Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 88: Ni Juan Bautisaranna ni Jesus

Estoria 88: Ni Juan Bautisaranna ni Jesus

KITAEM ti kalapati a bumabbaba iti ulo ti lalaki. Ti lalaki ket isu ni Jesus. Isut’ agangay 30 ti tawennan. Ket ti lalaki a kaduana isu ni Juan. Ammom kadi no asino ni Juan? Isut’ anak ni Elisabet. Isu daydiay limmagto gaput’ rag-o uray pay sakbay a naiyanak, idi ni Maria simmarungkar ken Elisabet.

Ti bautismo ni Jesus

Kaibatbatok ni Juan idiay Karayan Jordan ni Jesus. Kastoy ti pannakabautisar ti maysa a tao. Umuna, isut’ maipabatok iti danum, santo mairukuas manen. Daytoy ti ar-aramiden ni Juan kadagiti tattao, isu a napanaganan Juan Bautista. Ngem apay a ni Juan binautisaranna ni Jesus?

Ni Jesus napan ken Juan ket indawatna a mabautisaran. Babautisaran ni Juan dagiti tattao a kayatda a maipakita a maladingitanda kadagiti dakes a naar-aramidanda. Ngem awan dakes a naaramidan ni Jesus. Isu nga apay a kayatna ti mabautisaran?

Sakbay nga immay ni Jesus ditoy ken ni Juan, isut’ karpentero, kas iti asawa ni Maria, a ni Jose. Ngem adda naisangsangayan a trabaho a paaramid ti Dios ken Jesus. Tapno maipakitana nga immayen tapno aramidenna ti pagayatan ni Amana, indawat ni Jesus ken ni Juan a bautisaranna koma.

Naay-ayo ti Dios iti daytoy. Idi rimmuaren ni Jesus iti danum, maysa a timek manipud langit kunana: ‘Daytoy ti Anakko, a pakaay-ayuak unay.’ Kasta met, kasla naglukat ti langit ket daytoy a kalapati bimmaba ken Jesus. Daytat’ saan a pudpudno a kalapati. Kaas-asping laeng ti maysa. Talaga a daytat’ nasantuan nga espiritu ti Dios.

Itan adun ti pagpanunotan ni Jesus. Isut’ napan iti naiputputong a lugar iti 40 nga al-aldaw. Namitlo a daras, ni Satanas pinadpadasna a paaramid ken Jesus ti banag a maibusor iti linlinteg ti Dios, ngem madi nga aramiden ni Jesus dayta.

Kalpasan dayta, ni Jesus nagsubli ket nakitana ti dadduma a lallaki nga isudanto ti agbalin nga umun-una a paspasurotna, wenno ad-adalanna. Ti nagan dagiti dadduma ket isuda da Andres, Pedro (a maaw-awagan met ti Simon), Felipe ken Natanael (a maaw-agawan met ti Bartolome). Ni Jesus ken dagitoy baro nga ad-adalan napandan idiay distrito ti Galilea. Idiay Cana, napan ni Jesus iti dakkel a pagbodaan, ket inaramidna ti damdamo a milagrona. Ammom kadi daydiay? Pinagbalinna daydiay danum nga arak.

Mateo 3:13-17; 4:1-11; 13:55; Marcos 6:3; Juan 1:29-51; 2:1-12.



Dagiti Saludsod

  • Siasino dagiti dua a lallaki iti ladawan?
  • Kasano ti pannakabautisar ti maysa a tao?
  • Siasino dagiti gagangay a babautisaran ni Juan?
  • Ania ti naisangsangayan a rason no apay a kiniddaw ni Jesus nga isu ket bautisaran ni Juan?
  • Kasano nga impakita ti Dios nga isu ket naay-ayo iti panagpabautisar ni Jesus?
  • Ania ti napasamak idi napan ni Jesus iti naiputputong a lugar iti 40 nga aldaw?
  • Siasino ti dadduma kadagiti immuna a pasurot wenno adalan ni Jesus, ken ania ti damo a milagro nga inaramidna?

Kanayonan a salsaludsod

  • Basaenyo ti Mateo 3:13-17.

    Ania a padron ti impasdek ni Jesus para iti bautismo dagiti adalanna? (Sal. 40:7, 8; Mat. 28:19, 20; Luc. 3:21, 22)

  • Basaenyo ti Mateo 4:1-11.

    Kasano a ti nasigo a panangusar ni Jesus iti Kasuratan paregtaennatayo ita a mangadal a regular iti Biblia? (Mat. 4:5-7; 2 Ped. 3:17, 18; 1 Juan 4:1)

  • Basaenyo ti Juan 1:29-51.

    Nangiturongan ni Juan a Mammautisar kadagiti adalanna, ket kasanotayo a matulad ita? (Juan 1:29, 35, 36; 3:30; Mat. 23:10)

  • Basaenyo ti Juan 2:1-12.

    Kasano nga ipakita ti damo a milagro nga inaramid ni Jesus a saan a papaidaman ni Jehova dagiti adipenna? (Juan 2:9, 10; Sal. 84:11; Sant. 1:17)