Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 93: Ni Jesus Nangpakan ti Adu

Estoria 93: Ni Jesus Nangpakan ti Adu

ADDA dakes a banag a napasamak. Ni Juan Bautista ti pinatayda. Pinaputol ti ari ti ulona.

Idi nangngegan ni Jesus daytoy, nagladingit unay. Isut’ napan iti naiputputong a lugar a maymaysana. Ngem simmurot dagiti tattao kenkuana. Gapuna nagsao ni Jesus kadakuada maipapan iti pagarian ti Dios ken inagasanna dagiti masakit.

Iti dayta a rabii, immay dagiti adalan kenkuana ket kunada: ‘Ibaonmo dagiti tattao tapno makagatangda ti taraonda.’

Pakpakanen ni Jesus ti adu a tao

‘Saan a kasapulan a pumanawda,’ insungbat ni Jesus. ‘Ikkanyo ida ti kanenda.’

‘Adu a kuarta ti kasapulan tapno makagatang ti umdas para iti tunggal maysa,’ kuna ni Felipe kenkuana. Nagsao met ni Andres: ‘Daytoy nga ubing a lalaki adda awitna a lima a tinapay ken dua nga ikan para kadatayo. Ngem di pay umdas dayta.’

‘Ibagayo kadagiti tattao nga agtugawda kadagiti karuotan,’ kuna ni Jesus. Ket nagyaman iti Dios gapu iti taraon, ket sana pinispisi ida. Sumaganad, inted dagiti adalan ti tinapay ken ikan kadagiti isuamin a tattao. Addada 5,000 a lallaki, ken rinibo pay a babbai ken ub-ubbing. Nanganda amin inggana a nabsogda. Ket idi nga inurnong dagiti ad-adalan ti natda, adda pay 12 a basket a napumpunno!

Ita kuna ni Jesus kadagiti adalanna a bumallasiwda idiay Baybay ti Galilea iti barangay. Iti rabii, immay ti dakkel a bagyo, ket nagbuteng dagiti adalan. Ket, iti tengnga ti rabii, nakakitada ti maysa a magmagna iti danum nga agturturong kadakuada. Nagpukkawda gapu iti butengda, ta dida ammo no asino daydiay makitkitada.

‘Dikay agbuteng,’ kuna ni Jesus, ‘Siak!’ Kasla dida patien. Kayat ni Pedro ti magna met iti rabaw ti danum a sumabat ken Jesus, gapuna kuna ni Jesus: ‘Umayka!’ Ket ni Pedro rinugiannan ti magna iti danum! Ngem isut’ nagbuteng ken lumneden. Ket isu ti insalakan ni Jesus.

Kalpasan pinakan manen ni Jesus ti rinibo a tattao manipud bassit laeng a taraon. Saan kadi a naglaing ni Jesus a mangaywan kadagiti tattao? Inton agturayen kas ari ti Dios, ditayto agdanag iti aniaman!

Mateo 14:1-32; 15:29-38; Juan 6:1-21.



Dagiti Saludsod

  • Ania ti dakes a napasamak ken ni Juan Bautista, ket ania ti narikna ni Jesus iti daytoy?
  • Kasano a pinakan ni Jesus dagiti tattao a simmurot kenkuana, ket kasano kaadu ti taraon a natda?
  • Apay a nagbuteng dagiti adalan bayat ti rabii, ket ania ti napasamak ken ni Pedro?
  • Kasano a pinakan ni Jesus dagiti rinibu a tattao iti maikadua a gundaway?
  • Apay a nagsayaat no agturayto ni Jesus ditoy daga kas Ari ti Dios?

Kanayonan a salsaludsod

  • Basaenyo ti Mateo 14:1-32.

    Ti salaysay iti Mateo 14:23-32 ket mangipaay iti ania a pannakaawat maipapan iti personalidad ni Pedro?

    Kasano nga ipasimudaag ti Kasuratan a nagmataengan ken naparmek ni Pedro ti kinadarasudosna? (Mat. 14:27-30; Juan 18:10; 21:7; Ara. 2:14, 37-40; 1 Ped. 5:6, 10)

  • Basaenyo ti Mateo 15:29-38.

    Kasano nga impakita ni Jesus ti panagraem kadagiti material a probision a naggapu ken Amana? (Mat. 15:37; Juan 6:12; Col. 3:15)

  • Basaenyo ti Juan 6:1-21.

    Kasano a matulad dagiti Kristiano ita ti ehemplo ni Jesus no iti panagraem iti gobierno? (Juan 6:15; Mat. 22:21; Roma 12:2; 13:1-4)