Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 96: Inagasan ni Jesus Dagiti Masakit

Estoria 96: Inagasan ni Jesus Dagiti Masakit

BAYAT nga agdaldaliasat ni Jesus iti intero a daga, inagasanna dagiti masakit. Adut’ nakangngeg iti daytoy, ket inyegda dagiti lugpi, bulsek ken tuleng, ken dadduma pay a masakit. Ket pinaimbag amin ni Jesus ida.

Nalabes a tallo tawenen nanipud ni Juan binautisaranna ni Jesus. Ket imbaga ni Jesus kadagiti apostolesna a dandanin mapan idiay Jerusalem nga idiay ti pakapapatayanna, santo agungar manipud ken patay.

Pinaimbag ni Jesus ti masakit a babai

Maysa nga aldaw mangisursuro ni Jesus iti maysa a Sabbath. Ti Sabbath ket isut’ aldaw a panaginana dagiti Judio. Ti babai a makitkitam ditoy ti masakit unay. Iti 18 a tawen, isut’ di makatakder ti nalinteg. Ket inkabil ni Jesus ti im-imana kenkuana, ket isut’ mangrugin a tumakder. Isu ti naagasanen!

Daytoy ti nakapungtotan dagiti relihiuso a papangulo. Kunada a mangagas koma ni Jesus iti dadduma nga aldaw, saan nga iti Sabbath.

Ngem kuna ni Jesus kadakuada: ‘Dakes a tattao. Uray asino kadakayo apanyo met painumen ti asnoyo no Sabbath. Di ngarud aya rebbeng a paimbagen daytoy pobre a babai no Sabbath?’

Kalpasanna, napanen da Jesus ken dagiti apostolesna idiay Jerusalem. Idiay ruar ti ili a Jerico, nangngeg ti dua a bulsek nga isut’ lumabas idiay. Nagpukkawda: ‘Jesus, tulongannakami!’

Sinaludsodan ni Jesus dagiti lallaki no aniat’ kayatda. Kunada: ‘Apo, luktam dagiti matami.’ Ammom kadi no apay ar-aramiden ni Jesus amin dagitoy a milagro? Ngamin ta inayatna dagiti tattao ken kayatna a maaddaanda ti pammati kenkuana. Inton agturayen kas Ari, awanton asinoman ditoy daga ti agsakit manen.

Mateo 15:30, 31; Lucas 13:10-17; Mateo 20:29-34.



Dagiti Saludsod

  • Ania ti inaramid ni Jesus bayat nga agdaldaliasat iti daga?
  • Kalpasan ti tallo a tawen manipud idi nabautisaran ni Jesus, ania ti imbagana kadagiti apostolna?
  • Siasino dagiti tattao iti ladawan, ket ania ti inaramid ni Jesus iti babai?
  • Idi asidegen da Jesus ken dagiti apostolna idiay Jerico, ania ti inaramid ni Jesus kadagiti dua a bulsek?
  • Apay a nagaramid ni Jesus kadagiti milagro?

Kanayonan a salsaludsod

  • Basaenyo ti Mateo 15:30, 31.

    Ania a nakaskasdaaw a pannakabalin ni Jehova ti naipalgak babaen ken Jesus, ket kasano koma nga apektaran daytoy ti panangtarustayo iti inkari ni Jehova a kasasaad iti baro a lubong? (Sal. 37:29; Isa. 33:24)

  • Basaenyo ti Lucas 13:10-17.

    Kasano a dagiti naisangsangayan a milagro nga inaramid ni Jesus iti Sabbath ipakitana no ania a pannakabang-ar ti iyegnanto iti sangatauan bayat ti Panagturayna iti Sangaribu a Tawen? (Luc. 13:10-13; Sal. 46:9; Mat. 12:8; Col. 2:16, 17; Apoc. 21:1-4)

  • Basaenyo ti Mateo 20:29-34.

    Kasano nga ipakita daytoy a salaysay a kanayon a madadaan ni Jesus a tumulong kadagiti tattao, ket ania ti masursurotayo iti daytoy? (Deut. 15:7; Sant. 2:15, 16; 1 Juan 3:17)

Ammuem ti Ad-adu Pay

NI JESUS—TI DALAN, TI KINAPUDNO, TI BIAG

Makinpannakabalin a Naaramid Dagiti Milagro?

Impagarup dagiti kakabsat ni Jesus a nadadaelen ti panunotna.