtur?

    Ania ti kaipapanan ti sao a “panungpalan” iti Mateo 24:13? (Mat. 16:27; Roma 14:10-12; 2 Cor. 5:10)

  • Basaenyo ti Marcos 13:3-10.

    Ania nga ebkas iti Marcos 13:10 ti mangipakita iti kinaganat ti panangikasaba iti naimbag a damag, ket kasanotayo koma a maapektaran iti sasao ni Jesus? (Roma 13:11, 12; 1 Cor. 7:29-31; 2 Tim. 4:2)

Ammuem ti Ad-adu Pay

Nagkiddaw Dagiti Apostol iti Pagilasinan

Umuna a natungpal ti padtona idi umuna a siglo. Addanto kadi met maudi ken dakdakkel a kaitungpalanna?

Asideg Kadin ti Panungpalan?

Kitaem ti uppat a pagilasinan ti panungpalan ti lubong a nadakamat iti Biblia.