Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 97: Immay ni Jesus kas Ari

Estoria 97: Immay ni Jesus kas Ari

NI JESUS immay iti bassit a purok nga asidegen idiay Jerusalem. Imbagana kadagiti dua nga adalanna: ‘Inkay iti dayta a purok ket makakitakayo ti urbon nga asno. Warwaranyo ket iyegyo kaniak.’

Ket nagsakay ni Jesus iti asno, ket naglugan a nagturong iti Jerusalem a di unayen adayo. Ti dakkel a bunggoy dagiti tattao ti immay simmabat kenkuana. Kaaduan kadakuada ti nangikabil ti kagayda iti dalan. Dadduma nangalada ti sangsanga manipud kaykayo a palma ket inkabilda met dagitoy iti dalan. Nagpukkawda: ‘Bendisionan ti Dios ti ari nga umay iti nagan ni Jehova.’

Ab-abrasaen dagiti tattao ni Jesus

Idi un-unana idiay Israel agsakay dagiti baro nga ar-ari nga agturong idiay Jerusalem iti urbon nga asno tapno ipakitada ti bagbagida kadagiti tattao. Isu daytoy ti ar-aramiden ni Jesus. Ket ipakpakita dagitoy a tattao a kayatda nga agari ni Jesus kadakuada. Ngem saan amin a tattao ti mayat kenkuana. Makitatay daytoy babaen iti napasamak idi napan ni Jesus idiay templo.

Idiay templo, pinaimbag ni Jesus dagiti bulsek ken lugpi. Idi nakita daytoy dagiti ub-ubbing, indaydayawda ni Jesus. Ngem nakapungtot dagiti papadi ket kunada ken Jesus: ‘Mangngegmo aya ti ibagbaga dagiti ubbing?’ Simmungbat ni Jesus: ‘Dikay kadi nabasa ti kunana idiay Biblia: “Manipud ngiwat dagiti maladaga ti Dios mangyegto ti dayaw?” ’ Gapuna intultuloy dagiti ubbing ti nangidaydayaw ken Jesus.

Kayattayo ti agbalin kas kadagidiay nga ub-ubbing, saan kadi? Aniaman ti ibaga ti dadduma a tattao, itultuloytay latta nga ibaga kadagiti dadduma dagiti nakaskasdaaw a bambanag nga aramidento ni Jesus kadagiti tattao.

Kaanonto ngata ti panangrugi ni Jesus nga agturay kas ari? Isu daytoy ti sumaganad a basaentayo.

Mateo 21:1-17; Juan 12:12-16.



Dagiti Saludsod

  • Idi napan ni Jesus iti bassit a purok nga asideg idiay Jerusalem, ania ti imbagana nga aramiden dagiti adalanna?
  • Iti ladawan, ania ti napasamak idi asidegen ni Jesus iti siudad ti Jerusalem?
  • Ania ti inaramid dagiti ubbing idi nakitada ni Jesus a mangpapaimbag kadagiti tattao a bulsek ken lugpi?
  • Ania ti imbaga ni Jesus kadagiti makapungtot a papadi?
  • Kasanotayo nga agbalin a kas kadagiti ubbing a nangidaydayaw ken ni Jesus?

Kanayonan a salsaludsod

  • Basaenyo ti Mateo 21:1-17.

    Kasano a ti iseserrek ni Jesus idiay Jerusalem kas Ari ket naiduma kadagiti naballigi a heneral idi panawen dagiti Romano? (Mat. 21:4, 5; Zac. 9:9; Fil. 2:5-8; Col. 2:15)

    Ania ti masursuro dagiti agtutubo manipud kadagiti Israelita nga ubbing a lallaki a nangadaw iti Salmo 118 idi simrek ni Jesus idiay templo? (Mat. 21:9, 15; Sal. 118:25, 26; 2 Tim. 3:15; 2 Ped. 3:18)

  • Basaenyo ti Juan 12:12-16.

    Ania ti isimbolo dagiti sanga ti palma nga inusar dagiti tattao a nangidaydayaw ken ni Jesus? (Juan 12:13; Fil. 2:10; Apoc. 7:9, 10)

Ammuem ti Ad-adu Pay

Simrek ti Ari iti Jerusalem a Nakasakay iti Urbon nga Asno

Tinungpalna ti lima-gasut a tawenen a padto.