Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 91: Nangisuro ni Jesus Idiay Bantay

Estoria 91: Nangisuro ni Jesus Idiay Bantay

KITAEM ni Jesus a mangisursuro amin kadagitoy a tattao iti maysa a bantay idiay Galilea. Dagidiay asideg kenkuana isuda dagiti adalanna. Nangpili ti 12 kadakuada nga agbalin nga apostoles. Dagiti apostoles ket isuda dagiti espesial nga ad-adalan ni Jesus. Ammom kadi ti nagnaganda?

Mangisursuro ni Jesus

Adda ni Simon Pedro ken ni Andres a kabsatna. Sa adda met ni Santiago ken ni Juan, nga agkabsat met. Sa adda pay maysa a Santiago, ken adda pay sabali nga agnagan Simon. Dua nga apostoles ti agnagan Judas: Ni Judas Iscariote, ken daydiay maysa pay a Judas (a managan met Tadeo). Sa adda da Felipe ken Natanael (nga agnagan met ti Bartolome), ken ni Mateo ken Tomas.

Kalpasan panaggapuda idiay Samaria, nangrugi a nangasaba ni Jesus: ‘Ti pagarian ti langit asidegen.’ Ti pagarian ket pudpudno a gobierno ti Dios. Ni Jesus ti arina. Isut’ agturay manipud langit a mangyeg talna ken pagbalinenna a paraiso ti daga.

Ditoy ibagbaga ni Jesus: ‘Kastoy ti rebbeng a panagkararagyo: Amami nga addaka sadi langit, madaydayaw koma ti naganmo. Umay koma ti pagariam. Maaramid koma ti pagayatam ditoy daga, kas met sadi langit.’ Isu daytoy ti maaw-awagan ‘Kararag ti Apo,’ wenno ‘Amami.’

Isursuro met ni Jesus kadagiti tattao a naasida koma kadagiti dadduma. ‘Aramidem kadagiti dadduma ti kayatmo nga aramidendanto met kenka,’ kunana. Saan kadi a nakaskasdaaw idiay paraiso a daga, inton tunggal maysa aramidenda daytoy?

Mateo kapitulo 5 ingganat’ 7; 10:1-4.



Dagiti Saludsod

  • Iti ladawan, pangisursuruan ni Jesus, ken siasino dagidiay nakatugaw iti asidegna?
  • Ania ti nagan dagiti 12 nga apostol?
  • Ania ti Pagarian nga ikaskasaba ni Jesus?
  • Ania ti insuro ni Jesus nga ikararag dagiti tattao?
  • Ania ti imbaga ni Jesus maipapan iti rumbeng a panangtrato dagiti tattao iti maysa ken maysa?

Kanayonan a salsaludsod

  • Basaenyo ti Mateo 5:1-12.

    Kadagiti ania a pamay-an a maipakitatayo a sipapanunottayo iti naespirituan a kasapulantayo? (Mat. 5:3; Roma 10:13-15; 1 Tim. 4:13, 15, 16)

  • Basaenyo ti Mateo 5:21-26.

    Kasano nga ipaganetget ti Mateo 5:23, 24 a ti relasiontayo kadagiti kakabsattayo apektaranna ti relasiontayo ken ni Jehova? (Mat. 6:14, 15; Sal. 133:1; Col. 3:13; 1 Juan 4:20)

  • Basaenyo ti Mateo 6:1-8.

    Ania dagiti sumagmamano a kita ti panaginlilinteg a nasken a liklikan dagiti Kristiano? (Luc. 18:11, 12; 1 Cor. 4:6, 7; 2 Cor. 9:7)

  • Basaenyo ti Mateo 6:25-34.

    Ania ti insuro ni Jesus maipapan iti panagtalek ken ni Jehova no kadagiti material a kasapulantayo? (Ex. 16:4; Sal. 37:25; Fil. 4:6)

  • Basaenyo ti Mateo 7:1-11.

    Ania ti maadaltayo iti nalawag nga ilustrasion a masarakan iti Mateo 7:5? (Prov. 26:12; Roma 2:1; 14:10; Sant. 4:11, 12)

Ammuem ti Ad-adu Pay

NI JESUS—TI DALAN, TI KINAPUDNO, TI BIAG

Ti Nalatak a Sermon iti Bantay

Mailawlawag dagiti kangrunaan a punto iti palawag ni Jesus.

TI PAGWANAWANAN

Makapnek ti Biag—No Tuladen ni Jesus

Ipakita dagiti pudno a kapadasan a ti panangyaplikar kadagiti sasao ni Jesus iti Sermon iti Bantay ket mangyeg iti makapnek a biag.