Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 94: Inayatna Dagiti Ubbing

Estoria 94: Inayatna Dagiti Ubbing

KITAEM ni Jesus ditoy nga inyarakupna ti im-imana iti bassit nga ubing. Maibagam a talaga a kaykayat ni Jesus dagiti ub-ubbing. Dagiti tattao nga agbuybuya isu dagiti apostolesna. Aniat’ ibagbaga ni Jesus kadakuada?

Kasubsubli pay laeng da Jesus ken ti apostolesna manipud adayo a biahe. Idiay dalanda, agsusuppiat dagiti apostoles. Gapuna ita sinaludsodan ida ni Jesus: ‘Ania ti pagsusuppiatanyo?’ Kinaagpaysona, ammo ni Jesus ti pagsusuppiatanda, ngem kayatna a maammuan no ibagada kenkuana.

Ni Jesus ken maysa nga ubing

Di sumungsungbat dagiti apostoles, ta pagsusuppiatanda no asino ti kadadakkelan. Dadduma kadagiti apostoles kayatda nga ad-adda nga importanteda ngem ti dadduma.

Gapuna nangawag ni Jesus ti bassit nga ubing, ket pinagtakderna iti sanguananda amin. Sana imbaga kadakuada: ‘Malaksid nga agbalinkayo kas kadagiti babassit nga ub-ubbing, dikayto makagteng iti pagarian ti Dios. Ti kadadakkelan idiay pagarian isu daydiay agbalin kas iti daytoy nga ubing.’

Siempre, ti babassit nga ub-ubbing saanda a pakadanagan ti panagbalinda nga importante ngem ti dadduma. Gapuna dida rebbeng a pagaapaan ti panagbalin nga importante.

Iti kamaudiananna, impakita manen ni Jesus a kaay-ayona ti ub-ubbing. Dadduma inyegda ti annakda a makita ni Jesus, ket pinawilan ida dagiti apostoles. Ngem kuna ni Jesus: ‘Bay-anyo nga umay dagiti ub-ubbing kaniak, ta ti pagarian ti Dios agpaay kadagiti tattao kas kadakuada.’ Saan aya a nagsayaat a maammuan nga inay-ayat ni Jesus dagiti ub-ubbing?

Mateo 18:1-4; 19:13-15; Marcos 9:33-37; 10:13-16.



Dagiti Saludsod

  • Ania ti pagsusupiatan dagiti apostol idi addada iti dalanda nga agsubli manipud iti adayo a biahe?
  • Apay a nangawag ni Jesus iti bassit nga ubing ken pinatakderna iti sanguanan dagiti apostol?
  • Iti ania a pamay-an a sursuruen dagiti apostol ti agbalin a kas kadagiti ubbing?
  • Iti sabali pay a gundaway, kasano nga impakita ni Jesus a kaay-ayona dagiti ubbing?

Kanayonan a salsaludsod

  • Basaenyo ti Mateo 18:1-4.

    Apay a nagusar ni Jesus kadagiti ilustrasion no mangisuro? (Mat. 13:34, 36; Mar. 4:33, 34)

  • Basaenyo ti Mateo 19:13-15.

    Ania a kababalin dagiti ubbing ti nasken a tuladentayo tapno magun-odtayo dagiti bendision nga itden ti Pagarian? (Sal. 25:9; 138:6; 1 Cor. 14:20)

  • Basaenyo ti Marcos 9:33-37.

    Ania ti insuro ni Jesus kadagiti adalanna maipapan iti panagtarigagay kadagiti natan-ok a saad? (Mar. 9:35; Mat. 20:25, 26; Gal. 6:3; Fil. 2:5-8)

  • Basaenyo ti Marcos 10:13-16.

    Kasano kalaka a maasitgan ni Jesus, ket ania ti masursuro dagiti Kristiano a panglakayen iti daytoy nga ehemplo? (Mar. 6:30-34; Fil. 2:1-4; 1 Tim. 4:12)

Ammuem ti Ad-adu Pay

Nangisuro Maipapan iti Diborsio ken Panagayat Kadagiti Ubbing

Naiduma ti panangmatmat ni Jesus kadagiti ubbing iti panangmatmat dagiti adalanna. Apay?