Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 92: Ni Jesus Pinagungarna Dagiti Natay

Estoria 92: Ni Jesus Pinagungarna Dagiti Natay

TI BABAI a makitkitam ditoy ket 12 años. Ig-iggaman ni Jesus ti imana, ken sitatakder iti asideg da nanang ken tatangna. Ammom kadi no apay naragsakda? Kitaentayo.

Pinagungar ni Jesus ti anak a babai ni Jairo

Ti ama ti babai ti importante a tao nga agnagan Jairo. Maysa nga aldaw nagsakit ti balasangna, ket pinaiddada. Kimmaro a kimmaro ti sakitna, ket madanagan unay ni Jairo ken ti asawana. Isu ti kakaisuna a balasangda ket kasla isut’ matayen.

Gapuna rimmuar ni Jairo tapno birokenna ni Jesus.

Nasarakan ni Jairo nga adda ni Jesus idiay tengnga ti adu a tattao. Nagparintumeng idiay sakaanan ni Jesus ket nagpakpakaasi kenkuana nga umay ken paimbagenna ti balasangna. Kuna ni Jesus nga isut’ umay.

Idi magmagnadan idiay tengnga ti adu a tattao, bigla a nagsardeng ni Jesus. ‘Asino ti nangsagid kaniak?’ insaludsodna. Narikna ni Jesus a rimmuar ti pannakabalin kenkuana, gapuna ammona nga adda nangsagid kenkuana. Ngem asino? Isut’ maysa a babai a masakiten iti 12 a tawen. Sinagidna ti kawes ni Jesus, ket isut’ naagasanen!

Maragsakan ni Jairo a makakita ken Jesus a naglakana a mangagas. Ngem apaman latta ta immay ti maysa a babaonen a nangibaga ken Jairo a natayen ti balasangna. Nangngeg ni Jesus daytoy ket kunana: ‘Dika agdanag, umimbagto ti balasangmo.’

Idi nakagtengda idiay balay ni Jairo, agsasangitda aminen. Ngem kuna ni Jesus: ‘Dikay agsangit. Matmaturog laeng ti ubing.’ Ngem kinatawaanda ni Jesus, ta ammoda a natayen ti ubing.

Gapuna innala ni Jesus ti ama ken ina ti ubing a babai ken ti tallo kadagiti apostolesna idiay kuarto ti ubing a nagiddaanna. Innalana iti ima ket kunana: ‘Bumangonka!’ Ket isu ti nagbiag. Isut’ gapuna a makitayo ti ina ken ama a nakaragragsakda unay.

Lucas 8:40-56; 7:11-17; Juan 11:17-44.



Dagiti Saludsod

  • Siasino ti ama ti balasitang nga adda iti ladawan, ket apay nga isu ken ti asawana madanaganda unay?
  • Ania ti inaramid ni Jairo idi nasarakanna ni Jesus?
  • Ania ti napasamak idi mapmapan ni Jesus iti pagtaengan ni Jairo, ket ania ti naipadamag ken ni Jairo bayat nga addada iti dalan?
  • Apay a dagiti tattao iti balay ni Jairo kinatkatawaanda ni Jesus?
  • Ania ti inaramid ni Jesus kalpasan nga imbagana kadagiti tallo nga apostolna kasta met ti ama ken ina ti ubing a mapanda iti kuarto ti ubing?
  • Siasino pay ti pinagungar ni Jesus, ket ania ti ipakita daytoy?

Kanayonan a salsaludsod

  • Basaenyo ti Lucas 8:40-56.

    Kasano nga impakita ni Jesus ti asi ken kinanainkalintegan iti babai nga agpadpadara, ket ania ti masursuro iti daytoy dagiti Kristiano a panglakayen ita? (Luc. 8:43, 44, 47, 48; Lev. 15:25-27; Mat. 9:12, 13; Col. 3:12-14)

  • Basaenyo ti Lucas 7:11-17.

    Kasano a dagidiay napukawan iti ipatpateg iti biag makasarakda iti dakkel a liwliwa iti insungbat ni Jesus iti balo idiay Nain? (Luc. 7:13; 2 Cor. 1:3, 4; Heb. 4:15)

  • Basaenyo ti Juan 11:17-44.

    Kasano nga impakita ni Jesus a gagangay ti agladingit iti ipapatay ti patpatgen? (Juan 11:33-36, 38; 2 Sam. 18:33; 19:1-4)

Ammuem ti Ad-adu Pay

NI JESUS—TI DALAN, TI KINAPUDNO, TI BIAG

Agbiag Manen ti Ubing a Babai!

Nagkatawa dagiti tattao idi imbaga ni Jesus a matmaturog laeng ti ubing. Ania ti ammo ni Jesus a saanda nga ammo?

NI JESUS—TI DALAN, TI KINAPUDNO, TI BIAG

Pinagungar ni Jesus ti Anak a Lalaki ti Balo

Natarusan dagiti nakakita iti milagro ti pudno a kaipapananna.

NI JESUS—TI DALAN, TI KINAPUDNO, TI BIAG

Napagungar ni Lazaro

Adda dua a kangrunaan a banag iti daytoy a milagro nga imposible a mailibak dagiti bumusbusor ken Jesus.