Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 87: Ni Jesus Idiay Templo

Estoria 87: Ni Jesus Idiay Templo

KITAEM ti ubing a makisarsarita kadagitoy a lallakay. Isuda ti mannursuro idiay templo ti Dios sadi Jerusalem. Ket ti ubing isu ni Jesus. Isut’ 12 a tawenna itan.

Agsidsiddaaw dagiti mannursuro a nagadut’ ammo ni Jesus maipapan iti Biblia. Ngem sadinot’ yan da Jose ken Maria? Kitaentayo.

Makisarsarita ti ubing a ni Jesus kadagiti mannursuro

Kada tawen iyeg ni Jose ti pamiliana idiay Jerusalem para iti espesial a selebrasion a maaw-awagan Paskua. Naunday a biahe dayta manipud Nazaret a mapan Jerusalem. Kadagidiay nga alaldaw awan pay dagiti kotse ken tren. Ket alaenna ti agangay tallo nga aldaw a pagpagnaen inggana idiay Jerusalem.

Itattan dakkelen ti pamilia ni Jose. Isu nga addada metten ub-ubbing a kakabsat ni Jesus a lallaki ken babbai nga aywananna. Iti daytoy a tawen, nagrubbuaten ni Jose ken ni Maria agraman dagiti annakda iti daytoy naunday a biahe nga agsublin idiay Nazaret. Pagarupda a kaduadan ni Jesus, ngem idi agpatingga ti aldawen, saanda metten a mabirokan. Isu a nagsublida idiay Jerusalem tapno sapulenda sa idiay.

Iti kamaudiananna nasarakanda ni Jesus ditoy a kadua dagiti mannursuro. Amin dagiti tattao ti agsidsiddaaw iti kinasiribna. Ngem kuna ni Maria: ‘Anak, siak ken ni tatangmo ti madanagan unay nga agsapsapulen kenka.’

‘Apay-apay a birbirokendak?’ insaludsod ni Jesus. ‘Dikay kadi ammo a masapul a sanguek dagiti bambanag idiay balay ni Amak?’

Wen, pagay-ayat ni Jesus ti aggian idiay pakaadalanna ti maipapan iti Dios. Saan kadi a kasta met ti riknatayo? Idiay Nazaret, mapan ni Jesus kadagiti paggigimongan tapno agdayaw iti kada lawas. Isut’ agimdeng ken makaadal ti adu a bambanag. Agbalintay a kas ken Jesus ket surotentayo ti ulidanna.

Lucas 2:41-52; Mateo 13:53-56.



Dagiti Saludsod

  • Iti ladawan, mano ti tawenen ni Jesus, ken sadino ti ayanna?
  • Ania ti tinawen nga ar-aramiden ni Jose ken ti pamiliana?
  • Kalpasan ti maysa nga aldaw iti panagbiaheda nga agawid, apay a nagsubli da Jose ken Maria idiay Jerusalem?
  • Sadino ti nakasarakan da Jose ken Maria ken ni Jesus, ket apay a dagiti tattao sadiay agsidsiddaawda ken ni Jesus?
  • Ania ti imbaga ni Jesus ken ni nanangna a Maria?
  • Iti panagsursuro maipapan iti Dios, kasanotayo a matulad ni Jesus?

Kanayonan a salsaludsod

  • Basaenyo ti Lucas 2:41-52.

    Nupay impaannurot ti Linteg a lallaki laeng ti tumabuno kadagiti tinawen a piesta, ania a nasayaat nga ulidan ti impaay da Jose ken Maria para kadagiti nagannak ita? (Luc. 2:41; Deut. 16:16; 31:12; Prov. 22:6)

    Kasano a nangipasdek ni Jesus iti nagsayaat nga ulidan para kadagiti agtutubo ita maipapan iti panagpasakup kadagiti dadakkelda? (Luc. 2:51; Deut. 5:16; Prov. 23:22; Col. 3:20)

  • Basaenyo ti Mateo 13:53-56.

    Siasino dagiti nainaganan iti Biblia nga uppat a kakabsat ni Jesus iti lasag, ket kasano a nausar ti dua kadakuada iti kongregasion Kristiano idi agangay? (Mat. 13:55; Ara. 12:17; 15:6, 13; 21:18; Gal. 1:19; Sant. 1:1; Jud. 1)

Ammuem ti Ad-adu Pay

Napan Idiay Jerusalem ti Pamilia ni Jesus

Masikoran da Jose ken Maria idi saanda a mabirokan ni Jesus, nupay nasdaaw met ni Jesus ta saanda nga ammo no sadino ti dagus a pangbirokanda kenkuana.