Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 90: Kadua ti Babai Idiay Bubon

Estoria 90: Kadua ti Babai Idiay Bubon

NAGSARDENG ni Jesus nga aginana iti maysa a bubon idiay Samaria. Napan idiay ili ti ad-adalan ni Jesus a gumatang ti taraon. Ti babai a kasarsarita ni Jesus immay a sumakdo. Nagdawat kenkuana a makiinum koma.

Ni Jesus bayat a makisarsarita iti babai a Samaritana

Kaaduan a Judio dida kaykayat dagiti Samaritano. Isu a nagsiddaaw ti babai idi nakisao ni Jesus kenkuana. Ngem ni Jesus inayatna amin a tattao. Kunana: ‘No ammom la koma no siasino ti dumawdawat ti inumen, agdawatka koma kenkuana ket itdennanto kenka ti danum a makaited ti biag.’

‘Apo,’ kuna ti babai, ‘Awan pay ti pagsakdom ket nauneg ti bubon. Sadino ngay ti pangalaam iti danum a makaited ti biag?’

Kuna ni Jesus: ‘No uminumka ti danum manipud iti daytoy a bubon, mawawkanto manen. Ngem ti danum nga itdekto ket pagbiagenna nga agnanayon ti tao.’

‘Apo,’ kuna ti babai, ‘Itdem kaniak daytoy a danum! Tapno diakton um-umay ditoyen a sumakdo ti danum.’

Impato ti babai a ni Jesus agsasao iti pudpudno a danum. Ngem isut’ agsasao maipapan ti kinapudno maipapan ti Dios ken ti pagarianna. Daytoy a kinapudno arigna ti makaitedbiag a danum.

Ita ibaga ni Jesus iti babai: ‘Inka ket ayabam ni lakaymo.’

‘Awan lakayko,’ insungbat daydi babai.

‘Pudno dayta,’ kuna ni Jesus. ‘Ngem naaddaanka idi ti lima nga asawa. Ket ti lalaki a kabkabbalaymo ita saan nga isut’ lakaymo.’

Nakellaat ti babai, ta pudno daytoy. Ammo amin daytoy ni Jesus ta isu daydi Inkari ti Dios nga ibaonnanto. Inted ti Dios kenkuana daytoy nga impormasion. Itan nagsublin dagiti adalan ni Jesus, ket nagsiddaawda a nakakita ken Jesus a makisarsarita iti Samaritana.

Manipud iti daytoy makitatayo a ni Jesus naasi kadagiti tattao iti amin a rasa. Ken kastatay met koma. Kayat ni Jesus a maammuan koma amin a tattao ti kinapudno a mangiturong iti biag nga agnanayon. Ken uray datayo kayattay met koma a tulongan dagiti tattao a makaammo ti kinapudno.

Juan 4:5-43; 17:3.



Dagiti Saludsod

  • Apay a nagsardeng ni Jesus iti maysa a bubon idiay Samaria, ket ania ti ibagbagana iti babai sadiay?
  • Apay a nagsiddaaw ti babai, ania ti imbaga kenkuana ni Jesus, ken apay?
  • Ania ti impagarup ti babai maipapan iti danum nga ibagbaga ni Jesus, ngem ania a danum ti talaga a tuktukoyen ni Jesus?
  • Apay a naklaat ti babai iti imbaga ni Jesus maipapan kenkuana, ken apay nga ammo ni Jesus daytoy?
  • Ania dagiti masursurotayo iti salaysay maipapan iti babai iti bubon?

Kanayonan a salsaludsod

  • Basaenyo ti Juan 4:5-43.

    Kas panangtulad iti ulidan ni Jesus, ania a kababalin ti masapul nga ipakitatayo kadagiti tattao a sabali ti puli wenno kasasaadda iti kagimongan? (Juan 4:9; 1 Cor. 9:22; 1 Tim. 2:3, 4; Tito 2:11)

    Kasano a magunggonaan iti naespirituan ti maysa a tao nga agbalin nga adalan ni Jesus? (Juan 4:14; Isa. 58:11; 2 Cor. 4:16)

    Kasanotayo a maipakita ti apresasion a kas iti inaramid ti Samaritana, a sigagagar a nangiranud iti naammuanna? (Juan 4:7, 28; Mat. 6:33; Luc. 10:40-42)

Ammuem ti Ad-adu Pay

Panangisuro iti Samaritana

Imbaga ni Jesus kenkuana ti saanna pay nga imbaga iti sabali.